Io Ena Kaukauwa Sara Kina Ko Koya

Au vakila noqu kalougata niu tiko ena soqoni oqo vata kei ira era taura tu na matabete ni Kalou. Na yalodina, na vakabauta, kei na nodra veiqaravi lomasoli na isoqosoqo ni turaga kei na cauravou sa cakamana ni gauna vou oqo. Au vosa tiko ena bogi nikua vei ira na lewe ni matabete, qase cake kei na gone sobu, era sa duavata ena veiqaravi e yalodra taucoko vua na Turaga o Jisu Karisito.

Sa solia na Turaga na Nona kaukauwa vei ira taucoko na vakaitutu ena matabete era kilikili kaya mera veiqaravi ena nodra ilesilesi ni matabete.

E vakamacalataka kina o Wilford Woodruff, ni se Peresitedi ni Lotu, na ka a sotava ena itutu ni matabete:

“Au a rogoca na imatai ni vunau au se qai rogoca vakadua ena Lotu oqo. Ena siga e tarava au a papitaiso. … au sa tabaki sara meu iVakavuvuli. Sa tekivu sara ga e kea na noqu ilesilesi. … Au vakayacora taucoko na noqu ilesilesi vaka-iVakavuvuli. .… Ena koniferedi au a tabaki meu Bete. … Ni oti noqu tabaki meu Bete au a vakau sara … meu laki kaulotu ki na ceva ni vanua. O ya ena gauna ni vula ikelikeli ni 1834. Au a lako vata kei na dua na itokani, ka keirau tekivu lako ni sega na baosi se ilavo. Au a lakova duadua e levu sara na maile ka vunautaka yani na Kosipeli, kau papitaisotaka e dua na iwiliwili tamata au sega ni vakadeitaki ira rawa ena Lotu, baleta niu se Bete tiko ga. … A balavu sara na noqu lako ka vunautaka na Kosipeli ni bera niu tabaki meu iTalatala Qase. …

“[Ia oqo] Sa mai yabaki limasagavulu ka va na yabaki noqu lewena tiko na iApositolo Le Tinikarua. Au sa dau gole vata kei ira kei na kuoramu eso ka sa onosagavulu na yabaki; kau gadreva meu kaya ki na ivavakoso oqo niu a tokoni sara ena kaukauwa ni Kalou niu a se taura tu na itutu ni iVakavuvuli, ka vakabibi noqu qarava na ilesilesi ena tabaniwere niu a Bete tiko, me vakaga niu dua na iApositolo. E sega na duidui ena ka oqo ia meda cakava ga na noda ilesilesi.”¹

Na madigi totoka vakayalo o ya ni sega na kena duidui e tukuni tiko ena ivakamacala ni Turaga baleta na Matabete i Eroni sa “kilikili talega me tu” ki na Matabete i Melikiseteki.² Na vosa kilikili talega me tu e kena ibalebale ni sa sema oi rau oqo. Na isema oqo sa ka bibi ki na matabete me yaco edua na kaukauwa ka veivakalougatataki e rawata rawa, ena vuravura oqo me tawamudu, ni “a sega ni tubu ka na sega ni mudu.”³

Na isema oqo e rawarawa tu ga. Ena veivakarautaki na Matabete i Eroni vei ira na cauravou ki na dua na ilesilesi tabu e cecere cake.

“Raica sa tu na kaukauwa kei na lewa ki na ilesilesi torocake, se matabete vaka-Melikiseteki; io sa lewa na veivakalougatataki kei na cakacaka vakayalo e na lotu—

“Io me kila na veika vuni ni matanitu vakalomalagi, raica ena wase rua vei ira ko lomalagi ka ra na veikilai kei ira na nona isoqosoqo lewe ni Lotu na Ulumatua, io era na vakalougatataki e na nona iserau na Kalou ko Tamada kei Jisu na Dautataro ni veiyalayalati vou.”⁴

Na idola ni matabete oqori sa taura tu na kena lewa taucoko e dua ga na tamata ena dua ga na gauna, o ya na Peresitedi ka bete levu vakatulewa ni Lotu ni Turaga. Ena nona veilesi o Peresitedi, o ira kece na lewe ni Matabete i Melikiseteki sa rawa mera vakaisolisoli ena lewa kei na madigi me vosa ka cakacaka ena yaca ni Kalou Cecere. Sa tawayalani na kaukauwa oqo. Sa baleta tiko na bula kei na mate, na matavuvale kei na Lotu, kei na ivakarau cecere ni Kalou Vakaikoya kei na Nona cakacaka tawamudu.

Na Turaga sa vakarautaki ira tiko na lewe ni Matabete i Eroni mera laki italatala qase ka veiqaravi ena vakabauta, kaukauwa, kei na vakavinavinaka ena Matabete i Melikiseteki lagilagi o ya.

Vei ira na italatala qase, ena ka bibi na nomuni vakavinavinaka titobu tiko ki na nomuni cakava na nomuni itavi ena veiqaravi ni matabete sa taucoko. Ko ni na nanuma lesu nomuni gauna ko ni a dikoni, ivakavuvuli, se bete tu kina ena gauna era a dodoliga yani vei kemuni o ira na matabete cecere cake mera laveta ka vakayaloqaqataki kemuni ena nomuni ilakolako ni matabete.

Era dauvakanananu tu vakaoqori o ira kece na lewe ni Matabete i Melikiseteki, ia na yalo ni vakavinavinaka sa vaka me yali yani ena veiyabaki. Sa noqu vakanuinui meu vakacaudreva na yalo oqori ka salavata kei na gugumatua me soli na igu taucoko ki na veivuke vata ga o a ciqoma e liu.

Au nanuma lesu e dua na bisopi a raici au me vaka ga sa tu oti vei au na gugumatua meu dua na kaukauwa ni matabete. A kacivi au ena dua na Sigatabu niu se bete tiko kina. A kaya ni gadreva meu nona itokani ni laki sikova eso na lewenilotu ena neimami tabanalevu. A kaya mai me vaka ga niu sa nona inuinui duadua ga ni kena rawati. A sega ni gadrevi au o koya. E tu e rua na nona daunivakasala totoka ena nona matabisopi.

Keirau a laki sikova e dua na vada dravudravua ka sa walokai tu. A gadreva meu vukei koya me vakauqeta na yaloi koya na vada ka solia na bolebole me cakava ka vakayagataka e dua na tuvakavakailavo, ka yalataka vua ni na gugumatua cake ka na rawa me vukei ira eso tale.

Keirau a gole ka laki vakaceguya e rua na goneyalewa lalai e rau sotava tiko e dua na bula dredre. Ni keirau sa lesu, a kaya mai vakamalua vei au, “Rau na sega vakadua ni guilecava na goneyalewa o ya na nodaru sikovi rau.”

Ena vale e tarava, au raica kina na iwalewale ni nona sureti e dua na tagane sa luluqa tu vakalotu me lesu mai vua na Turaga ena nona a vakauqeti ni ra gadrevi koya na lewe ni tabanalevu.

Na bisopi o ya a lewe ni Matabete i Melikiseteki a laveta cake tiko na noqu ivakarau ni rai ka vakaukauwataki au ena ivakaraitaki. A vakavulica me tiko vei au na kaukauwa kei na yaloqaqa meu gole ki na vanua cava ga ni veiqaravi vua na Turaga. Sa mate makawa sara ka sa taura na kena isau, ia au se nanumi koya tikoga baleta ni a dodoliga yani ka laveti au cake niu se qai lewe vou ni Matabete i Eroni. Au qai kila e muri ni sa raitayalotaki au oti ki na dua na salatu ni matabete ni siga ni mataka ni ilesilesi cecere, ka cecere cake mai na noqu rai.

A cakava talega vakaoqo vei au o tamaqu. A dua na lewe ni Matabete i Melikiseteki e bula sotava ka vuku. Dua na gauna a kerei koya e dua na iApositolo me vola vakalekaleka na ivakadinadina ni vakadidike baleta na yabaki ni bula ni vuravura oqo. A vola sara vakavinaka, ena nona kila ni so era na wilika era vakila tu vakaidina ni se gone cake sara na vuravura oqo mai na kena e tukuna tiko na vakadidike vakavuku.

Au se nanuma tikoga nona a solia mai vei au o tamaqu na ka a vola ka kaya mai vei au, “Hal, sa tu vei iko na vuku vakayalo mo kila ke sa dodonu beka meu vakauta oqo vei iratou na iapositolo kei na parofita.” Au sega ni nanuma kece na ka a volai tiko ena pepa, ia au na kauta voli kei au na noqu a vakavinavinakataka na lewe ni Matabete i Melikiseteki cecere o ya a raica vei au na vuku vakayalo kau a sega ni raica rawa.

Dua na bogi, ni oti e vica na yabaki, ni oti na noqu tabaki meu dua na iApositolo, a kacivi au na parofita ni Kalou ka kerea meu wilika e dua na ivola ka tukuna tiko na veika me baleta na vunau ni Lotu. A wilika tiko ena bogi o ya na wase ni dua na ivola. A kaya dredredre, “Au na sega ni cakava rawa kece oqo. E sega ni dodonu mo cegu tiko niu cakacaka tiko.” A qai kaya mai ena vosa e voleka ni tautauvata kei na vosa nei tamaqu ena vica na yabaki sa oti.: “Hal, o iko mo na wilika na ka oqo. O na kila ni kevaka sa dodonu me na tabaki vakaivola.”

Na iwalewale vata ga ni dua na lewe ni Matabete i Melikiseteki e laveta cake na rai ka solia na yalonuidei a yaco mai ena dua na bogi ni soqoni ni veivosaki e vakarautaka na Lotu. Niu se yabaki 17, au a kerei meu laki vosa ki na dua na ivavakoso levu. Au sega tu ni kila na cava a namaki tu vei au. A sega ni soli vei au e dua na ulutaga, kau sa mani vakarautaka e dua na vosa e uasivia cake na veika au kila tu baleta na kosipeli. Niu sa tekivu vosa, au qai kila niu sa cakava e dua na cala. Au se nanuma tikoga noqu sa vosa oti kina kau vakila niu sa cala.

E a ikarua ka iotioti ni vosa o Elder Matthew Cowley ena Kuoramu ni iApositolo Le Tinikarua. E turaga madila ena vosa—ka lomani ena loma ni Lotu. Au nanuma tiko noqu raici koya cake yani mai na noqu idabedabe volekata na itutu ni vunau.

A tekivu kaukauwa na nona vosa. A kaya ni noqu vosa sa vakila kina o koya ni sa tiko ena dua na koniferedi cecere. A kaya o ya ena matadredredre. A takali vei au na yalodruka o ya ka yaco mai na yalodei ni na rawa ni dua na siga au na vakataka na tamata e nanuma o koya niu sa vakataka oti tu.

Na vakanananu ni bogi o ya e muataki au tikoga meu vakarorogo matua ni gauna e vosa kina e dua na lewe ni Matabete i Eroni. Ena vuku ni ka a cakava vei au o Elder Cowley, au sa dau namaka niu na rogoca tiko na vosa ni Kalou. Sa lailai na noqu lomaleqa ka sa levu na noqu kurabui, kau sa dau matadredredre ga me vakataki Elder Cowley.

E vuqa na ka ena rawa me vukei ira na tacida cauravou gone mera tucake rawa ena matabete, ia ena sega ni dua na ka me na kaukauwa cake me vakataka noda vukei ira mera vakatorocaketaka na nodra vakabauta ka yalodei ni sa rawa mera taura na kaukauwa ni Kalou ena nodra veiqaravi ni matabete.

Ni na sega ni rawa me tiko ga kei ira na vakabauta kei na yalonuidei ke mera laveti ga vakadua mai vua mada ga e dua na lewe ni Matabete i Melikiseteki gugumatua vakayalo. Na kena rawati me tauri na kaukauwa oqori mena teivaki ena vuqa na ivakaraitaki ni yalonuidei mai vei ira era sa bula-kila ena matabete.

Era na gadreva talega na lewe ni Matabete i Eroni ena veisiga vakakina ena veiauwa na veivakayaloqaqataki kei na veivakadodonutaki mai vua na Turaga Vakaikoya mai vua na Yalo Tabu. Ena yaco oqo vei ira ni ra digitaka mera bula kilikili tikoga kina. Ena vakatau tiko ki na nodra digidigi era na cakava.

Oqo na vuna meda na veivakavulici ga ena ivakaraitaki kei na ivakadinadina ni sa dina sara na vosa cecere nei iliuliu ni Matabete i Melikiseteki o Tui Penijamini.⁵ Era sa vosa ni loloma era cavuti ena yaca ni Turaga o koya e nona na matabete oqo. E vakavulica o Tui Penijamini na veika sa gadrevi vei keda meda bula savasava tiko ga kina me rawa ni da vakayaloqaqataki ka vakadodonutaki mai vua na Turaga:

“Me kena iotioti, sa sega ni rawa meu tukuna yani na veika kece sa rawa mo ni valavala ca kina; raica sa vuqa sara na kena sala ka vuqa na kena ivalavala, io sa rui levu ka sega ni wili rawa.

“Ia oqo ga na noqu itatau vei kemuni; kevaka ko ni sa sega ni qarauni kemuni vinaka e na ka ko ni sa nanuma, kei na vosa ko ni sa vosataka, kei na ka ko ni sa kitaka, ka sega ni muria na vunau ni Kalou, se vakabauta tiko ga na itukutuku ni nona lako mai na noda Turaga, me yacova na nomuni mate, ko ni na rusa vakaidina. Mo ni nanuma tiko na veika oqo mo ni kakua kina ni rusa.”⁶

Eda sa kila vinaka tiko na gasau vidi ni meca ni ivalavala dodonu sa dau vukataki mai me vaka e dua na cagi laba me saqati ira na lewe ni matabete cauravou eda sa lomani ira vakalevu. Kivei keda, era sa vakataki ira na cauravou mataivalu qaqa, era vakatokai ira mera luvei Ilamani. E rawa mera tiko qaqa, me vakataki ira na cauravou mataivalu qaqa, kevaka mera taqomaki ira tiko me vakataka na nona veivunauci o Tui Penijamini vei ira mera cakava.

O ira na luvei Ilamani era a sega ni vakatitiqa. Era a vala vakayaloqaqa ka ra qaqa kina ni ra vakabauta na vosa nei tinadra.⁷ Eda sa kila vinaka tu na kaukauwa ni vakabauta ni dua na tina dauloloma. Era vakarautaka na tina na veitokoni cecere o ya kivei ira na luvedra ena siga nikua. Sa rawa vei keda na lewe ni matabete meda sa semata yani na veitokoni o ya ena noda gugumatua meda rawata noda ilesilesi me vaka ni da sa saumaki mai, meda sa qai dodoliga yani ka vaqaqacotaki ira na tacida.⁸

Sa noqu masu ni ra na ciqoma na lewe yadua ni Matabete i Melikiseteki na madigi sa solia mai na Turaga:

“Ia kevaka e dua vei kemudou sa vakasinaiti ena Yalo Tabu, me rau sala vata kei na dua sa malumalumu, me vakatataki koya vakayalo, io e na kaukauwa sara kina ko koya.

“Ia dou kauti ira sa tu e na itutu ni matabete lailai; dou talai ira yani me ra liu ka veivosakitaka na ka me vakayacori, vakarautaka na ilakolako ka matataki kemudou e na veisoqo dou sa sega ni tiko rawa kina.

“Raica sa vakaoqo na ivakarau eratou a tara cake kina na noqu lotu na noqu iapositolo e na gauna e liu.”⁹

Sa rawa vei kemuni na iliuliu ni matabete kei kemuni na tamadra na lewe ni Matabete i Eroni mo ni cakacaka mana. Sa rawa mo ni vakatawana na itutu ni italatala qase yalodina mai vei ira na cauravou era sa ciqoma na veikacivi mera vunautaka na kosipeli ka cakava ena yalodei. Ko ni na raica ni vuqa vei ira o sa laveta cake ka vakayaloqaqataka era sa yalodina mai, vakamau kilikili e valetabu, ka yaco kina mera laki laveta cake ka vakarautaki ira tale eso.

Ena sega ni yaco ena parokaramu ni itaviqaravi vou, lewe ni vuli vakatorocaketaki ni veivakavulici, se itukutuku raraba vinaka cake. Ena sega ni gadrevi kina e dua tale na veikacivi mai na kena sa tu oqo vei iko. Na bubului kei na veiyalayalati ni matabete ena solia vei iko na kaukauwa, lewa, kei na veidusimaki. Sa noqu masu ni ko na lesu i vale ka vulica vagumatua na bubului kei na veiyalayalati ni matabete, sa toqai tiko ena Vunau kei na Veiyalayalati wase 84.

Eda sa nuitaka taucoko ni na vuqa na cauravou era na sotava na veika me vakataki Wilford Woodruff, ni se lewe ni Matabete i Eroni, a vakavulica na kosipeli i Jisu Karisito ena kaukauwa ka vakavuna na saumaki.

Sa noqu masu ni da na tucake yani ki na noda veikacivi meda laveti ira cake eso mera vakarautaki ki na nodra veiqaravi lagilagi. Sa vakavinavinaka vakalevu na yaloqu taucoko vei ira na tamata totoka eso era a laveti au cake ka vakaraitaka na sala ni loloma kei na veilaveti cake.

Au vakadinadinataka ni sa taura tu o Peresitedi Thomas S. Monson na ki taucoko ni matabete e vuravura ena gauna oqo. Au vakadinadinataka ni nona bula taucoko ni veiqaravi, sa mai ivakaraitaki tiko kivei keda kece meda laveti ira cake na tamata ni da sa lewe ni Matabete i Melikiseteki. Au sa vakavinavinaka dina ena sala sa laveti au cake kina ka vakaraitaka vei au na sala a laveti au cake kina kei na sala meu laveti ira kina na tamata.

E bula tiko na Kalou na Tamada. Sai Jisu na Karisito. Oqo na Nona Lotu kei na matanitu. Oqo na Nona matabete. Au sa kila oqo vakai au ga ena kaukauwa ni Yalo Tabu. Ena yaca i Jisu Karisito, emeni.