Soccer ug ang Igpapahulay
Kini nga istorya nahitabo sa Honduras.
“Sabado adlawng gigahin. Para makaandam sa Dominggo” (Songbook sa mga Bata, 105).
Ang Sabado ni Samuel nakapalisod sa iyang Dominggo.
Ganahan motan-aw og telebisyon si Samuel uban ni Papá, ilabi na sa matag Sabado. Mitrabaho og maayo si Papá sa tibuok semana. Apan sa Sabado, nagluto si Mamá og pastelitos de piña (empanada nga pinya ang sulod) ug silang tanan magkaubang mitan-aw og TV.
Usa ka Sabado sa gabii, nakahukom sila nga motan-aw og partido de fútbol (dula sa soccer). Apan dugay nagsugod ang dula, ug dugay kining mahuman. Sa dihang nahuman na ang unang hugna sa dula, ang eskor 0-0. Gusto ni Samuel nga mopadayon og tan-aw. Apan nagsige na siya og panghuy-ab.
“Oras na para matulog, Samuelito,” malumong miingon si Mamá. “Kinahanglan na kang matulog aron dili ka dukaon sa simbahan ugma.”
“Pero Ma,” miingon si Samuel. “Kini mao ang duha sa labing maayong mga grupo sa Honduras!”
Gitan-aw ni Papá ang orasan. “Sige. Makapadayon ka sa pagtan-aw. Apan kinahanglan kang mobangon sa hustong oras ugma.”
Ang dula nahimong mas makapahinam sa ikaduhang hugna. Wala na magduka si Samuel karon! Siya ug si Papá parehong nag-abiba. Una dihay usa ka pagpatid sa kilid. Unya ang tigbantay nakahimo og maayo kaayo nga depensa. Nakapuntos ang usa ka grupo, ug dayon ang lain. Wala lang mahibaloi ni Samuel, ang dula nahuman na. Natapos kini nga igwalis sa 1-1.
Pagkasunod buntag, gikapoy og maayo si Samuel nga dili siya gusto nga mobangon sa higdaanan. Apan nasayod siya nga ang pagsimba importante.
Atol sa miting sa sakramento, nagsugod na sa pagkatulog si Samuel. Nagsige na og yango-yango ang iyang ulo. Gikuhit siya ni Mamá aron sa pagtabang kaniya nga magpabiling magmata. Apan gikapoy siya og maayo nga wala na siya maminaw sa mga mamumulong. “Nagtuo ko nga ang imong Sabado nakapalisod sa imong Dominggo,” miingon si Papá.
Sa Primary, ang magtutudlo ni Samuel naghisgot mahitungod sa pagbalaan sa adlaw nga Igpapahulay. Nangutana siya unsay mahimong buhaton sa mga bata sa paghimo sa Dominggo nga espesyal. Naghunahuna si Samuel sa makadiyot. Dayon miingon siya, “Matulog sa hustong oras sa Sabado!”
Sa dihang nauli na sila human sa pagsimba, nakig-istorya si Samuel kang Mamá ug Papá. “Nalingaw ko sa pagtan-aw sa dula gabii,” miingon si Samuel. “Apan natulog unta ko og mas sayo. Nagtuo ko nga kinahanglang mogamit kita og bahin sa Sabado aron sa pagpangandam alang sa Dominggo.”
“Uyon ko,” miingon si Papá.
Mitando si Mamá. “Ako sab.”
Pagkasunod Sabado, dihay laing dula sa TV.
“Unsay buhaton nato karong gabii?” Nangutana si Papá. “Dugay na pod magsugod ang dula.”
“Manan-aw na lang hinoon kita og salida,” miingon si Mamá.
“O maglakaw-lakaw kita,” miingon si Samuel.
“OK ra ba nimo ang maglakaw-lakaw?” Nangutana si Papá kang Mamá.
“Siyempre,” miingon si Mamá. “Nindot gayod nga mag-uban isip usa ka pamilya.”
“Ug kon kita mauli na sa panimalay,” miingon si Samuel, “kitang tanan makatulog og maayo. Dayon kita maandam alang sa Dominggo!”