“Wan Spesel Presen,” Fren, Ogis 2023, 18–19.
Wan Spesel Presen
“Hemia i mas Tabu Spirit ia,” Mehrimah i tingting.
Stori ia i hapen long Franis.
“!Mehrimah! !Fatima! “Ol misinari oli kam” mama i singaot.
Mehrimah i sarem buk blong ol skripja stori blong hem mo i ron i go long salon. Ol misinari oli bin stap tijim famli blong olgeta abaot Jisas Kraes. Mehrimah mo famli blong hem bae oli baptaes i no long taem. !Hem i no save wet!
Mehrimah i sidaon wetem famli blong hem.
“Tedei bae yumi tokbaot Tabu Spirit,” Elda Moea’i i talem. “Hem i helpem yumi blong filim pis mo kamfot we i kam long Papa long Heven.”
“Hem i leftemap tingting blong yumi tu blong mekem ol gudfala samting,” Elda Campbell i joenem. “Mo i helpem yumi blong save wanem i tru. Maet yu bin filim Tabu Spirit finis bifo.”
Mehrimah i tingbaot taem hem i bin lanem abaot Buk blong Momon. Hem i bin filim pis mo hapi. Hemia i olsem wanem hem i bin save se i tru. ?Hemia nao Tabu Spirit?
“Afta we yu kasem baptaes, bae oli givim presen we i Tabu Spirit,” Elda Moea’i i talem. “Hemia i minim se Hem i save stap oltaem wetem yu blong helpem yu mo lidim yu.”
“Long wik ia, wajem gud ol tingting mo filing blong yu,” Elda Campbell i talem. “Lukaotem ol taem we Tabu Spirit i stap toktok long yu.”
Long naet ia long taem blong famli prea, Mehrimah i luksave olsem wanem hem i bin filim insaed long hem. Hem i filim kwaet mo pis. I kolosap olsem se wan man i stap haggem hem strong. Hemia i mas Tabu Spirit ia, hem i tingting.
Long jos long Sandei, Mehrimah i lisin long wan singsing abaot Jisas Kraes. Hem i filim hapi. I mekem hem i wantem blong helpem ol nara man. Hemia i mas Tabu Spirit tu ia, hem i tingting.
Bifo hem i go silip, Mehrimah i ridim buk blong ol skripja stori blong hem. Sista blong hem Fatima, i askem sapos hem i save rid smol tu. Mehrimah i talem no.
Mehrimah i gohed blong stap rid. Be hem i filim nogud from hem i no serem buk.
“Mi sori,” hem i talem long Fatima. “?Yu wantem yumitu rid tugeta?”
Fatima i sidaon narasaed long hem. Tufala i gat wanwan janis blong rid. Mehrimah i filim wom mo hapi insaed. Hemia i mas Tabu Spirit ia, hem i tingting.
Long en, dei blong baptaes blong olgeta i kam. Mehrimah mo famli blong hem i go long Jos bilding mo jenis i go long ol waet klos.
Oli baptaesem Mehrimah faswan. Wota i kolkol, be hem i glad blong mekem wan kavenan wetem Papa long Heven. Mama i putum wan tawel raon long hem. Afta hem i wajem Mama, Papa, mo Fatima oli kasem baptaes.
Mehrimah i jenis i gobak long ol drae klos blong hem. Naoia i taem blong oli konfemem hem.
Ol misinari oli putum han antap long hed blong Mehrimah. “Mifala i konfemem yu i kam wan memba blong Jos Ia blong Jisas Kraes blong Ol Lata-dei Sent,” Elda Campbell i talem, “ mo talem long yu: kasem Tabu Spirit.” Mehrimah i filim wom long ful bodi blong hem taem hem i lisin long ful blesing ia.
Afta we oli konfemem Mehrimah, Mama i haggem hem. “?Yu filim olsem wanem?”
“Gud tumas,” Mehrimah i talem. “Afta we oli putum ol han blong olgeta long hed blong mi, mi filim wan samting, mo i filim olsem pis.” Hem i smael. “Mi filim olsem wan man i stap talem long mi blong laef long wan gudfala laef, blong helpem ol pipol, mo blong obei long ol komanmen.”
“?Yu save wanem yu bin stap filim?” Mama i askem.
“Yes, mi save,” Mehrimah talem we oli ae blong hem oli stap saen. “!Hemia i bin Tabu Spirit!”
Ol pikja droing oli kam long Alyssa Petersen