« ឈោងទៅរកកម្លាំងរបស់ទ្រង់ » ដើម្បីកម្លាំងនៃយុវជន ខែ មីនា ឆ្នាំ ២០២៤ ។
អំពីច្បាប់ពិសេសនេះ
ឈោងទៅរកកម្លាំងរបស់ទ្រង់
នៅក្នុងដំណឹងល្អរបស់ម៉ាកុស យើងបានអានអំពីស្ត្រីម្នាក់ដែលមានជំងឺអស់រយៈពេល ១២ ឆ្នាំ ។ មានគេប្រាប់នាងអំពីព្រះយេស៊ូវ ។ ដូច្នេះ ពេលដែលទ្រង់យាងកាត់ក្រុងរបស់នាង នោះនាងក៏អង្គុយរង់ចាំនៅកៀនផ្លូវ ។ ពេលទ្រង់យាងកាត់នោះ នាងលូកដៃទៅប៉ះព្រះពស្ដរបស់ទ្រង់ដោយស្ងាត់ៗ ។
នាងបានជាសះស្បើយភ្លាមៗ ។ ប៉ុន្តែមិនមែនមានតែនាងម្នាក់នោះទេ ដែលបានឃើញពីអព្ភូតហេតុនោះ ព្រះយេស៊ូវទ្រង់ក៏បានទតឃើញដែរ ។ « នោះស្រាប់តែព្រះយេស៊ូវ ជ្រាបក្នុងព្រះអង្គទ្រង់ថា មានព្រះចេស្តាចេញពីទ្រង់ ក៏ងាកបែព្រះអង្គក្នុងហ្វូងមនុស្សសួរថា អ្នកណាពាល់អាវខ្ញុំ ? » ( ម៉ាកុស ៥:៣០ ) ។ គុណធម៌ ក៏អាចមានន័យថាកម្លាំងផងដែរ ។ ព្រះយេស៊ូវបានជ្រាបដឹងភ្លាមថាមាននរណាម្នាក់បានទទួលកម្លាំងពីទ្រង់ ។ ប្រតិកម្មភ្លាមៗរបស់ទ្រង់គឺត្រូវរកនាង ដើម្បីនិយាយជាមួយនាង និងរំឭកនាងអំពីអំណាចនៃសេចក្តីជំនឿ ។ ទ្រង់បានហៅនាងថា « កូនស្រីអើយ » ។ នាងបានជាសះស្បើយ ដោយសារទ្រង់ ។
ខ្ញុំបានរៀនថា ការអធិស្ឋានទូលសុំកម្លាំង ពុំដែលមិនទទួលបានចម្លើយឡើយ ។ ប្រសិនបើយើងឈោងទៅរកទ្រង់ ទ្រង់ « ឆ្លើយតបកង្វល់យើង » ( សូមមើល ទំនុកតម្កើង ៦៩ ) ។ អត្ថបទនីមួយៗនៅក្នុងទស្សនាវដ្តីប្រចាំខែនេះគឺជាការរំឭកនៃសេចក្តីពិតនោះ ។
នៅក្នុង ដើម្បីកម្លាំងនៃយុវជន ៖ សេចក្តីណែនាំសម្រាប់ធ្វើការជ្រើសរើស គណៈប្រធានទីមួយបានបង្រៀនថា « ព្រះអង្គសង្រ្គោះ … គឺជា ‹ កម្លាំងនៃយុវជន › » ( [ ឆ្នាំ ២០២២ ] ទំព័រ ២ ) ។ ប្រហែលជាអ្នកឆ្ងល់ពីរបៀបដើម្បីទទួលបានកម្លាំងនោះ ។ វាគឺជាក្តីសង្ឃឹមរបស់ខ្ញុំ ថាអ្នកនឹងទទួលបានអ្វីមួយនៅក្នុងទំព័រទាំងនេះ ដែលនឹងដឹកនាំអ្នកឲ្យឈោងទៅរកទ្រង់ ។
សូមស្វែងរកទំព័រទាំងនេះ ។ សូមស្វែងរកពាក្យសង្ឃឹម ស្វែងរកបទគម្ពីរនៃកម្លាំង សរសេរការបំផុសគំនិតដែលធ្វើឲ្យដួងចិត្តរបស់អ្នកចាប់អារម្មណ៍ ។ តាមរយៈព្រះយេស៊ូវគ្រីស្ទ អ្នកក៏អាចធ្វើឲ្យជាសះស្បើយដែរ ។
ដោយក្តីស្រឡាញ់ដ៏មហិមា
អេមីលី ប៊ែល ហ្វ្រីមែន
ប្រធានយុវនារីទូទៅ