Mga Aktibidad sa Pumarito Ka, Sumunod Ka sa Akin

Para sa home evening o pag-aaral ng mga banal na kasulatan—o para lang sa paglilibang!

Oktubre 28–Nobyembre 3

Mahalin ang Isa’t isa

Para sa Mormon 1–6.

Mahal ni Mormon ang mga Nephita (tingnan sa Mormon 3:12). Hiniling na sa atin ng Ama sa Langit at ni Jesucristo na mahalin din ang iba. Tumayo sa isang bilog at ipikit ang inyong mga mata. Bumilang hanggang tatlo, pagkatapos ay imulat ang inyong mga mata at tumingin sa isang tao. Kung magkatinginan kayo, sabihin ang isang bagay na gustung-gusto ninyo tungkol sa isa’t isa at lumabas ng bilog. Magpatuloy hanggang sa isang tao na lang ang matira! Tapos ay magsasabi ang lahat ng gustung-gusto nila tungkol sa taong iyon.

Para sa mas maliliit na bata: Gumawa ng isang “love” hunt sa loob o labas ng bahay ninyo. Anyayahan ang inyong maliliit na anak na maghanap ng mga bagay na nagpapaalala sa kanila tungkol sa mga taong mahal nila.

Nobyembre 4–10

Sining ng Himala

Tingnan sa Mormon 7–9.

Kapag sumusunod tayo kay Jesucristo, maaari tayong biyayaan ng Ama sa Langit ng mga himala. Basahin ang Mormon 8:24 at magdrowing ng isa sa mga himalang inilarawan sa talata. Habang nagdodrowing ka, ikuwento kung anong mga himala ang nagawa ng Ama sa Langit para sa inyong pamilya.

Para sa mas maliliit na bata: Ipaliwanag sa inyong mas maliliit na anak kung ano ang isang himala. Pagkatapos ay kantahin o pakinggan ang awiting “Ang Himala” (Liahona, Hunyo 2018, 72–73).

Nobyembre 11–17

Pagpipinta ng mga Bato

Tingnan sa Eter 1–5

Hiniling ng kapatid ni Jared sa Panginoon na hipuin ang mga bato upang magkaroon ng liwanag ang kanyang mga bagara (tingnan sa Eter 3). Mangolekta ng mga bato sa labas o gumupit ng mga bilog mula sa mga piraso ng papel. Sa inyong mga bato o papel, isulat, idrowing, o ipinta ang mga bagay na maaari ninyong gawin para maghatid ng liwanag at pagmamahal sa iba.

Para sa mas maliliit na bata: Basahin ang Eter 3:15 sa inyong mas maliliit na anak at sabihin sa kanila na ginawa tayo na maging kamukha ng Diyos. Pagkatapos ay gumawa ng isang meryendang pampalusog o sama-sama kayong maglakad-lakad para mapangalagaan ninyo ang mga katawang bigay sa inyo ng Diyos.

Nobyembre 18–24

Mga Awitin ng Pasasalamat

Para sa Eter 6–11.

Habang naglalakbay sila patawid ng dagat, umawit ang kapatid ni Jared at ang kanyang pamilya ng mga papuri sa Panginoon para pasalamatan Siya sa pagtulong sa kanila (tingnan sa Eter 6:9). Maaari kayong kumanta para pasalamatan din ang Panginoon! Pumili ng isang paboritong awitin mula sa Aklat ng mga Awit Pambata o sa website ng Simbahan at kantahin ito nang sabay-sabay. Paano pa ninyo maipapakita sa Ama sa Langit na nagpapasalamat kayo?

Para sa mas maliliit na bata: Kasama ang inyong mga musmos, magkunwari na kayo ay nasa bangka tulad ng mga Jaredita. Kantahin ang mga paborito ninyong awitin sa Primary habang umuuguy-ugoy kayo!

Mga larawang-guhit ni Katy Dockrill