“Ang Tumong sa Pagbasa,” Higala, Ene. 2024, 36–37.
Ang Tumong sa Pagbasa
Si Anders dili ganahan mobasa og kusog.
Kini nga istorya nahitabo sa USA.
Si Anders naminaw sa iyang igsoong babaye nga nagbasa atol sa pagtuon sa kasulatan sa pamilya. Gisulayan niya sa pagsunod diha sa iyang tablet. Apan lisod ang pagtutok sa mga pulong.
Si Anders kanunay nga maglisod sa pagbasa. Sa miaging tuig, nahibaloan niya nga siya adunay kakulangan diin maglisod siya sa pagkat-on og basa [dyslexia]. Ang dyslexia usa ka kakulangan sa pagkat-on nga nakapalisod sa pagbasa. Nagsagol-sagol ang mga pulong ug mga titik sa iyang utok, ug ang iyang mga mata molukso sa pikas pahina kon mosulay siya sa pagbasa.
Ang iyang igsoong babaye nakahuman og basa sa iyang bersikulo, ug ang iyang igsoon nga lalaki mibasa sa sunod. Apan si Anders wala mobasa. Dili siya ganahan mobasa og kusog. Ang pagpadako sa mga pulong diha sa iyang tablet nakatabang og gamay. Apan wala gyod siya ganahi unsa ka hinay ug bakikaw ang iyang pagbasa. Daghan kaayo siya og sayop! Kinahanglan siya motrabaho og maayo alang sa usa ka butang nga murag sayon ra para sa uban.
Sa dihang nahuman sila sa pagbasa, ang pamilya Anders nanan-aw og bidyo. Kabahin kini sa programa sa Kabataan ug Kabatan-onan.
“Paghimo og personal nga mga tumong nga mohagit ug moinat kaninyo,” miingon si Elder Gong diha sa bidyo. “Diskobreha ang bag-ong mga talento, mga interes, ug mga kahanas.”*
Si Anders naghunahuna bahin sa mga tumong nga iyang mahimo. Tingali makakat-on siya unsaon sa pagluto og mga biskwit. O mas maayo modula og soccer!
Dayon iyang gitan-aw ang Basahon ni Mormon diha sa lamesa. Ang pagkamaayo sa pagbasa mora og dili nindot paminawon nga tumong. Apan gusto siyang makahimo sa pagbasa sa mga kasulatan uban sa iyang pamilya.
“Nasayod ko kon unsay akong gusto sa akong tumong nga mamahimo,” miingon siyang Papa.
“Unsa man kini?” Nangutana si Papa.
Gipunit ni Anders ang Basahon ni Mormon. “Ako gusto nga mobasa og kusog og usa ka bersikulo sa Basahon ni Mormon matag adlaw.”
“Morag maayo kana nga tumong,” miingon si Papa. “Kanus-a ka gusto mosugod?”
“Karon dayon!”
Miadto si Anders sa iyang kuwarto ug gisirad-an ang pultahan. Dili siya gusto nga adunay bisan kinsa nga makadungog kaniya. Dayon iyang giablihan ang Basahon ni Mormon. Nasagol niya ang ubang mga pulong, apan usa ra ka minuto nga nahuman niya ang unang bersikulo. Dili kaayo to lisod, naghunahuna siya.
Si Anders nagbasa og usa ka kasulatan matag adlaw. Lisod kini! Wala niya gibati nga nagkamaayo siya, bisan pa man. Apan nagpadayon siya sa pagbuhat niini.
Dayon usa ka adlaw sa eskwelahan, miingon ang iyang magtutudlo, “Wow! Dili ko makatuo unsa ka paspas ka nga nakat-on.”
Si Anders mihangad gikan sa iyang buhatonon. “Tinuod?”
Miyango siya. “Hilabihan ang imong pag-umento.”
Miduko si Anders sa mga pulong diha sa iyang papel. Mas sayon na kini basahon kay sa una. Ang iyang tumong sa pagpraktis og basa sa mga kasulatan mas nakatabang kaniya nga makat-on sa eskwelahan.
Pag-abot niya sa balay, midagan siya sa taas aron mobasa sa iyang mga kasulatan. Sa dihang iyang gitan-aw ang pahina, ang mga pulong sa gihapon nagtuyok. Apan mas sayon kini sa paghibalo kon unsay ilang gisulti.
Naghinamhinam si Anders nianang gabhiona alang sa pagtuon sa kasulatan sa pamilya.
“Oy, Papa,” miingon siya. “Makatabang ba ako og basa karon?”
Mingisi si Papa. “Ganahan kaayo ko ana!”
Nagsunod si Anders og maayo samtang ang iyang mga igsoong lalaki ug igsoong mga babaye matag usa mibasa og bersikulo. Sa dihang iya na kining turno, mibasa siya sa bersikulo og hinay aron makasiguro nga nakuha niya og eksakto ang matag pulong. Human siya mibasa, mihangad siya. Ang tanan nagpahiyom kaniya.
Bisan og dili siya perpekto nga magbabasa, mibati si Anders og mapasigarbohon sa iyang kaugalingon. Nasayod siya nga kon motrabaho siya og maayo, ang Langitnong Amahan kanunayng anaa aron motabang kaniya.
Mga paghulagway pinaagi ni Kelly Smith