“Wan Famli Stori Aktiviti,” Fren, Ogis 2023, 30–31.
Wan Famli Stori Aktiviti
“?Yu save talem wan nara famli stori long mi?” Lorrain i askem.
Stori ia i bin tekem ples long Vanuatu.
Lorrain i smael taem hem i singsing ol las toktok blong singsing ia. Oli jes finisim singsing taem long Praemeri. Naoia i taem blong go long klas.
Be faswan, Sista Taleo i stanap. “Mi wantem talem long yufala abaot wan Praemeri aktiviti we bae i hapen i no long taem,” hem i talem. “Mifala i wantem wanwan long yufala blong lanem abaot famli blong yufala. Askem ol mama mo papa blong yufala abaot ol stori blong famli. Afta, long taem blong aktiviti, wanwan long yufala i save serem wanem yufala i bin lanem.”
Taem Lorrain i kambak long haos, hem i hapi tumas. Hem i faenem wan bigfala pis pepa mo i karem i go long tebol. !Hem i no save wet blong lanem abaot famli blong hem!
Lorrain i droem wan famli tri long pepa. Mama mo Papa i helpem hem blong spelem evri nem. Afta hem i glu ol pikja blong ol memba blong famli blong hem long posta.
“Nem blong bigfala-bubu woman blong yu i Lorrain tu,” Mama i talem. “Mifala i putum nem blong yu afta long hem.”
“Wao,” Lorrain i talem.
“Apu Lorrain i wan woman we i gat fulap lav.” Mama i smael. “Taem ol nara pipol long vilej oli nomo gat wud blong mekem faea blong olgeta, Apu Lorrain bae i serem faea wud wetem olgeta.”
!Blong stap lanem abaot famli blong hem i wan gud taem! “?Yu save talem wan nara famli stori long mi?” Lorrain i askem.
“Papa i save talem long yu abaot fas taem we hem i go long tempol,” Mama i talem. “Hem i gat sikis yia nomo. Hem mo papa mo mama blong hem oli travel longwe blong go long tempol long Niu Silan.”
Lorrain i laekem tumas blong harem abaot tempol. “!Talem stori ia long mi Papa!” hem i talem.
“Faswan, mifala i jiam long wan plen mo flae i go long Nius Silan. Afta mifala i ron long wan bas. Hem i wan longfala wokbaot.” Papa i soem wan pikja blong tempol long Lorrain. “Afta, papa mo mama blong mi mo mi, i go insaed. Mifala i sil olsem wan famli. !Hemia i minim se mifala i stap tugeta blong oltaem!”
Hemia i mekem Lorrain i filim wom insaed. Hem i glad se hem i save harem ol stori abaot famli blong hem.
Afta, moning blong Praemeri aktiviti i kam. Lorrain i helpem Mama mo Sista Taleo blong redi long evri samting insaed long jos bilding.
Afta oli harem wan naesfala nius. !Bae oli bildim wan tempol long aelan blong olgeta!
Lorrain i glad tumas. Taem hem i olfala inaf blong go insaed long tempol, !bae hem i no nid blong travel longwe nating!
Long naet ia, evri fren blong Lorrain oli kam long Praemeri aktiviti ia. Ol pikinini oli tekem taem wan afta long wan, blong serem wanem oli bin lanem abaot famli blong olgeta. Taem we hem i taem blong Lorrain, hem i soem posta blong famli tri blong hem.
“Mi bin laekem tumas blong lanem abaot famli blong mi,” hem i talem. “Mi lanem se oli putum nem blong mi afta long bigfala-bubu woman blong mi. Mi lanem tu abaot fas taem we famli blong mi i go long tempol. Tempol i save helpem ol famli blong yumi blong stap tugeta blong oltaem.” Wom filing ia i kam bak. “Mi hapi tumas se bae yumi gat wan tempol long ples ia long Vanuatu.”
Lorrain i sidaon wetem wan bigfala smael long fes blong hem. Hem i talem tangkyu se hem i save gro moa olsem Jisas. !Mo hem i talem tangkyu from tempol! Hem i no save wet blong go insaed sam dei.
Ol pikja droing oli kam long Emily Davis