Kāālet Ko Jān
Bok In Moses

1 Naan ko an Anij, ko Eaar kōnono n̄an Moses ilo iien eo ke Moses eaar weaaklōn̄ļo̧k ilo juon toļ eutiej otem utiej,

2 Im eaar lo Anij jelm̧ae doon, im eaar ekkōnono Ippān, im aiboojoj an Anij eaar pād ioon Moses; kōn menin Moses eaar maron̄ pād im̧aan Mejān.

3 Im Anij eaar ekkōnono n̄an Moses, im ba: Lo, N̄aij Irooj Anij Ekajoor Bōtata, im Ejjeļo̧k Jem̧ļo̧kin ej eta; bwe N̄a ejjeļo̧k jinoin raan ak jem̧ļo̧kin iiō ko Aō; im en̄in ej jab ejjeļo̧k jem̧ļo̧kin ke?

4 Im, lo, kwe kwōj nejū m̧aan; kōn menin reilo̧k, im I naaj kwaļo̧k n̄an eok eļtan ko an pā ko Peiū; a jab aolep, bwe jerbal ko Aō ejjeļo̧k jem̧ļo̧kier, im barāinwōt naan ko Aō, bwe rej jamin bōjrak.

5 Kōn menin, ejjeļo̧k armej emaron̄ lo aolepān jerbal ko Aō, ijello̧kun wōt n̄e ej lo aolepān aiboojoj eo Aō; im ejjeļo̧k armej emaron̄ lo aolepān aiboojoj eo Aō, im ālikin pād wōt ilo kanniōk ioon laļ in.

6 Im ewōr juon jerbal Ippa n̄an kwe, Moses, nejū m̧aan; im kwe kwōj ilo jekjekin Nejū Iaar Make Keotake; im Nejū Iaar Make Keotake ej im naaj Rilo̧mo̧o̧r eo, bwe E eobrak kōn jouj im m̧ool; a ejjeļo̧k Anij ijello̧kū, im aolep men otemjeļo̧k rej kiiō Ippa, bwe Ijeļā er aolep.

7 Im kiiō, lo, men in Ij kwaļo̧k n̄an eok, Moses, nejū m̧aan, bwe kwe kwōj pād ilo laļ, im kiiō Ij kwaļo̧k e n̄an eok.

8 Im ālikin men kein Moses eaar reilo̧k, im eaar lo laļ eo me ioon kar kōm̧anm̧ane e; im Moses eaar lo laļ im jem̧ļo̧k ko ie, im aolep ro nejin armej raņ ro remour, im ro me kar kōm̧anm̧an er; kōn ejja men in wōt eaar kanooj bwilōn̄ im koļmānļo̧kijeņ.

9 Im baaktok an Anij eaar jenļo̧k jān Moses, bwe aiboojoj eo An eaar jab pād ioon Moses; im Moses eaar makeļo̧k ian. Im ke eaar makeļo̧k ian, eaar bun̄ļo̧k ņa ioon laļ.

10 Im ālikin men kein ekar ium̧win tōrean elōn̄ awa ko m̧okta jān an Moses kar bar bōk lukkuun kajoor eo an āinwōt n̄an armej; im eaar ba n̄an e make: Kiiō, kōn un in ijeļā bwe armej ejej tokjān, men eo me ijjamin kar kōtmāne.

11 A kiiō meja make rekar lo Anij; a jab māj ko mejān kanniōk eo aō, ak māj ko mejān jetōb eo aō, bwe māj ko mejān kanniōk eo aō reban kar maron̄ loe; bwe inaaj kar m̧adeon̄eon̄ļo̧k im mej ilo im̧aan Mejān; a An aiboojoj eaar pād ioō; im iaar lo Mejān, bwe iaar oktak ilo kōjakkōlkōle Im̧aan.

12 Im ālikin men kein ke Moses eaar ba naan kein, lo, Setan eaar itok im kapo e, im ba: Moses, nejin armej, kwōn kabun̄-jar n̄an eō.

13 Im ālikin men kein Moses eaar reilo̧k n̄an Setan im ba: Wōn kwe? Bwe lo, N̄aij juon m̧aan nejin Anij, ilo jekjekin Nejin Eaar Make Keotake; im ewi aiboojoj eo am, bwe in aikuj kabun̄-jar n̄an eok?

14 Bwe lo, iban kar maron̄ kalimjek Anij, ijello̧kun wōt An aiboojoj en kar itok ioō, im iaar oktak im kōjakkōlkōl Im̧aan. A imaron̄ kalimjek eok ilo lukkuun biktokin armej. Ej jab āindein, em̧ool ke?

15 En jeraam̧m̧an etan aō Anij, bwe Jetōb eo An eaar jab aolepem jenļo̧k jān eō, ak n̄e jaab ewi aiboojoj eo am, bwe e ej marok n̄an eō? Im imaron̄ ekajet ikōtaam̧ im Anij; bwe Anij eaar ba n̄an eō: Kwōn kabun̄-jar n̄an Anij, bwe n̄an E wōt kwōn jerbal.

16 Ilo̧k jān ijin, Setan; jab m̧oņe eō; bwe Anij E kar ba n̄an eō: Kwe kwōj ilo̧kan jekjekin Nejū Iaar Make Keotake.

17 Im Eaar barāinwōt letok n̄an eō kien ko ke Eaar kūr n̄an eō jān wōjke eo eurur, im ba: Kūr ioon Anij ilo etan Nejū Iaar Make Keotake, im kabun̄-jar n̄an Eō.

18 Im Moses eaar bar ba: Ij jamin bōjrak jān kūr ioon Anij, ewōr ippa bar men ko jet n̄an kajjitōk jān E: bwe An aiboojoj eaar pād ioō, kōn menin imaron̄ ekajet ikōtaan E im kwe. Kwōn ilo̧k, Setan.

19 Im kiiō, ke Moses eaar ba naan kein, Setan ar lam̧ōj kōn ainikien eo eļļaaj, im elam̧ōjm̧ōj ioon laļ, im ar jiron̄, im ba: N̄aij eo Nejin Eaar Make Keotake, kabun̄-jar n̄an eō.

20 Im ālikin men kein Moses eaar jino in mijak otem mijak; im ke eaar jino in mijak, eaar lo meo̧ eo an hell. Mekarta, ke eaar kūr ioon Anij, eaar bōk kajoor, im eaar jiron̄, im ba: Kwōn ilo̧k jān eō, Setan, bwe en̄in ej Anij eo wōt inaaj kabun̄-jar n̄an E, eo ej Anij in aiboojoj.

21 Im kiiō Setan eaar jino in wūdiddid, im laļ eaar m̧akūtkūt; im Moses eaar bōk kajoor, im eaar kūr ioon Anij, im ba: Ilo etan eo Nejin Eaar Make Keotake, kwōn ilo̧k, Setan.

22 Im ālikin men kein Setan ar kūr kōn ainikien eo eļļaaj, kōn liaajlo̧ļ, im lim̧ō, im n̄i ļaļļaļ; im eaar ilo̧k jān ijo, em̧ool jān im̧aan mejān Moses, im eaar jab lo e.

23 Im kiiō kōn menin Moses eaar jeje kam̧ool; a kōnke nana ej jab pād ilubwiljin ro nejin armej raņ.

24 Im ālikin men kein ke Setan eaar ilo̧k jān im̧aan mejān Moses, Moses eaar kotaklōn̄ļo̧k mejān n̄an lan̄, im eaar obrak kōn Jetōb Kwōjarjar, eo ej kam̧ool kōn Jemān im kōn Nejin;

25 Im kūr ioon etan Anij, eaar lo aiboojoj eo An bar juon alen, bwe ekar pād ioon; im eaar ron̄ juon ainikien, ej ba: Kwe kwo jeraam̧m̧an, Moses, bwe N̄a, eo Ekajoor Bōtata, Iaar kāālet eok, im naaj kōkajoorļo̧k eok jān elōn̄ dān ko; bwe renaaj pokake naan in jiron̄ eo am āinwōt n̄e kwe kwaar Anij.

26 Im lo, N̄aij pād ippam̧, em̧ool n̄an jem̧ļo̧k in raan ko am; bwe kwo naaj kōtļo̧k armej ro Aō jān ineen kōm̧akoko, em̧ool Israel Aō rikāālet.

27 Im ālikin men kein, ke ainikien eo eaar kōnono wōt, Moses eaar bōk mejān im lo laļ, aaet, em̧ool aolepān; im eaar jab wōr juon būn̄al in laļ eaar jab loe, im kile jān Jetōb eo an Anij.

28 Im eaar barāinwōt lo ro rej pād ie, im eaar jab wōr juon jetōb eaar jab loe; im eaar kile er jān Jetōb eo an Anij; im oran ko aer rekar ļap, em̧ool ejjeļo̧k oraer āinwōt bok ioon parijet in lo̧jet.

29 Im eaar lo elōn̄ aelōn̄ ko; im kajjojo aelōn̄ ekar ņa etan laļ, im ekar wōr ro rej pād ioon mejān kajjojo laļ.

30 Im ālikin men kein Moses eaar kūr ioon Anij, im ba: Ba n̄an eō, ij jar n̄an Eok, etke men kein rej āindein, im jān ta Kwaar kōm̧m̧ani?

31 Im lo, aiboojoj eo an Irooj eaar pād ioon Moses, āindein bwe Moses eaar jutak ilo im̧aan mejān Anij, im kōm̧m̧ao Ippān jelm̧ae doon. Im Irooj Anij eba n̄an Moses: Kōn kōttōpar ko Aō make Iaar kōm̧m̧ani men kein. En̄in ej mālōtlōt im ej pād wōt ilo N̄a.

32 Im jān naan eo in Aō kajoor, em̧ōj Aō kar kōm̧anm̧ani, eo ej Nejū Iaar Make Keotake, eo ej obrak kōn jouj im m̧ool.

33 Im laļ ko ejjeļo̧k oraer em̧ōj Aō kōm̧anm̧ani; im Iaar barāinwōt kōm̧anm̧ani n̄an kōttōpar eo Aō make; im jān Nejin Iaar kōm̧anm̧ani, eo ej Nejū Iaar Make Keotake.

34 Im armej eo m̧oktata ian aolep armej raņ em̧ōj Aō kar ņa etan Adam, eo me elōn̄.

35 A bwebwenato eo wōt an laļ jab in, im ro rej pād ie, Ij lewōj n̄an eok. Bwe lo, elōn̄ laļ ko rekar jako jān naan eo in Aō kajoor. Im elōn̄ ko rej kiiō jutak, im ejjeļo̧k oraer n̄an armej; a aolep men ko otemjeļo̧k ewōr bōnbōnier n̄an Eō, bwe rej Aō im I jeļā kajjier.

36 Im ālikin men kien Moses eaar kōnono n̄an Irooj, im ba: Kwōn tūriam̧okake karejeram̧, O Anij, im ba n̄an eō kōn laļ in, im ro rej pād ie, im barāinwōt lan̄ ko, innām karejeram̧ enaaj po būruōn.

37 Im Irooj Anij eaar kōnono n̄an Moses, im ba: Lan̄ ko, er rellōn̄, im rej jab maron̄ bōnbōn n̄an armej; a rej bōnbōn n̄an Eō, bwe rej Aō.

38 Im n̄e juon laļ enaaj jako, im lan̄ ko ie em̧ool āindein bar juon enaaj itok; im ejjeļo̧k jem̧ļo̧k n̄an jerbal ko Aō, im barāinwōt n̄an naan ko Aō.

39 Bwe lo, en̄in ej jerbal eo Aō im aiboojoj eo Aō—n̄an kakūrm̧ool jab wabanban im mour indeeo an armej.

40 Im kiiō, Moses, nejū m̧aan, I naaj kōnono n̄an eok kōn laļ in me kwōj jutak ioon; im kwo naaj jeje men ko me I naaj kōnono.

41 Im ilo juon raan n̄e ro nejin armej raņ renaaj watōki naan ko Aō āinwōt ejjeļo̧k tokjāer im bōk elōn̄ iaer jān bok eo me kwo naaj jeje, lo, I naaj kōjerkaktok bar juon āinļo̧k wōt kwe; im renaaj bar pād ilubwiljin ro nejin armej raņ—ilubwiljin jon̄an wōt lōn̄in ro renaaj tōmak.

42 (Erkein naan ko kar kōnono n̄an Moses ilo toļ eo, eo etan jamin jeļā kake ilubwiljin ro nejin armej raņ. Im kiiō rej kōnono kaki n̄an eok. Jab kwaļo̧ki n̄an jabdewōt ijello̧kun er ro rej tōmak. Em̧ool āindein. Amen.)