“Stap Lisin long Tabu Spirit,” Fren, Ogis 2023, 21.
Stap Lisin long Tabu Spirit
Pikja droing i kam long Xavier Bonet
Las sama, famli blong mi i bin mekem wan longfala wokbaot. Rod ia i lidim mifala i go long wan wota. Bigfala sista blong mi, smol brata blong mi, mo mi, i karemaot ol sus blong mifala mo wokbaot i go long wota.
Taem wota i bitim ni blong mi smol, mifala i stop. Mifala i luk wan grup blong ol bigfala pikinini oli stap pleplei long wota we i moa dip saed antap. Sista blong mi i smael mo i talem, “!Yumi sud go dip moa!”
Be wan voes insaed long hed blong mi i talem long mi blong stap nomo wetem smol brata blong mi. Mi save se Hem i Tabu Spirit. Mi talem long sista blong mi se hem i save go lukluk, be smol brata blong mi mo mi bae i stap nomo.
Taem sista blong mi i kambak, hem i talem se wota i raf we afta i hadwok blong wokbaot long hem. Taem hem i talem hemia, mi save se mi bin mekem raet joes blong stap sef wetem smol brata blong mi.