1 E kua tuatua akera te Atu: Ka aere tatou ki raro. Kua aere atura ratou ki raro i te akamataanga ra, e ko ratou, koia oki te au Atua, tei anga i te au rangi e te enua.

2 Te vai vā e te tanea ua ra te enua, kare e mea ke i runga i te enua, e kua tutara te poiri oki ki rungaʼo i te moana, e kua akakoukou iora te Vaerua o te au Atua ki rungaʼo i te kiriātai.

3 Kua tuatua iora ratou (te au Atua): Ei mārama; kua mārama iora.

4 E kua akara akera ratou (te au Atua) i te mārama e te korapa ra; kua akatakake iora te Atua i te mārama e te poiri.

5 E tapa iora te au Atua i te mārama, e Ao; e tapa iora ratou i te poiri e Po. E aiai iora e popongi akera; kua tapa ratou e po; e popongi iora e aiai akera kua tapa ratou e ao; e ko teia oki te rā mua, me kore ra, te akamataanga ta ratou i tapa te ao e te po.

6 E kua tuatua akaou iora te au Atua: Ei reva i rotopu i te au vai, e na te reira e vee i te au vai e te au vai.

7 E kua akaaere iora te au Atua i taua reva ra, vee atura i te au vai i raro ake i taua reva ra, e te au vai i rungaʼo i taua reva ra; e koia tika atura, mei ta ratou i tuatua.

8 E tapa iora te au Atua i taua reva ra e Rangi. E i na, e aiai iora e popongi akera tapa iora ratou e po; e i na, mei te popongi e aiai iora kua tapa ratou e ao; ko te rua teia o te taime i tuatuaʼi ratou e po e te ao.

9 Kua tuatua iora te au Atua: Kia uipa te au vai i raro ake i te rangi ki te ngai okotai, kia kitea mai te one maro; e koia tika atura; mei ta ratou i tuatua;

10 E tapa iora te au Atua i te one maro e Enua; e taua au vai i uipaia ra, tapa iora ratou e au Vai Maata; e akara akera te au Atua i te reira te kauraro ra.

11 E kua tuatua iora te au Atua: E akapapa tatou i te enua kia akatupu mai i te ngangaere, e te rakau rikiriki e ua, e te rakau mamaata e ua ra, tei roto ia ratou uaorai to ratou ua, i to ratou tu, ki runga i te enua nei; e koia tika atura, mei ta ratou i tuatua.

12 E kua teateamamao iora te au Atua i te enua kia akatupu mai te ngangaere mei tona uaorai ua, e te rakau rikiriki kia tupu mai te ua nona uaorai, e kia akatupu mai te enua i te rakau no roto mai iaia uaorai tona ua te ka ua mai, e tona ua kia aite rai ki tona tu; e akara akera te au Atua i te reira te kauraro ra.

13 E i na, kua tatauia te au rā; mei te aiai e popongi iora, tapa iora ratou e po; e i na, mei te popongi e aiai iora, tapa iora ratou e ao; ko te toru ïa o te taime.

14 E kua anga iora te au Atua i te au turama i roto i te reva i te rangi, ei akatakake i te ao e te po; e ei akairo oki e no te au tuatau, e no te au rā e no te au mataiti;

15 E kua teateamamao ratou i te au turama i roto i te reva i te rangi, ei akamārama i te enua nei; e koia tika atura.

16 E kua teateamamao iora te au Atua i nga turama mamaata e rua; ko te turama maata ra ei tutara i te ao; e te turama iti ra ei tutara i te po; e kua anga katoa ratou i te au etu;

17 E kua tuku iora te au Atua i te reira ki roto i te reva i te rangi, ei akamārama i te enua nei, e ei tutara i te po e te ao, e ei akatakake i te mārama e te poiri.

18 Akara akera te au Atua i te reira ta ratou i akataka ra, kia kauraro roa.

19 E i na, e aiai iora e popongi akera e po; e i na, e mei te popongi e aiai akera e ao ïa; e ko te ā ïa o te taime.

20 E kua tuatua iora te au Atua: Kia maata te au mea ora e totoro aere ua i raro i te moana e te au manu kia rere ki runga ake i te enua, ki roto i te reva i te rangi nei.

21 E kua teateamamao iora te au Atua i te au vai kia rauka mai te au toora mamaata e te au mea ora katoa e totoro aere ua, ta te au vai ka apai mai e manganui i to ratou tu; e te au manu peau e to ratou tu. E akara akera te au Atua e ka kauraro mai ïa, e te meitaki ra to ratou parani.

22 E kua tuatua iora te au Atua: E akameitaki tatou ia ratou, e kia anau, kia maata, e kia kī te moana, me kare, te au vai maata ia ratou; e kia maata oki te manu ki rungaʼo i te enua nei.

23 E i na, e aiai iora e popongi akera e po ïa; e i na, mei te popongi e aiai iora e ao ïa; ko te rima ïa o te taime.

24 E kua akateateamamao iora te au Atua i te enua kia akatupu mai i te au mea ora i to ratou tu, te au puaka e te au mea totoro, e te au manu vaevae ā o te enua i to ratou tu; e koia tika atura, mei ta ratou i tuatua.

25 E kua anga iora te au Atua i te au manu vaevae ā o te enua i to ratou tu, e te au puaka i to ratou tu, e te au mea e totoro katoa i runga i te enua i to ratou tu; e akara akera te au Atua e ka kauraro mai ïa.

26 E kua uriuri tuatua iora te au Atua i rotopu ia ratou uaorai, na ko iora: E aere tatou ki raro e anga i te tangata i to tatou uaorai tu, kia aite ki to tatou uaorai tu; e kia mana ratou ki rungaʼo i te au ika o te tai, e ki rungaʼo i te au manu o te reva, e ki rungaʼo i te au puaka, e ki rungaʼo i te enua katoa nei, e ki rungaʼo i te au mea totoro katoa ra, e totoro aere ua i te enua nei.

27 E i na kua eke mai te au Atua ki raro nei, e kua anga i te tangata kia aite ki to ratou uaorai tu i anga ratou iaia; ki te tu o te au Atua i anga ratou ia raua, ko te tane e te vaine.

28 E kua tuatua iora te au Atua: Ka akameitaki tatou ia raua. E kua tuatua maira te au Atua: Ka akariro tatou kia anau raua e kia maata rava, e akakī i te enua nei e akavi; e kia mana korua ki rungaʼo i te au ika o te tai, e ki rungaʼo i te au manu o te reva, e ki rungaʼo i te au mea ora katoa e totoro aere ua ki rungaʼo i te enua nei.

29 E kua tuatua iora te au Atua: I na, ka oronga atu tatou na ratou i te au rakau rikiriki katoatoa te ka ua mai i te ua te ka tae mai ki runga i te enua katoatoa, e te au rakau ravarai e ua to ratou; ae, ko te kai o te pu rakau te ka ua mai i te ua ka oronga tatou na ratou i te reira; ei kai na ratou.

30 E ki te au manu vaevae ā katoatoa o te enua nei, e ki te au manu katoatoa o te reva, e ki te au mea katoatoa e totoro aere ua nei ki runga i te enua nei; i na, ka oronga tatou i te ora kia ratou, e pera katoa ka oronga tatou na ratou i te au rakau rikiriki mata ravarai ei kai, e ka akonokonoia teia au mea katoatoa.

31 E kua tuatua maira te au Atua: E rave tatou i te au mea ravarai, tei tuatuaia e tatou, e ka anga ia ratou; e i na, ka kauraro tikai ratou. E i na, e mei te aiai iora e popongi akera kua karanga ratou e po; e i na, mei te popongi akera e aiai iora kua karanga ratou e ao; ko te ono ïa o te taime.