1 Kag natabo ini nga nagpadayon si Enoc sang iya pagpamulong nga nagasiling: Tan-awa, nagpanudlo ang aton amay nga si Adan sining mga butang kag madamo ang nagpati kag nangin mga anak sang Dios, kag madamo ang wala nagpati kag napatay sa ila mga sala, kag nagapaabot nga may kahadlok, sa pag-antos sang nagakalayo nga kasingkal sang kaakig sang Dios nga igabubo sa ila.

2 Kag sumugod sa sina nga tion nagsugod si Enoc sa pagpropesiya nga nagasiling sa katawhan nga: Sang nagapanglakaton ako, kag nagatindog sa lugar nga Mahuja, kag nagtawag sa Ginuo, may nabatian ako nga tingug halin sa langit nga nagasiling—Magliso ka, kag magsaka sa bukid sang Simeon.

3 Kag natabo ini nga nagliso ako kag nagsaka sa bukid; kag sang nagatindog ako sa bukid, nakita ko nga nabuksan ang mga langit, kag nasul-oban ako sang himaya;

4 Kag nakita ko ang Ginuo; kag nagtindog sia sa akon atubang kag nakighambal sia sa akon, pareho nga ang isa ka tawo nagapakighambal sa isa sing atubangay; kag nagsiling sia sa akon: Tan-awa, kag ipakita ko sa imo ang kalibutan sa sulod sang madamo nga henerasyon.

5 Kag natabo ini nga nakita ko ang patag sang Shum, kag yari karon, madamo nga mga tawo nga nagapuyo sa mga tolda, nga amo ang katawhan sang Shum.

6 Kag sa liwat nagsiling ang Ginuo sa akon: Tan-awa; kag nagtulok ako pa-norte, kag nakita ko ang katawhan sang Canaan, nga nagapuyo sa mga tolda.

7 Kag nagsiling ang Ginuo sa akon: Magpropesiya; kag nagpropesiya ako nga nagasiling: Tan-awa ang katawhan sang Canaan nga tama kadamo, magasulong nga handa sa pagpakig-away batok sa katawhan sang Shum, kag pamatyon sila nga lubos sila nga malaglag; kag magabahin-bahin ang katawhan sang Canaan sang ila mga kaugalingon sa duta, kag mangin kaging kag di-mabungahon ang duta kag wala na sing iban nga katawhan nga magapuyo dira kundi ang katawhan sang Canaan;

8 Kay tan-awa, pagasumpaon sang Ginuo ang duta sing sobra nga init, kag ang kakaging sini magapadayon sa wala’y katapusan; kag may kaitom nga nagdapo sa tanan nga mga anak sang Canaan, nga ginkaugtan sila sang tanan nga katawhan.

9 Kag natabo ini nga nagsiling ang Ginuo sa akon: Magtulok; kag nagtulok ako, kag nakita ko ang duta sang Saron, kag ang duta sang Enoc, kag ang duta sang Omner, kag ang duta sang Heni, kag ang duta sang Sem, kag ang duta sang Haner, kag ang duta sang Hananniha, kag ang tanan nga pumuluyo sang mga ini;

10 Kag nagsiling ang Ginuo sa akon: Magkadto sa sining katawhan, kag hambala sila—Maghinulsol, indi gani magakari ako kag sakiton sila sang sumpa, kag mapatay sila.

11 Kag ginhatagan niya ako sang isa ka kasugoan nga dapat magbunyag ako sa ngalan sang Amay, kag sang Anak nga puno sang grasya kag kamatuoran, kag sang Balaan nga Espiritu, nga nagapamatuod sa Amay kag sa Anak.

12 Kag natabo ini nga nagpadayon sa pagpanawag si Enoc sa tanan nga katawhan, luwas sa katawhan sang Canaan, sa paghinulsol;

13 Kag dako katama ang pagtuo ni Enoc nga nagpanguna sia sa katawhan sang Dios, kag ang ila mga kaaway nagsulong sa pagpakig-away sa ila; kag ginhambal niya ang pulong sang Ginuo, kag nagkurog ang duta, kag nadula ang mga bukid, bisan pa suno sa iya mando; kag ang mga suba sang tubig nagliso sa ila alagyan; kag ang ngurob sang mga leon nabatian halin sa mga kamingawan; kag ginhadlokan ang tanan nga nasyon sing tuman, gamhanan katama ang mga pulong ni Enoc kag dako katama ang gahum sang mga pulong nga ginhatag sang Dios sa iya.

14 Kag may nag-ulhot man nga duta halin sa kadalumon sang dagat, kag dako katama ang kahadlok sang mga kaaway sang katawhan sang Dios nga nagpalagyo sila kag nagtindog sa malayo kag nagkadto sa duta nga nag-ulhot halin sa kadalumon sang dagat.

15 Kag ang mga higante sang duta nagtindog man sa malayo; kag may naglapnag nga sumpa sa tanan nga tawo nga nakigbato sa Dios;

16 Kag sumugod sa sina nga tion may mga giyera kag pagpaagay sang dugo sa tunga nila; apang ang Ginuo nagkari kag nagpuyo upod sa iya katawhan, kag nagpuyo sila sa pagkamatarong.

17 Ang kahadlok sa Ginuo nangin yara sa tanan nga pungsod, sa pagkadako sang himaya sang Ginuo nga nangin yara sa iya katawhan. Kag ang Ginuo nagpakamaayo sang duta, kag ginpakamaayo sila sa kabukiran, kag sa matag-as nga mga lugar, kag nag-uswag.

18 Kag gintawag sang Ginuo ang iya katawhan nga Sion, bangod isa sila sing tagipusuon kag isa sing panghunahuna kag nagpuyo sa pagkamatarong; kag wala sang imol sa tunga nila.

19 Kag nagpadayon si Enoc sa pagwali sa pagkamatarong sa katawhan sang Dios. Kag natabo ini nga sa iya mga adlaw, nagpatukod sia sang siyudad nga iya gintawag nga Siyudad sang Pagkabalaan, bisan pa ang Sion.

20 Kag natabo ini nga nakighambal si Enoc sa Ginuo; kag nagsiling sia sa Ginuo: Pat-od gid nga magapuyo ang Sion nga hilway sa katalagman sa wala’y katapusan. Apang nagsiling ang Ginuo kay Enoc: ginpakamaayo ko ang Sion apang ang nagkalabilin sang katawhan ginsumpa ko.

21 Kag natabo ini nga ginpakita sang Ginuo kay Enoc ang tanan nga pumuluyo sang duta; kag nagtan-aw sia, kag yari karon, ang Sion, sa pagligad sang panahon, ginsabnit palangit. Kag ang Ginuo nagsiling kay Enoc: Tan-awa ang akon puluy-an sa wala’y katapusan.

22 Kag nakita man ni Enoc ang nagkalabilin sang katawhan nga mga anak ni Adan; kag samo ini sang tanan nga kaliwatan ni Adan luwas sa kaliwatan ni Cain, kay itom ang kaliwatan ni Cain, kag wala sing lugar sa tunga nila.

23 Kag pagkatapos nga ginsabnit ang Sion palangit, nagtan-aw si Enoc, kag yari karon, ang tanan nga pungsod sang duta yara sa atubang niya;

24 Kag naglabay ang madamo nga henerasyon; kag si Enoc yara sa mataas kag nabayaw, bisan pa sa sabak sang Amay kag sang Anak sang Tawo; kag tan-awa, ang gahum ni Satanas yara sa bug-os nga ibabaw sang duta.

25 Kag nakita niya ang mga anghel nga nagapanaog halin sa langit; kag nakabati sia sang mabaskog nga tingug nga nagasiling: Kaluluoy, kaluluoy sang mga pumuluyo sang duta.

26 Kag nakita niya si Satanas; kag may dako sia nga kadena sa iya kamot, kag gintabunan sini sing kadulom ang bug-os nga ibabaw sang duta; kag nagtangla sia kag nagkadlaw, kag nagkasadya ang iya mga anghel.

27 Kag nakakita si Enoc sang mga anghel nga nagapanaog halin sa langit nga nagapamatuod parte sa Amay kag sa Anak; kag ang Balaan nga Espiritu nagpanaog sa madamo kag ginsabnit sila paagi sa mga gahum sang langit pakadto sa Sion.

28 Kag natabo ini nga nagtulok ang Dios sang langit sa nagkalabilin sang katawhan, kag naghibi sia; kag nagpamatuod si Enoch sini nga nagasiling: Ngaa bala nga ang kalangitan nagahibi, kag nagatulo ang ila mga luha pareho sang ulan sa kabukiran?

29 Kag nagsiling si Enoc sa Ginuo: Ngaa bala nga makahibi ka, kay balaan ka, kag halin sa bug-os nga wala’y katapusan tubtob sa bug-os nga wala’y katapusan?

30 Kag kon sarang maisip sang tawo ang pinakagagmay nga bahin nga nagahuman sang duta, huo, minilyon ka mga duta nga pareho sini, indi pa ini panugod sang kadamuon sang imo mga gintuga; kag nahumlad ang imo kurtina sa gihapon; apang yara ka, kag ang imo sabak yara dira; kag dugang pa matarong ka; maluluy-on ka kag maayo tubtob sa wala’y katapusan;

31 Kag gindala mo ang Sion sa imo kaugalingon nga sabak, halin sa tanan mo nga mga gintuga, halin sa bug-os nga wala’y katapusan tubtob sa bug-os nga wala’y katapusan; kag wala na sing iban pa kundi paghidaet, hustisya, kag kamatuoran ang sadsaran sang imo trono; kag nagauna ang kaluoy sa imo nawong kag wala sing katapusan; ngaa bala nga makahibi ka?

32 Ang Ginuo nagsiling kay Enoc: Tan-awa ining imo kauturan; mga hinimo sila sang akon kaugalingon nga mga kamot, kag ginhatagan ko sila sang ila kaalam, sa adlaw nga gintuga ko sila; kag sa Hardin sang Eden, ginhatagan ko ang tawo sang iya kahilwayan sa pagpili;

33 Kag sa imo kauturan nagsiling ako kag naghatag man ako sang kasugoan, nga dapat higugmaon nila ang isa kag isa, kag nga dapat nila ako pilion, ang ila Amay; apang tan-awa, wala sila sing gugma, kag ginakaugtan nila ang ila kaugalingon nga dugo;

34 Kag ang kalayo sang akon kaakig nagadabadaba batok sa ila; kag sa akon kasingkal mapadala ako sang mga baha sa ila, kay ang mabangis ko nga kaakig nagadabadaba batok sa ila.

35 Tan-awa, ako ang Dios; Tawo sang Pagkabalaan ang akon ngalan; Tawo sang Laygay ang akon ngalan; kag Nagapadayon kag Wala’y Katapusan man ang ngalan ko.

36 Gani, sarang ko mauntay ang akon mga kamot kag makaptan ang tanan nga gintuga nga akon nahimo; kag makalapos man ang akon mata sa ila, kag sa tanan nga hinimo sang akon mga kamot wala sing tuman kadako nga kalainan pareho sang yara sa tunga sang imo kauturan.

37 Apang, tan-awa, ang ila mga sala mangin sa mga ulo sang ila mga amay; si Satanas mangin ila amay, kag kalisud ang ila madangatan; kag magahibi ang bilog nga kalangitan para sa ila, bisan pa ang tanan nga hinimo sang akon mga kamot; gani ngaa indi maghibi ang kalangitan, kay nakakita nga magaantos sila?

38 Apang tan-awa, ining mga nakita sang imo mga mata magakalamatay sa mga baha; kag tan-awa, pagatakpan ko sila; isa ka bilanggoan ang ginhanda ko para sa ila.

39 Kag sia nga akon ginpili nagpangabay sa akon atubang. Bangod sina, magaantos sia para sa ila mga sala; kon maghinulsol sila sa adlaw nga magbalik sa akon ang akon Pinili, kag tubtob sina nga adlaw magaantos sila;

40 Gani, bangod sini ang kalangitan nagahibi, huo, kag ang tanan nga hinimo sang akon mga kamot.

41 Kag natabo ini nga ang Ginuo naghambal kay Enoc, kag nagsugid kay Enoc sang tanan nga hinimoan sang mga anak sang katawhan; gani nakahibalo si Enoc kag nagtulok sa ila mga kalainan, kag sa ila mga kalisud, kag naghibi kag nag-untay sang iya mga butkon, kag ang iya tagipusuon naghabok sing dako pareho sang wala’y katapusan; kag nagbatyag sang tuman nga kaluoy ang iya tagipusuon; kag ang bug-os nga wala’y katapusan nag-uyog.

42 Kag nakita ni Enoc si Noe, kag ang iya panimalay; nga ang kaliwat sang mga anak ni Noe maluwas sang pisikal nga kaluwasan;

43 Gani nakita ni Enoc nga nagapasad si Noe sang arko; kag nagyuhum ang Ginuo sa sini, kag nagkapot sini sa iya kaugalingon nga kamot; apang sa nagkalabilin sang mga malain nag-abot ang mga baha kag ginlamon sila.

44 Kag sang nakita ini ni Enoc, nagbatyag sia sing kapait sa iya kalag, kag naghibi para sa iya kauturan, kag nagsiling sa kalangitan: nagadumili ako nga maumpawan; apang ang Ginuo nagsiling kay Enoc: Ibayaw ang imo tagipusuon, kag magkasadya; kag magtulok.

45 Kag natabo ini nga nagtulok si Enoc: kag humalin kay Noe, nakita niya ang tanan nga panimalay sang duta; kag nagtawag sia sa Ginuo nga nagasiling: San-o bala magaabot ang adlaw sang Ginuo? San-o bala ipaagay ang dugo sang Matarong, agud nga ang tanan nga nagakalisud mapakabalaan kag makaangkon sang kabuhi nga wala’y katapusan?

46 Kag ang Ginuo nagsiling: Ini mangin sa kasagsagan sang panahon, sa mga adlaw sang kalainan kag pagtimalus.

47 Kag tan-awa, nakita ni Enoc ang adlaw sang pagkari sang Anak sang Tawo, bisan pa sa unod; kag nagkasadya ang iya kalag nga nagasiling: Gin-alsa ang Matarong, kag gin-ihaw ang Kordero halin pa sa pagtuga sang kalibutan; kag bangod sa pagtuo yara ako sa sabak sang Amay, kag tan-awa, kaupod nakon ang Sion.

48 Kag natabo ini nga nagtulok si Enoc sa duta; kag nakabati sia sang tingug halin sa kadalumon sini nga nagasiling: Kaluluoy, kaluluoy sa akon, ang iloy sang katawhan; nagakasakit ako, nagaluya ako, bangod sang kalainan sang akon mga anak. San-o bala ako makapahuway, kag matinloan sang kahigkoan nga naghalin sa akon? San-o bala magpakabalaan sa akon ang akon Tagtuga agud nga makapahuway ako kag magluntad ang pagkamatarong sa ibabaw sang duta sa pila ka tinion?

49 Kag sang nabatian ni Enoc ang duta nga nagakalisud, naghibi sia kag nagtawag sa Ginuo nga nagasiling: O Ginuo, indi mo bala pagkaluoyan ang duta? Indi mo bala pagpakamaayohon ang mga anak ni Noe?

50 Kag natabo ini nga nagpadayon si Enoc sa iya pagtawag sa Ginuo nga nagasiling: Nagaampo ako sa imo, O Ginuo, sa ngalan sang imo Bugtong nga Anak, bisan pa si Jesucristo, nga kaluoyan mo si Noe kag ang iya kaliwatan, agud nga indi na liwat matabunan sang mga baha ang duta.

51 Kag indi makapugong ang Ginuo; kag nakighisugot sia kay Enoc, kag nagpanumpa sa iya sang isa ka sinumpaan nga punggan niya ang mga baha; nga magapakighambal sia sa mga anak ni Noe;

52 Kag nagpagwa sia sing indi mabag-o nga mando nga ang nabilin sang iya kaliwatan dapat pirme masalapuan sa tunga sang tanan nga nasyon samtang ang duta magapadayon;

53 Kag nagsiling ang Ginuo: Bulahan sia nga paagi sa iya kaliwatan ang Mesias magaabot; kay nagsiling sia—Ako ang Mesias, ang Hari sang Sion, ang Bato sang Langit, nga pareho kalapad sang wala’y katapusan; ang bisan sin-o nga nagasulod sa puwertahan kag nagasaka paagi sa akon indi gid mapaslawan; gani bulahan sila nga akon gintumod, kay magakari sila nga nagakanta sang mga ambahanon sang wala’y katubtuban nga kalipay.

54 Kag natabo ini nga nagtawag si Enoc sa Ginuo nga nagasiling: Kon magkari ang Anak sang Tawo sa unod, magapahuway bala ang duta? Nagaampo ako sa imo, ipakita sa akon ining mga butang.

55 Kag nagsiling ang Ginuo kay Enoc: Magtulok, kag nagtulok sia kag nakita ang Anak sang Tawo nga gin-alsa sa krus, suno sa paagi sang mga tawo;

56 Kag nakabati sia sing mabaskog nga tingug; kag natabunan ang kalangitan; kag nagkalisud ang tanan nga gintuga sang Dios; kag nag-ugayong ang duta; kag nagkalapihak ang mga bato ; kag nabanhaw ang mga santos, kag ginkoronahan sa tuo nayon nga kamot sang Anak sang Tawo, sang mga korona sang himaya;

57 Kag ang tanan nga espiritu nga yara sa bilanggoan naggwa, kag nagtindog sa tuo nayon nga kamot sang Dios; kag ang nagkalabilin gintigana sa mga kadena sang kadulom tubtob sa paghukom nga matabo sa dako nga adlaw.

58 Kag sa liwat si Enoc naghibi kag nagtawag sa Ginuo nga nagasiling: San-o bala makapahuway ang duta?

59 Kag nakita ni Enoc ang Anak sang Tawo nga nagsaka pakadto sa Amay; kag nagtawag sia sa Ginuo nga nagasiling: Indi ka bala magbalik liwat sa duta? Bangod ikaw ang Dios, kag kilala ko ikaw, kag nagpanumpa ka sa akon kag nagsugo sa akon nga dapat magpangayo ako sa ngalan sang imo Bugtong nga Anak; ginhimo mo ako kag ginhatagan mo ako sang kinamatarong sa imo trono, kag indi bangod sa akon kaugalingon kundi paagi sa imo grasya; gani, nagapamangkot ako sa imo kon mabalik ka liwat sa duta.

60 Kag ang Ginuo nagsiling kay Enoc: Pareho nga buhi ako, sa amo man magakari ako sa ulihing mga adlaw, sa mga adlaw sang kalainan kag pagtimalus, agud tumanon ang sinumpaan ko sa imo parte sa mga anak ni Noe;

61 Kag magaabot ang adlaw nga ang duta magapahuway, apang antes sina nga adlaw magadulom ang kalangitan, kag may tabon sang kadulom nga magalikop sa duta; kag magauyog ang kalangitan, kag amo man ang duta; kag dalagko nga mga pag-antos ang magaluntad sa tunga sang mga anak sang katawhan, apang ang akon katawhan akon amligan;

62 Kag pagkamatarong ang ipadala ko halin sa langit; kag kamatuoran ang ipalapnag ko sa duta, agud magpamatuod parte sa akon Bugtong nga Anak; sa iya pagkabanhaw halin sa minatay; huo, kag amo man sa pagkabanhaw sang tanan nga tawo; kag ipahanabo ko nga ang pagkamatarong kag kamatuoran maghagunos sa duta nga daw pareho sang baha, agud tiponon ang akon mga pinili halin sa apat ka pamusod sang duta, sa lugar nga akon ihanda, isa ka Balaan nga Siyudad, agud ang akon katawhan mahimo magwagkos sang ila mga balikawang, kag magpaabot sang tion sang akon pagkari; kay dira ipahamtang ang akon tabernakulo, kag pagatawgon ini nga Sion, isa ka Bag-ong Jerusalem.

63 Kag ang Ginuo nagsiling kay Enoc: Sa sina nga tion ikaw kag ang bilog mo nga siyudad magatabo sa ila dira, kag batonon naton sila sa aton sabak, kag makita nila kita; kag hakson naton sila, kag hakson nila kita, kag halokan naton ang tagsa-tagsa;

64 Kag dira ang akon mangin puluy-an, kag ina mangin Sion, nga magaluntad nga pain sa tanan nga gintuga nga akon nahimo; kag sa kalawigon sang isa ka libo ka tuig magapahuway ang duta.

65 Kag natabo ini nga nakita ni Enoc ang adlaw sang pagkari sang Anak sang Tawo sa ulihing mga adlaw, agud magpuyo sa duta sa pagkamatarong sa kalawigon sang isa ka libo ka tuig;

66 Apang antes sina nga adlaw nakita niya ang dalagko nga mga pag-antos sa tunga sang mga malain; kag nakita man niya ang dagat, nga natublag ini, kag ang mga tagipusuon sang mga tawo nga nagapaslaw sa ila, nga nagapaabot nga may kahadlok sa mga paghukom sang Dios nga Makagagahum, nga magatupa sa mga malain.

67 Kag ginpakita sang Ginuo ang tanan nga butang kay Enoc, bisan pa tubtob sa katapusan sang kalibutan; kag nakita niya ang adlaw sang matarong, ang tion sang ila pagtubos, kag nagbaton sang kabug-osan sang kalipay;

68 Kag ang kabug-osan sang mga adlaw sang Sion, sa panahon ni Enoc, tatlo ka gatos kag sisenta’y-singko ka tuig.

69 Kag si Enoc kag tanan sang iya katawhan naglakat upod sa Dios, kag nagpuyo sia sa tunga sang Sion; kag natabo ini nga wala na ang Sion; kay gindala ini sang Dios sa iya kaugalingon nga sabak; kag sumugod sadto naglapnag ang hambalanon, Nadula ang Sion.