ជូនចំពោះមិត្តទាំងឡាយ
នៅថ្ងៃអាទិត្យទំនុកតម្កើង ( ថ្ងៃអាទិត្យមុនថ្ងៃអាទិត្យបុណ្យអ៊ីស្ទើរ ) ឆ្នាំនេះ គឺប៉ះចំថ្ងៃអាទិត្យចុងក្រោយក្នុងខែមីនា ។ នោះគឺជាពេលដែលយើងប្រារព្ធថ្ងៃដែលព្រះយេស៊ូវបានគង់លើលាចូលទៅក្នុងទីក្រុងយេរូសាឡិម ។ ប្រជាជនបានបក់ស្លឹកត្នោត ហើយបានស្រែកថា « ហូសាណា ! » ពីរបីថ្ងៃក្រោយមក ព្រះយេស៊ូវបានរងទុក្ខ និងបានសុគតសម្រាប់យើង ។ បន្ទាប់មក ទ្រង់បានមានព្រះជន្មរស់ឡើងវិញ ! យើងសង្ឃឹមថា អ្នកនឹងរីករាយជាមួយពេលវេលាដ៏ពិសេសនេះ ដើម្បីចងចាំអ្វីដែលព្រះវរបិតាសួគ៌ និងព្រះយេស៊ូវបានធ្វើសម្រាប់យើង ( សូមមើល យ៉ូហាន ៣:១៦ ) ។ ដោយសារពួកទ្រង់ នោះយើងនឹងរស់ម្ដងទៀត !
ដោយក្តីស្រឡាញ់
ទស្សនាវដ្តី ប្រិយមិត្ត
បន្ថែម តើមានប៉ុន្មានទំព័រអំពីព្រះយេស៊ូវដែលអ្នកអាចរកឃើញនៅក្នុងច្បាប់នេះ ?
សង់សំពៅរបស់អ្នកផ្ទាល់
ខ្ញុំបានរៀនពីរបៀបដែលនីហ្វៃបានសង់សំពៅមួយ ( ខែ កុម្ភៈ ឆ្នាំ ២០២០ ) ដូច្នេះ ខ្ញុំចង់សង់សំពៅមួយរបស់ខ្ញុំដែរ ដើម្បីយល់ពីអារម្មណ៍របស់នីហ្វៃ ។ ពីដំបូងវាពិបាក ប៉ុន្តែខ្ញុំបានរៀនមិនបោះបង់ និងទុកចិត្តលើព្រះអម្ចាស់ដូចជានីហ្វៃបានធ្វើ ។
អៀន ឌី អាយុ ៩ ឆ្នាំ វឺរ៉ាគ្រូស្ស ម៉ិកស៊ីកូ
កន្លែងដែលយើងអានទស្សនាវដ្តី ប្រិយមិត្ត
យើងចូលចិត្តអានទស្សនាវដ្តីប្រិយមិត្ត ! វាជួយយើងឲ្យមានអារម្មណ៍មិនសូវឯកោ ដោយសារមានតែយើងប៉ុណ្ណោះដែលជាសមាជិកសាសនាចក្រនៅក្នុងទីក្រុងយើង ។ យើងអានវាជាភាសាអាល្លឺម៉ង់ និងជាភាសាហូឡង់ ដោយសារម៉ាក់យើងមកពីប្រទេសហូឡង់ ហើយប៉ាយើងមកពីប្រទេសអាល្លឺម៉ង់ ។
ឡាស និងថូបិន អេស អាយុ ៥ និង ៣ ឆ្នាំ ទីក្រុង ឡូវ័រ សាហ្សូនី ប្រទេស អាល្លឺម៉ង់
យើងចូលចិត្តមើលព្រះវិហារបរិសុទ្ធ
យើងរស់នៅជិតព្រះវិហារបរិសុទ្ធបារ៉ានហ្គីលឡាកូឡុំប៊ី ហើយទៅព្រះវិហារបរិសុទ្ធរៀងរាល់ពីរសប្ដាហ៍ម្ដង ។ វាជួយយើងឲ្យចងចាំពីសេចក្ដីសញ្ញាទាំងឡាយដែលយើងនឹងធ្វើជាមួយព្រះវរបិតាសួគ៌ ។
ថ្នាក់បឋមសិក្សាសាខាភើតូកូឡុំប៊ី ប្រទេស កូឡុំប៊ី