« ព្រះអង្គសង្គ្រោះជ្រាបពីរបៀបដើម្បីជួយខ្ញុំឲ្យឆ្លងកាត់ជំងឺមហារីក » ដើម្បីកម្លាំងនៃយុវជន ខែ មីនា ឆ្នាំ ២០២៣ ។
ខ្ញុំអាចធ្វើគ្រប់ទាំងអស់បានដោយសារព្រះគ្រីស្ទ
យុវវ័យចែកចាយពីរបៀបដែលព្រះគ្រីស្ទបានពង្រឹងពួកគេ ដើម្បីធ្វើរឿងលំបាកៗ ( សូមមើល ភីលីព ៤:១៣ ) ។
ព្រះអង្គសង្គ្រោះជ្រាបពីរបៀបដើម្បីជួយខ្ញុំឲ្យឆ្លងកាត់ជំងឺមហារីក
ជីវិតរបស់ខ្ញុំសាមញ្ញណាស់ រហូតដល់រដូវរងារក្នុងឆ្នាំ ២០២០ ។ យើងបានគិតនៅពេលនោះថា ខ្ញុំបានឈឺដោយសារការឆ្លងមេរោគមួយ ដូច្នេះខ្ញុំបានលេបថ្នាំផ្សះតាមវេជ្ជបញ្ជា ។ ក្រោយមក ខ្ញុំចាប់ផ្ដើមមានអារម្មណ៍ថាឈឺក្បាលជាប់ អស់កម្លាំង ហើយសន្លប់ ។ ភ្លាមៗបន្ទាប់ពីនោះមក ខ្ញុំបានដឹងខ្លួននៅម៉ោងប្រហែល ១០ យប់ ដោយគិតថា វាព្រឹកហើយ ហើយក៏ចាប់ផ្ដើមរៀបចំខ្លួនទៅសាលារៀន ។
ពេលបងស្រីរបស់ខ្ញុំប្រាប់ខ្ញុំថា វានៅយប់នៅឡើយទេ ខ្ញុំក៏បានរត់ទៅបន្ទប់របស់ឪពុកម្ដាយខ្ញុំទាំងភ័យស្លន់ស្លោ ។ ម៉ាក់ខ្ញុំបានស្ទាបក្បាលខ្ញុំ ហើយខ្ញុំបានក្ដៅខ្លួនយ៉ាងខ្លាំង ។ យើងបានទៅជួបវេជ្ជបណ្ឌិតនៅថ្ងៃបន្ទាប់ គាត់បានធ្វើតេស្ដជាច្រើន ។
នៅយប់នោះ ឪពុកម្ដាយរបស់ខ្ញុំមកបន្ទប់ខ្ញុំទាំងយំសស្រាក់ ។ ពួកគាត់បានប្រាប់ខ្ញុំថា ខ្ញុំមានជំងឺមហារីកគ្រាប់ឈាម ហើយថាយើងត្រូវទៅមន្ទីរពេទ្យដើម្បីដឹងពីចម្លើយបន្ថែមទៀត ។ ខ្ញុំនៅក្នុងបន្ទប់សង្គ្រោះបន្ទាន់ពេញមួយយប់ ហើយចាប់ផ្ដើមការព្យាបាលដោយប្រើគីមីតែពីរបីថ្ងៃប៉ុណ្ណោះបន្ទាប់ពីនោះ ។
ការព្យាបាលរបស់ខ្ញុំនឹងបន្ដរយៈពេលមួយឆ្នាំ ឬពីរឆ្នាំទៀត ប៉ុន្ដែវាស្ថិតនៅក្រោមការគ្រប់គ្រងបានល្អជាងមុនបន្ដិចហើយ ។ ថ្មីៗនេះ ខ្ញុំមានអារម្មណ៍ថាស្រួលខ្លួនជាងមុនបន្ដិច ហើយសង្ឃឹមថានឹងអាចទៅសាលារៀនវិញបានក្នុងពេលឆាប់ៗនេះ ។ តែវាមិនងាយស្រួលនោះទេ ។ ជាតិគីមីមានផលប៉ះពាល់យ៉ាងច្រើន រួមទាំងស្ថានភាពឆ្អឹងដែលគេហៅថា avascular necrosis ជាជំងឺពុកឆ្អឹងដោយសារខ្វះឈាម ដែលវាធ្វើឲ្យខ្ញុំពិបាកដើរ ។
ថ្វីបើមានរឿងទាំងអស់នេះកើតឡើងក្ដី—ប្រហែលដោយសារតែរឿងទាំងនេះហើយ—ទើបខ្ញុំមានអារម្មណ៍ខិតជិតព្រះវរបិតាសួគ៌របស់ខ្ញុំកាន់តែខ្លាំងឡើង ។ ឥឡូវនេះ ខ្ញុំមានការយល់ដឹងកាន់តែស៊ីជម្រៅអំពីដង្វាយធួនរបស់ព្រះយេស៊ូវគ្រីស្ទ ។ ខ្ញុំធ្លាប់គិតអំពីដង្វាយធួនរបស់ទ្រង់ថាជាអ្វីមួយ ដែលយើងត្រូវការតែពេលយើងធ្វើខុសប៉ុណ្ណោះ ។ នោះគឺជាមួយផ្នែកនៃដង្វាយធួន ប៉ុន្ដែការទុកចិត្តលើព្រះអង្គសង្គ្រោះក៏ជាអ្វីមួយដែលបានជួយខ្ញុំឲ្យលែងសូវមានអារម្មណ៍ឯកោផងដែរ ។
ព្រះយេស៊ូវគ្រីស្ទបានលើកដាក់មកលើព្រះអង្គទ្រង់នូវរាល់ទុក្ខវេទនា និងអំពើបាបរបស់យើងទាំងអស់ ដែលមានន័យថា ទ្រង់ជ្រាបយ៉ាងច្បាស់ពីរបៀបជួយខ្ញុំ កាលខ្ញុំជួបនឹងជំងឺមហារីកគ្រាប់ឈាមនេះ ។ ការឆ្លងកាត់ការសាកល្បងនានាអាចមានអារម្មណ៍ថាឯកោយ៉ាងខ្លាំង ប៉ុន្ដែតាមរយៈដង្វាយធួនរបស់ព្រះគ្រីស្ទ នោះយើងអាចមានការលួងលោម ដោយដឹងថា ទ្រង់ពិតជាយល់ពីអ្វីដែលយើងកំពុងឆ្លងកាត់ ។
រូប៊ី អេច រដ្ឋយូថាហ៍ ស.រ.អា.