Ngaahi Folofolá
Facsimile 2


Ko ha Tatau Moʻoni ʻo e Tā Fakatātā Mei he Tohi ʻa ʻĒpalahamé

Fika 2

ʻĪmisi
Facsimile 2

Ko e Fakamatala

Fakatātā 1. Ko Kolapa, ʻa ia ko hono ʻuhingá ko e ʻuluaki meʻa naʻe fakatupú, pea ofi taha ki he maama fakasilesitialé, pe ko e ʻafioʻanga ʻo e ʻOtuá. ʻOku ʻuluaki ʻi he pulé, ka ʻoku fakamuimui taha ʻi he anga ʻo e lau taimí. Ko e lau taimi ʻo fakatatau ki he lau taimi fakasilesitialé, ʻa ia ko e lau taimi fakasilesitiale ko iá, ʻoku tatau ʻa e ʻaho ʻe taha ki he hanga ʻe taha. ʻOku tatau ʻa e ʻaho ʻe taha ʻi Kolapá mo e taʻu ʻe taha afe ʻo fakatatau ki he anga ʻo e lau taimi ʻo e māmaní, ʻa ia ʻoku ui ʻe he kau ʻIsipité ko Siā-ho-ē.

Fakatātā 2. ʻOku tuʻu ʻo hoko ki Kolapa, naʻe ui ia ʻe he kau ʻIsipité ko ʻOlipilisi, ʻa ia ko e maama lahi pule hono hokó ofi ki he maama fakasilesitialé pe ko e potu ʻa ia ʻoku ʻafio ai ʻa e ʻOtuá; ʻoku maʻu foki ʻa e kī ʻo e mālohi ʻo kau ki he ngaahi maama kehé; ʻo hangē ko ia naʻe fakahā mei he ʻOtuá kia ʻĒpalahamé, lolotonga ʻene fai ha feilaulau ʻi ha ʻesi feilaulau, ʻa ia kuó ne fokotuʻu ki he ʻEikí.

Fakatātā 3. Kuo tā ke fakafofongaʻi ʻa e ʻOtuá ʻoku ʻafio ʻi hono taloní, kuo kofu ʻaki ʻa e mālohi mo e mafai; mo ha kalauni ʻo e maama taʻengata ʻi hono ʻulú; ʻoku fakafofongaʻi foki ʻa e ngaahi Lea Fakaʻilonga lalahi ʻo e Lakanga Fakataulaʻeiki Toputapú, ʻo hangē ko ia naʻe fakahā kia ʻĀtama ʻi he Ngoue ko ʻĪtení, kae ʻumaʻā foki kia Seti, Noa, Melekisēteki, ʻĒpalahame, pea mo kinautolu kotoa pē ʻa ia naʻe fakahā ki ai ʻa e Lakanga Fakataulaʻeikí.

Fakatātā 4. ʻOku fai tatau mo e foʻi lea faka-Hepelū ko e Laukiiangi, ʻa ia ko hono ʻuhingá ko e fuʻu ʻatā lahi, pe ko e feituʻu ʻatā ʻo e ngaahi langí; ko ha mataʻi fika foki, ʻi he lea faka-ʻIsipité ʻa ia ko hono ʻuhingá ko e taha afe; ʻoku fakatatau ki he lau taimi ʻo Olipilisí, ʻa ia ʻoku faitatau mo Kolapa ʻi heʻene ʻalu takaí pea mo hono lau taimí.

Fakatātā 5. ʻOku ui ia ʻi he lea faka-ʻIsipité ko ʻEnisi-ko-ʻoni-tosi; ko e taha ʻeni ʻo e ngaahi maama pulé foki, pea ʻoku lau ʻe he kau ʻIsipité ko e Laʻaá ia, pea ʻoku maʻu ʻe ia ʻa hono māmá mei Kolapa ʻo fou ʻi he Kae-i-vanalasi, ʻa ia ko e Lea Fakaʻilonga lahí, pe ʻi hono fakalea ʻe tahá, ko e mālohi pule, ʻa ia ʻokú ne puleʻi ʻa e ngaahi maama pe ko e ngaahi fetuʻu kuo fokotuʻu pau ʻe hongofulu mā nima kehe, ʻo hangē foki ko Folōisí pe ko e Māhiná, ko e Māmaní pea mo e Laʻaá ʻi heʻenau ngaahi ʻalu takai fakataʻú. ʻOku maʻu ʻe he maama ko ʻeni ʻa hono mālohí ʻo fou atu ʻi he Kili-folisi-ʻisi-ʻesí, pe ko e Ha-kō-kau-viimí, ʻa ia ko e ngaahi fetuʻu ʻoku fakafofongaʻi ʻe he fika ko e 22 mo e 23, ʻoku maʻu ʻa e maama mei he ngaahi ʻalu takai ʻa Kolapá.

Fakatātā 6. ʻOku fakafofongaʻi ʻa e māmani ko ʻení ʻi hono ngaahi potu ʻe faá.

Fakatātā 7. ʻOku fakafofongaʻi ʻa e ʻOtuá ʻoku ʻafio ʻi hono taloní, ʻo ne fakahā ʻi he ngaahi langí ʻa e ngaahi foʻi Lea Fakaʻilonga lalahi ʻo e Lakanga Fakataulaʻeikí; ʻo hangē foki, ko e fakaʻilonga ʻo e Laumālie Māʻoniʻoní kia ʻĒpalahame, ʻi he tatau ʻo ha lupé.

Fakatātā 8. ʻOku tuʻu ʻi ai ʻa e ngaahi lea ʻa ia ʻoku ʻikai lava ʻo fakahā ki he māmaní; ka ʻe maʻu ia ʻi he Temipale Toputapu ʻo e ʻOtuá.

Fakatātā 9. ʻOku ʻikai totonu ke fakahā ia ʻi he lolotongá ni.

Fakatātā 10. Mo ia foki.

Fakatātā 11. Mo ia foki. Kapau ʻe lava ʻe he māmaní ʻo ʻiloʻi ʻa e ngaahi fika ko ʻení, tuku ke pehē. ʻĒmeni.

Ko e ngaahi fakatātā fika 12, 13, 14, 15, 16, 17, 18, 19, 20, mo e 21, ʻe toki fakahā mai ia ʻi he taimi ʻoku finangalo ki ai ʻa e ʻEikí.

ʻOku fakahā ʻa e liliu ʻoku hā atu ʻi ʻolunga ní ʻo fakatatau ia ki hono lahi ʻo e ngaahi meʻa ʻoku mau maʻu ha mafai ke fakahā atu ʻi he lolotonga ní.