1 Im aolep raan ko an Inok rekar ābukwi im jiln̄uul iiō.

2 Im ālikin men kein ^aMitusela, ļeo nejin Inok, kar jab bōk e, bwe bujen ko an Irooj ren maron̄ kūrm̧ool, ko Eaar kōm̧m̧ani n̄an Inok; bwe em̧ool Eaar kōm̧m̧an bujen ippān Inok bwe Noa enaaj kar itok jān leen lo̧jeen.

3 Im ālikin men kein Mitusela eaar kanaan bwe jān lo̧jeen enaaj jebar aolep aelōn̄ in kiin̄ ko ilo laļ (kōn Noa), im eaar bōk aiboojoj n̄an e make.

4 Im eaar jarjartok juon n̄ūta eļap ilo āneo, im Irooj ar kaliaik laļ kōn juon lia ekōmetak, im elōn̄ ian ro rej jokwe ijo raar mej.

5 Im ālikin men kein Mitusela ar mour jibukwi im ruwalitōkn̄ouljiljilimjuon iiō, im eaar keotake Lemek;

6 Im Mitusela ar mour, ālikin an kar keotak Lemek, jiljilimjuonbukwi im ruwalitōkn̄oul ruo iiō, im eaar keotak m̧aan im kōrā ro;

7 Im aolep raan ko an Mitusela rekar ruwatimjuonbukwi im jiljinon̄oul ruwatimjuon iiō, im eaar mej.

8 Im Lemek eaar mour jibukwi im ruwalitōkn̄oul ruo iiō, im eaar keotak juon nejin ļaddik,

9 Im eaar ņa etan ļaddik eo ^aNoa, im ba: Ļein nejū enaaj kaenōm̧m̧an kōj kōn jerbal im en̄taan ko an peid, kōnke bwidej eo me Irooj eaar ^bkaliaiki.

10 Im Lemek ar mour, ālikin an keotak Noa, limabukwi im ruwatimjuonn̄oul ļalem iiō, im eaar keotak m̧aan im kōrā ro;

11 Im aolep raan ko an Lemek rekar jiljilimjuonbukwi im jiljilimjuonn̄ouljiljilimjuon iiō, im eaar mej.

12 Im Noa eaar ābukwi im lemn̄oul iiō dettan, im eaar ^akeotak Jepet; im en̄oul ruo iiō tokālik eaar keotak ^bShem jān lio kar jinen Jepet, im ke eaar limabukwi iiō dettan eaar keotak ^cHam.

13 Im ^aNoa im ļōm̧aro nejin raar ^beo̧ron̄ Irooj, im ron̄jake, im er kar ņa etaer m̧aan ro ^cnejin Anij.

14 Im ke em̧m̧aan rein rekar jino wōrļo̧k ioon mejān laļ, im kōrā ro rekar ļotak n̄an er, ^aļōm̧aro nejin armej rekar lo bwe kōrā ro rekar deo̧, im rekar bōk er pāleer, em̧ool āinwōt aer kāālet.

15 Im Irooj eaar ba n̄an Noa: Kōrā ro nejin ļōm̧aro nejin rekar ^awiakake er make; bwe lo Aō illu ej urur ņae ļōm̧aro nejin armej raņ, bwe reban eo̧ron̄ Ainikiō.

16 Im ālikin men kein Noa eaar kanaan, im kar katakin men ko an Anij, em̧ool āinwōt ekar ilo jinoin.

17 Im Irooj eaar ba n̄an Noa: Aō Jetōb ej jamin ^apād iien otemjej ippān armej, bwe enaaj jeļā bwe aolep ^bkanniōk enaaj mej; mekarta raan ko an renaaj jibukwi im ron̄oul iiō; im eļan̄n̄e armej raņ reban ukeļo̧k, I naaj jilkinļo̧k ^cibwijleplep ko ioer.

18 Im ilo raan ko eaar wōr ^ariineea ro ioon laļ, im rekar kappukot Noa n̄an bōk mour eo An; a Irooj ar pād ippān Noa, im ^bkajoor eo an Irooj eaar pād ioon.

19 Im Irooj eaar ^akapit ^bNoa ilo̧kan ^claajrak eo An make, im jiron̄ e bwe en ilo̧k im ^dkabun̄bun̄ļo̧k Gospel eo An n̄an ro nejin armej raņ, em̧ool āinwōt kar leļo̧k e n̄an Inok.

20 Im ālikin men kein Noa eaar kūr ioon ro nejin armej raņ bwe ren ^aukeļo̧k; a rekar jab eo̧ron̄ naan ko an;

21 Im barāinwōt, ālikin aer kar ron̄jake e, rekar itok im̧aan, im ba: Lo, kōmij m̧aan ro nejin Anij; kōm ar jab bōk n̄an kōm kōrā ro nejin armej raņ ke? Im kōmij jab ^am̧ōn̄ā im idaak, im m̧are im leļo̧k ilo m̧are ke? Im kōrā ro pāleem̧ rej neje n̄an kōm ajri ro, im ejja rein wōt rej em̧m̧aan rekajoor, ro rej āinwōt em̧m̧aan ro etto, em̧m̧aan in bun̄bun̄ eļap. Im rekar jab eo̧ron̄ naan ko an Noa.

22 Im Anij eaar lo bwe ^anana eo an armej raņ ekar kanooj ļap ilo laļ; im aolep armej ekar utiej ilo ļōkōm̧ ko an ^bļōmņak ko an būruōn, ļōmņak ko rekar nana wōt iien otemjej.

23 Im ālikin men kein Noa eaar wōnm̧aanļo̧k ilo an ^akwaļo̧k naan n̄an armej ro, im ba: Kom̧in eo̧ron̄, im ron̄jaki naan ko aō;

24 ^aTōmak im ukeļo̧k jān jero̧wiwi ko ami im ^bpeptaij ilo etan Jisōs Kraist, eo Nejin Anij, em̧ool āinwōt ro jemād, im kom̧ naaj bōk Jetōb Kwōjarjar, bwe en maron̄ ^calikkar men otemjeļo̧k n̄an kom̧; im eļan̄n̄e kom̧ ij jab kōm̧m̧ane men in, ibwijleplep ko renaaj itok ioomi; mekarta rekar jab eo̧ron̄e.

25 Im eaar kaukeļo̧k Noa, im būruōn ar metak bwe Irooj ekar kōm̧m̧an armej ioon laļ, im eaar kabūrom̧ōj e ilo būruōn.

26 Im Irooj eba: I naaj ^ako̧kkure armej eo im Iaar kōm̧anm̧ane, ļo̧k jān mejān laļ, jim̧or armej im mennin mour, im mennin tōbalbal ko, im bao ko in mejatoto; bwe e kaukeļo̧k Noa bwe Iaar kōm̧anm̧ane er, im bwe Iaar kōm̧m̧ane er; im eaar kūr Ioō; bwe rekar kappukot mour eo an.

27 Im āindein Noa ar lo ^ajouj ilo mejān Irooj; bwe Noa ekar juon armej ejim̧we, im ^bwānōk ilo epepen eo an; im eaar ^cetetal ippān Anij, āinwōt kar barāinwōt ļōm̧aro nejin jilu, Shem, Ham, im Jepet.

28 Im laļ ar ^aankeke im̧aan Anij, im ekar obrak kōn aitwerōk.

29 Im Anij eaar kalimjekļo̧k laļ, im, lo, eaar ankeke, bwe aolep kanniōk ekar kaankekeik iaļ eo an ioon laļ.

30 Im Anij eaar ba n̄an Noa: Jem̧ļo̧kin aolep kanniōk ej itok Im̧aō, bwe laļ eobrak kōn ire, im lo I naaj ^ako̧kkure aolep kanniōk ļo̧k jān laļ.