“Wota Botel We I Brok,” Fren, Ogis 2023, pej–pej.
Wota Botel We I Brok
Kadie i tosta. ?Sophia i save help olsem wanem?
Stori ia i tekem ples long Siera Leone.
Sophia i lisingud taem tija blong hem i stap eksplenem matematik problem long blakbod.
“So, ?wanem i naen taem long fo?” tija i askem.
Sophia i leftemap han blong hem. “!Teti-sikis!” hem i talem.
Tija blong hem i smael. “!Hemia i raet, Sophia!”
Afta long klas, hem i taem blong gobak long haos. Sophia i wokbaot wetem ol fren blong hem. Olgeta evriwan oli karemaot ol wota botel blong olgeta blong dring laslas wota blong olgeta. !Tedei i bin hot!
Be Sophia i luk wan samting we i no nomol. Fren blong hem Kadie i no stap dring wota. Hem i stap wokbaot kwaet nomo i go.
“Kadie, ?wehem wota botel blong yu?” Sophia i askem. Oltaem evriwan i wantem dring wota taem skul i finis.
“Mi brekem yestedei, mo mi no save karem wan niu wan,” Kadie i talem. “Mekem se naoia mi no save karem wota i kam long skul.”
Sophia i lukluk daon long wota botel blong hemwan. !Hem i wantem tumas blong serem! Be wota blong hem i finis evriwan.
Fuldei Sophia i tingbaot Kadie wetem wota botel blong hem we i brok. Hem i no isi blong karem klin wota long ples we oli stap laef long hem. Plante pikinini oli gat wan wota botel nomo blong yusum long ful yia. Oli stap fulumap long wan bigfala kontena blong klin wota long haos. Yu save sik sapos yu stap dring wota long wan nara ples. Sapos Kadie i nogat wan wota botel, bae hem i no save tekem wota long haos blong dring long skul.
Long nekis moning, Sophia i tingting long olsem wanem hem i save helpem Kadie. Famli blong Sophia oli gat sam plastik botel we i fulap long wota. Hem i fulumap wan long skul bag blong hem wetem aean botel blong hem. Hemia i mekem basket blong hem i hevi moa, be hem i no wari long hem.
Taem hem i kasem skul, hem i faenem Kadie.
“Kadie, ?yu karem wan niu wota botel finis?” Sophia i askem.
Kadie i seksekem hed blong hem, mo i lukluk daon.
“I Oraet,” Sophia i talem. “!Mi gat wan blong yu!”
Hem i givim wota botel ia long Kadie. Kadie i smael.
“!Tangkyu, Sophia!” Kadie i givim wan bigfala hag long fren blong hem.
Long taem blong klas, Kadie i dring wota long wota botel blong hem wetem ol nara pikinini. Sophia i glad blong luk fren blong hem we i no tosta.
Evri dei long wik ia, Sophia i karem wan ekstra wota botel blong fren blong hem. Afta long wan moning, mama blong Sophia i pikimap basket blong Sophia.
“Mmm,” Mama i talem. “Basket ia i hevi bitim oltaem.” Hem i openem basket mo i pulumaot ekstra wota botel ia.
“?Yu minim blong fulumap ekstra wota botel ia blong skul, Sophia?” Mama i askem.
Sophia i saksakem hed blong agri. “Wota botel blong Kadie i brok, mo hem i no save karem wan narawan. Mekem se hem i nogat wota long skul.”
“?Hamas taem nao yu bin stap karem ekstra wota blong hem?” Mama i askem.
“Long wik ia nomo,” Sophia i talem. “Mi no wantem Kadie blong i tosta.”
Mama i smael. “Hemia wan kaen fasin we yu gat blong tingbaot fren blong yu. Hemia i wan samting we bae Jisas i mekem. Mi hapi blong yu stap traem blong stap olsem Jisas.” Hem i haggem Sophia. “Mo mi ting se mi save wan nara wei we yumitu save help.”
Mama i givim wan aean wota botel long Sophia. “Givim hemia long fren blong yu blong mekem se hem i save stap yusum bakegen. Olsem ia, yu no nid blong karem wan plastik wan evri dei.”
“?Tru?” Sophia i askem.
Mama i sakem hed blong hem blong agri. “Yes. Jes askem hem blong i lukaotem gud.”
Sophia i karem wota botel ia i go long skul. Fas samting we hem i mekem, hem i givim botel ia long Kadie.
“Wao,” Kadie i talem. “!Tangkyu, Sophia!” Kadie i haggem hem.
Sophia i filim wom insaed. Hem i save se hem i bin helpem fren blong hem, semmak olsem we bae Jisas i mekem.
Ol pikja droing oli kam long Melissa Kashiwagi