Scriptures
Aberahama 2


Pene 2

Kua akaruke a Aberahama ia Ura kia aere ki Kanaana—Kua mama maira a Iehova kiaia i Harana—Kua taputouia te au akameitakianga ravarai ki runga i tana uanga, e mei roto atu i tana uanga ki te katoatoa rava—Kua aere atu aia ki Kanaana e aere atu ki Aiphiti.

1 E teianei kua akakoro iora te Atu ra ko te Atua kia mamae meitaki te onge i te enua ko Ura, te tumu no tei mate toku tuakana ko Harana; kareka toku metua ko Tera te ora ua ra aia i te enua ko Ura, o te Kaledea.

2 E i na, kua rave au, ko Aberahama, ia Sarai ei vaine naku, e kua rave katoa mai toku tuakana a Nahora ia Mika ei vaine nana, e tamaine aia na Harana.

3 E teianei kua tuatua maira te Atu kiaku: Aberahama, e aere ke atu koe ki vao i teia enua, mei toou ai taeake, e mei te ngutuare o toou metua ki te enua taku ka akaari atu kia koe.

4 I reira toku akarukeanga i te enua ko Ura o te Kaledea, kia aere atu ki te enua ko Kanaana; kua apai au i te tamaiti a toku tuakana ko Lota, e tana vaine, e taku vaine ko Sarai; e toku metua tei aru mai ki te enua tei topaia e matou e ko Harana.

5 E kua maru mai te onge; kua noo iora toku metua ki Harana e manganui te au anana i reira; e kua uri akaou toku metua ki tana angaanga idolo, no reira kua noo tamou aia ki Harana.

6 E kua pure iora au, ko Aberahama, e te tamaiti a toku tuakana, ko Lota, ki te Atu e kua mama maira te Atu kiaku, na ko maira kiaku: Ka tu e arataki ia Lota ki to rima; e akakoroanga toku i rave ke ei au ia koe ki vao ia Harana, e kia akariro ia koe ei orometua ei tutu i toku ingoa ki te enua ke taku ka oronga atu no taau uanga e a muri atu ei nooanga openga kore, me akarongo ratou i toku reo.

7 Ko au te Atu ra toou Atua; e noo au i te rangi; ko te enua toku pange vaevae; kua akatika au i toku rima na rungao i te moana, e kua kauraro i toku reo; kua akariro au i te matangi e te aʼi ei kariota noku; e tuatua au ki te au maunga—Aere ke atu—e i na, kua apai ke ia atu ratou e te puaioio, i taua atianga tikai.

8 Ko Iehova toku ingoa, e kua kite au i te openga e te akamataanga; no reira ei rungaʼo taku rima ia koe.

9 E akariro au ia koe ei iti tangata maata, e e akameitaki au ia koe ki rungaʼo i te au mea aite kore ia, e e akamaata au i toou ingoa ki roto i te au iti tangata ravarai, e ka riro koe ei akameitakianga ki toou uanga a muri ake ia koe, e ei roto i to ratou rima apai ei ratou i teia angaanga e te Kautaunga ki te au iti tangata katoatoa;

10 E ka akameitaki au ia ratou na roto i toou ingoa; kia ratou ravarai te ka ariki i teia Evangelia, e tuatuaia ratou ki toou ingoa, e topiriia ratou ki taau uanga, e ka tu ratou ka akameitaki ia koe, ei metua no ratou;

11 E akameitaki au ia ratou, tei akameitaki ia koe, e taumaa au ia ratou, tei taumaa ia koe; e i roto ia koe (koia oki i roto i toou Kautaunga) e i roto i taau uanga (koia oki, toou Kautaunga) ka oronga atu au kia koe i tetai taputou e ko teia tikaanga ka vai rai kia koe, e i roto i taau uanga i muri ia koe (koia oki, ko te uanga tika tikai me kore ra te uanga a toou na kopapa) e akameitakiia te au kopu tangata ravarai o te enua nei, ki te au akameitakianga o te Evangelia, koia oki te akameitakianga o te akaoraanga, koia te ora mutukore.

12 E teianei i muri ake i to te Atu takakeanga mei te tuatuaanga mai kiaku, e te takakeanga tona mata mei iaku, kua tuatua iora toku ngakau: Kua kimi pu tikai to tavini ia koe; i teianei kua kiteaia e au.

13 Kua tono mai oki koe i taau angela ei akaora iaku mei te au atua o Elekena, e ka rave meitaki au i te akarongo ki toou reo, no reira e tuku ake koe i to tavini kia aere ma te au.

14 E i na, kua takake iora au, ko Aberahama, mei ta te Atu i tuatua mai ei kiaku, e tei aku rai a Lota; e ko au ko Aberahama e ono ngauru ma rua oku mataiti i takake mai ei au mei Harana.

15 E kua rave au ia Sarai, taku i akaipoipo i Ura io te Kaledea, e Lota, te tamaiti a toku tuakana, e to matou au apinga katoa, tei akaputuputuia e matou, e te au tangata tei rauka mai ia matou i Harana, e kua aere mai matou na te ara i te enua ko Kanaana, e kua noo ki roto i te puakapa, i to matou aereanga mai;

16 No reira, ko te mutukore to matou tapoki e to matou papa e to matou akaoraanga, i to matou tereanga mai mei Harana na te pae mai ia Ieresona, kia tae mai ki te enua ko Kanaana.

17 E teianei, kua akatu iora au, ko Aberahama, i tetai atarau i te enua ko Ieresona, e kua oronga i tetai atinga ki te Atu, e kua pure atu kia akaateaia te onge mei te ngutuare o toku metua, kia kore ratou e mate.

18 E kua akaruke atu matou i te enua ko Ieresona, na roto mai i te enua ki te ngai ko Sekema; tei te atea te reira o More, e kua tae takere ana matou ki te kotinga o te enua o Kanaana, e kua oronga au i tetai atinga i reira i te atea o More e kua kapiki atu ki te Atu ma te maroiroi, no te mea kua tae takere ana matou ki te enua o teia iti tangata akamori idolo.

19 Kua mama mai te Atu kiaku i te pau i taku au pure, e kua na ko mai kiaku: E oronga atu au i teia enua no taau uanga.

20 E kua tu akera au, ko Aberahama, ki runga mei te ngai o te atarau tei akatuia e au na te Atu, e akaruke akera mei reira aere atura ki te maunga i te itinga o Betela e kua patia i toku puakapa ki reira, ko Betela ki te opunga, ko Hai i te itinga; i reira toku akatuanga i tetai atarau na te Atu, e kua kapiki akaou i te ingoa o te Atu.

21 E tere akaou atura au, ko Aberahama, ki tonga; te tupu rai te onge i taua enua ra; e kua akamanako akera au, ko Aberahama, i te aere ki raro i Aiphiti, noo ei no te pakari rava o te onge.

22 E i na, i toku akavaitataanga atu i te tomo ki Aiphiti, kua tuatua maira te Atu kiaku: Ka akara na i to vaine ia Sarai, e vaine purotu kia akaraia;

23 No reira ka tae akera, e me kite te ngati Aiphiti iaia, ka karanga ratou e—E vaine aia nana; e ka tā ratou ia koe, i na e ka akaora ratou iaia; no reira e akara mai koe ki teia reo pakari:

24 E tuku iaia kia tuatua ki to Aiphiti, e tuaine aia noou, e ka ora koe i reira.

25 E i na, kua tuatua atura au, ko Aberahama, ki taku vaine kia Sarai i te au mea katoatoa ta te Atu i tuatua mai kiaku—No reira ko taau ïa tuatua kia ratou, te pati nei kia koe, e tuaine koe noku, kia manuia au i taau e rave, e ka ora au i reira noou.