Usa ka Korona alang sa Adlawng Natawhan
Ang tagsulat nagpuyo sa Colorado, USA.
“Nauli na ko!” Mipahibalo si Papa. Sayo siyang nauli tungod sa adlawng natawhan ni Wyatt. Magsingko anyos na si Wyatt karong adlawa!
Midagan si Wyatt ngadto niya. Gigakos siya ni Papa. “Human sa paniudto, ikaw ug ako moadto sa parke,” miingon si Papa.
“Kita lang?” Nangutana si Wyatt. Gihigugma niya ang iyang mama ug ang iyang manghud nga babaye, si Maria, apan usahay gusto siya nga mobuhat og mga butang uban lang ni Papa.
“Kita lang,” miingon si Papa.
Si Mama nagluto og paniudto nga anaa ang tanang paborito ni Wyatt. Naghimo usab siya og korona nga ginama sa bulawan nga papel ug gilak-gilak.
“Para ba na nako?” Nangutana si Wyatt, nga misiga ang mga mata.
“Imoha kini,” miingon si Mama.
Usa kadto ka espesyal nga adlawng natawhan!
Gisul-ob ni Wyatt ang korona paingon sa parke. Nagsige kini og dailos gikan sa iyang ulo, apan wala siya manumbaling. “Papa, ang akong korona alang sa adlawng natawhan nakapahimo ba nako nga espesyal?” nangutana siya.
Mipahiyom si Papa. “Ang usa ka korona alang sa adlawng natawhan makalingaw, apan dili kini ang nakapahimo nimo nga espesyal. Espesyal ka tungod kay ikaw usa ka anak sa Dios! Ug mao usab ang tanan. Nagpasabut kana nga ang tanan espesyal usab.”
Si Papa ug si Wyatt midula sa dulaanan. Si Wyatt mipadailos sa dailosanan [slide].
“Pwede kaha ko nga mopadailos usab?” Nangutana si Papa.
Miagik-ik si Wyatt. “Dako naman kaayo ka.”
Misaka si Wyatt sa hagdan ug mipadailos na usab sa dailosanan. Ang usa ka batang babaye diha sa iyang atubangan. Nahadlok siya nga mopadailos. Naghunahuna si Wyatt kon unsa ka espesyal ang tanan ngadto sa Langitnong Amahan.
“Makahimo ka!” miingon siya.
Mipadailos siya sa dailosanan. Mao usab si Wyatt.
“Maayo kaayo!” Miingon si Wyatt. Mipahiyom ang batang babaye ngadto niya, ug mibawos pud siya og pahiyom.
Ang pagkamabination nakapalipay ni Wyatt! Nasayod siya nga ang tanan espesyal, aduna man silay usa ka korona alang sa adlawng natawhan o wala.