“Trabol long Pak,” Fren, Ogis 2023, 46–47.
Trabol long Pak
Hunter i pulum gud win blong hem. “Mi no stap talem ol toktok ia.”
Stori ia i tekem ples long YSA.
Hunter i ron krosem pak wetem ol fren blong hem. Hem i smael taem hem i filim win i stap fas long hem. !Hem i filim se hem i ron hariap we mo bodi blong hem i laet!
Kyle i tajem fanis faswan. “!Mi win!” hem i singaot.
Hunter i kasem fanis smol taem afta. “!I no fea ia! Yu yu stat faswan.”
“Yes,” Miguel i talem. “!Yumi resis i go long tri ia!”
Hunter i stat blong ron bakegen. Naoia, hem nao i tajem tri faswan. Be Miguel i stap stret biaen long hem.
“!Mi win!” Miguel i talem.
“No, Hunter i win,” Piper i talem.
“Yes,” Kyle i talem.
Miguel i foldem ol han blong hem. Afta hem i talem wan nogud toktok.
Ol nara pikinini oli laf. Miguel i talem toktok ia bakegen, mo oli laf sam moa.
Hunter i no filim glad insaed. Hem i save se toktok ia i nogud blong talem. Be hem i no wantem oli jikim hem. Hem i no talem wan samting.
Piper i talem wan nara nogud toktok. Afta Kyle i talem wan nara wan.
“Naoia yu talem wan, Hunter,” Kyle i talem.
“Yes, ale,” Miguel i talem. “Talem wan nara nogud toktok.”
Hunter i pulum gud win blong hem. “Mi no stap talem ol toktok ia.”
“Blong talem wan toktok bae i no mekem yu harem nogud,” Kyle i talem.
“Mi no wantem,” Hunter i talem.
“?Yu yu fraet tumas?” Miguel i laf.
Fes blong Hunter i filim hot. “Bae mi go pleiplei long wan nara ples.”
Ol nara pikinini oli gohed blong laf mo talem ol nogud toktok. Hunter i wantem blong ronwe. Naoia i nomo filim naes blong stap long pak. “Lukim yufala,” hem i talem sloslo.
Hunter i putum, ol han blong hem long poket blong hem mo wokbaot sloslo bitim ol nara pikinini. Hem i no filim se hem i ron spid o filim laet bakegen. Hem i filim hevi.
Hem i faenem Mama mo Papa we tufala i stap sidaon long wan jea. Papa i putum buk blong hem daon. “?Yu yu oraet?”
Hunter i muvum ol solda blong hem se i no save. “Oli stat blong stap talem ol nogud toktok. Mi mi no wantem talem ol toktok ia, mekem se mi aot.”
Mama i smael. “Yu gat strong paoa long tingting.”
“Mitufala i glad long yu,” Papa i talem. “Hem i had blong mekem ol gudfala joes taem ol pipol raon long yumi oli no stap mekem.”
Hunter i pulum longfala win. Hem i glad se hem i mekem raet joes, be yet hem i no filim gud.
“?Yu wantem gobak long haos?” Mama i askem.
Hunter i tingting long hem. “No yet,” hem i talem. Hem i lukluk antap long wan nara grup blong ol pikinini we oli stap pleplei long sip laen. “Bae mi go long we.”
Taem hem i stap wokbaot i go, wan long ol boe ia i saksakem han long hem. “Halo, mi mi David.”
“Mi mi Hunter. ?Mi save jiam wetem yu?”
“!Yes!”
Hunter i traem wan raon long sip laen mo i filim win i fas long hem. Taem hem i stap pleplei wetem David wetem ol narawan, hem i filim se hem i spid mo laet bakegen. Hem i bin mekem wanem we i raet, nomata we i bin had. Hem i glad se hem i bin mekem wan gudfala joes.
Ol pikja i kam long Shawna J. C. Tenney