Ang Pamilya ni Charlotte
“Usahay kon mokanta kami og ‘Mga Pamilya Mahimong Manag-uban sa Hangtud,’ naghunahuna ko nga, ‘Gawas lang sa akong pamilya.’”
Gisampong ni Charlotte ang iyang mga tudlo sa iyang mga dunggan. Ang panahon sa pagpanganta sa kasagaran mao ang iyang paboritong bahin sa Primary. Apan karon dili siya gusto nga makadungog sa mga kanta nga ilang gikanta. Mihangyo siya kon mahimo ba siya nga molingkod na lang sa hawanan.
Mitan-aw siya sa berde nga karpet, naningkamot nga dili mohilak. Wala kini magsilbi.
Adunay tawo nga mitupad kaniya. Gipahiran dayon ni Charlotte ang iyang mga luha ug mihangad.
Si Sister Henry kadto. “Unsay problema?” nangutana siya.
Nanglad-ok si Charlotte. “Kadtong mga kanta mahitungod sa malipayong mga pamilya ug pagpanag-uban hangtud sa kahangturan,” miingon siya nga hilum.
“Aw. Mao ba diay.” Milingkod si Sister Henry tupad ni Charlotte.
Pipila ka bulan ang milabay, ang mga ginikanan ni Charlotte mipatawag og usa ka miting sa pamilya. Mipasabut si Papa nga siya mobalhin.
“Morag ingon kini og magdiborsyo kamo?” Si Charlotte nangutana.
“Dili morag,” miingon si Mama. “Kami nahigugma kaninyo, apan oo, magdiborsyo kami.”
Nahinumdoman ni Charlotte ang iyang gibati nga namugnaw ang iyang panit ug nanginit sa samang higayon. Dayon ang tanan niyang gibati miulbo! Kahadlok, kasuko, kalibug, ug tumang kaguol—ang matang nga makapaluya nimo.
Ingon gihapon niana ang iyang bation usahay. Sama sa higayon nga si Mama ug Papa naglingkod nga nag-atbang sa pool atol sa iyang mga kompetisyon sa langoy. O kon ang iyang manghud nga lalaki mohilak nga mangita ni Mama kon sila adto mopuyo sa balay ni Papa.
O kon sila mokanta mahitungod sa mga pamilya diha sa Primary.
“Sa dihang ang akong mga ginikanan nagdiborsyo, mibati ko nga gisumbag ko og tawo diha sa akong tiyan,” miingon si Sister Henry. “Sa makadaghan.”
Nasurprisa si Charlotte. “Imong mga ginikanan nagdiborsyo usab?”
Mitando si Sister Henry. “Nagdiborsyo sila sa dihang ako anaa pa sa imong pangidaron.”
Mitan-aw si Charlotte sa iyang mga kamot. “Usahay kon mokanta kami og ‘Mga Pamilya Mahimong Manag-uban sa Hangtud,’ naghunahuna ko nga, ‘Gawas lang sa akong pamilya.’” Iyang gihugtan sa pagpiyong ang iyang mga mata. “Maglagot kaayo ko. Ug dili kana maayo, dili ba?”
Milingo-lingo si Sister Henry. “Dili. Sa una lain akong bation sa higayon nga makakita ko og mga bata nga uban sa ilang duha ka ginikanan.”
“Oo!” Miingon si Charlotte. “Mura sila og anaa sa usa ka pundok sa malipayon nga pamilya, ug ako dili. Lahi na ang tanang butang karon.”
“Normal lang nga mobati og kasuko, kasubo, o kahadlok sa karon—bisan unsa pa man ang imong gibati,” miingon si Sister Henry. “Ang diborsyo lisod. Apan ako mosaad nga mas moarang-arang ang imong pamati. Ang imong pamilya imoha gihapon nga pamilya, bisan kon kini lahi na karon. Kini nakatabang kanako nga mahinumdom nga ang akong mga ginikanan nahigugma gihapon kanako, ug mohigugma kanako sa tibuok kahangturan.”
Mipahiyom si Charlotte. Ganahan siya ni Sister Henry.
Si Sister Henry misandig paduol kang Charlotte. “Apan nasayud ka ba kon unsa ang nakatabang gayod nako?” mihunghong siya.
“Unsa man?” Mibawos usab si Charlotte sa paghunghong.
“Akong nakat-unan nga aduna gihapon koy hingpit, malipayon nga pamilya,” miingon si Sister Henry. “Ug mao usab ikaw. Kitang tanan aduna, bisan unsa pa ang atong yutan-ong pamilya sa pagkakaron.”
Mingislo si Charlotte sa iyang ilong. “Unsaon man?”
“Aw, ang atong mga pamilya dili hingpit, apan hingpit ang atong langitnong pamilya. Busa bisan unsa pay mahitabo, kita adunay langitnong mga ginikanan kinsa nahigugma kanato ug usa ka talagsaon nga langitnong panimalay nga naghulat kanato.”
Sa dihang si Charlotte naghunahuna niana, mibati siya og diyutayng kamalaumon. Naghunahuna siya kon sama sa unsa kaha kini nga usa ka adlaw makita na niya pag-usab ang iyang langitnong mga ginikanan.
“Tingali kon manganta kita mahitungod sa mga pamilya, maghunahuna ko kabahin sa akong langitnong pamilya,” miingon si Charlotte. Mitando si Sister Henry.
Aduna pay usa ka pangutana si Charlotte. “Mura ba ko og naghilak tan-awon?”
“Dili gayod bisan gamay,” miingon si Sister Henry.
Mitindog si Charlotte. “Kon mao basin andam na ko sa pagkanta.”