“Usa ka Pakig-chat kang Eilish mahitungod sa Espiritu Santo,” Higala, Ene. 2024, 40–41.
Usa ka Pakig-chat kang Eilish mahitungod sa Espiritu Santo
Si Eilish usa ka 12-anyos nga babaye gikan sa Sidlakan nga Rehiyon sa Singapore. Nangutana kami kaniya mahitungod kon sa unsang paagi ang Espiritu Santo nagtabang kaniya.
Sultihi kami bahin sa imong kaugalingon.
Ganahan gyod ko magbasa ug magdula og volleyball, ug ang akong paborito nga subject sa eskwelahan mao ang math. Ang paborito nako nga pagkaon mao ang lasagna, ug ang akong paborito nga kolor mao ang pula. Kon ako modako na, gusto ko nga mahimong usa ka abogado ug magtrabaho diha sa korte.
Unsa kaha ang pamati sa Espiritu Santo diha kanimo?
Alang kanako, ang pagbati sa Espiritu Santo mao ang sama nga adunay suod nga higala uban kanako. Gibati nako nga sama Siya sa usa ka tawo nga akong masaligan kon magsunod ko sa mga kasugoan ug sa akong mga pakigsaad uban sa Langitnong Amahan. Maghunahuna ko Niya isip akong giya ug kompanyon. Makatabang Siya kanako sa paghimo og maayo nga mga pagpili.
Unsa nga tambag ang inyong mahatag ngadto sa usa ka tawo kinsa dili pa sigurado nga gibati nila ang Espiritu Santo?
Usahay mobati usab ako nga dili sigurado kon gibati ba nako ang Espiritu Santo. Apan kon imo gayod kining hunahunaon, magbasa sa mga kasulatan, ug mag-ampo, ug maayo ang imong pagbati bahin niini, mao kana ang Espiritu Santo. Usahay ang pagpaminaw sa Espiritu Santo dili lang usa ka pagbati. Kini mahimong usa ka hunahuna o ideya usab. Kon gibati gihapon nimo ang kalibog, makahimo ka kanunay sa pag-ampo ug mohangyo pag-usab sa Ginoo alang sa tabang.
Kanus-a kamo mibati sa Espiritu Santo?
Sa miaging tuig, midula ko sa usa ka torneyo sa volleyball. Sama sa kadaghanan sa akong kauban sa dula, ginerbiyos ko. Pagsugod nako og dula, ang among team napildi na sa primerong duha ka dula. Nawad-an kami sa kadasig. Dayon ang mga tawo nga nanan-aw sa dula miingon og dili makiangayon nga mga pulong, ug misamot ang among gibati. Napildi kami.
Sa dihang nangutana ang akong inahan kumusta among dula, misugod ko sa paghilak. Nasagmuyo kaayo ako. Misulod ko sa akong kwarto, diin nindot kini ug hilom, ug miampo. Human sa akong pag-ampo, gibati nako nga mas kalma ug mas malinawon sa akong kasingkasing. Ako nasayod nga ang Espiritu Santo mihupay kanako ug nga kanunay gayod Siyang motabang kanako. Adunay laing torneyo nga umaabot karong tuiga, nasayod ako nga Siya magauban kanako sa akong pagdula.
Sa unsa pa nga paagi nakatabang ang Espiritu Santo kanimo?
Ang Espiritu Santo mitabang usab kanako sa dihang mibalhin ako gikan sa Primary ngadto sa Young Women. Mahinamon ako bahin sa pag-adto sa Young Women. Apan mibati ako og nerbiyos sa samang higayon. Naguol ko og gamay nga mobiya usab sa Primary.
Sa wala pa ang akong unang klase, miampo ko ug nanghangyo sa Langitnong Amahan sa pagtabang kanako nga malingaw ko sa Young Women. Mibati ko og kalinaw diha sa akong kasingkasing sa dihang misulod ko ngadto sa akong bag-ong lawak-klasehanan. Andam na ko nga makat-on. Makatabang ang paghinumdom nga ang Espiritu Santo kanunay nga maanaa alang kanako!
Mga paghulagway pinaagi ni Annabel Tempest