1 Ao ngai, Aberaam, iai irou te ^aUrim ao te Tammim, are e a tia n anganai te Uea ae Atuau, i Ura ae abaia I-Kareria;

2 Ao I noori ^aitoi, bwa a bon rangi ni bubura, ao teuana mai buakoia bon te kabanea ni kaan nakon kaintokanuean te Atua; ao a boni mwaiti aika bubura ake a kaan i rarikina;

3 Ao te Uea e taku nakoiu: Aikai ake a taua mwiia; ao aran are bubura bon ^aKorobo, ibukina bwa e bon kaan ma ngai, bwa Ngai bon te Uea ae Atuam: I a tia ni katea aio bwa e na taua mwiia ni kabane akekei ake bon titebo aia karinan ma ane ko tei i aona.

4 Ao te Uea e taku nakoiu, man te Urim ao te Tammim, bwa Korobo e boraoi aron waakina ma te Uea, ni kaineti ma ana tai nako ma taina ni kaineti ma minominona; bwa teuana minona bon teuana te ^abong iroun te Uea, n aron baireana irouna, are bon teuana te nga te ^bririki ni kaineti ma te tai are baireaki ibukin ane ko tei iai. Aio bon bairean ana tai te Uea, ni kaineti ma bairean Korobo.

5 Ao te Uea e taku nakoiu: Te buraneti are e uarereke riki otana, e uarereke riki nakon are e na taua taekan te ngaina, ao te tairiki, e korakora riki ke e bubura riki nakon ane ko tei i aona n aron baireana, bwa kakamwakurina ni karinanna e karaurau riki; e bon riai aei ibukina bwa e tei i etan te aonaba are ko tei iai, ngaia are bairean ana tai e bon karako riki n aron mwaitin ana bong, ao ana namwakaina, ao ana ririki.

6 Ao te Uea e taku nakoiu: Ngkai, Aberaam, bon ^aiai uoua koaua aikai, nooria, matam a nooria, ko anganaki bwa ko na atai bairean taian tai, ao te tai are rineaki, eng, te tai are rineaki ibukin te aonaba are ko tei i aona, ao te tai are rineaki ibukin te oota are korakora riki are rineaki bwa e na taua taekan te ngaina, ao te tai are rineaki ibukin te oota are karako riki are e rineaki bwa e na taua taekan te tairiki.

7 Ngkai te tai ae rineaki ibukin te oota are karako riki e bon anaanau riki taina ni kaineti ma baireana nakon bairean te tai ibukin te aonaba are ko tei i aona.

8 Ao ike iai iai uoua koaua aikai, e na iai te koaua riki teuana i aoia, are, e na iai teuana riki te buraneti are bairean taina e na anaanau riki.

9 Ao ngaia are e na iai bairean tain te buraneti teuana i aon riki are teuana, ni karokoa ko roko i Korobo, Korobo are bon kaineti baireana ma ana tai te Uea; Korobo are tei ni kaan nakon kaintokanuean te Atua, bwa e na tautaeka i aoia ni kabane buraneti ake bon kaain te ^akarinan ae titebo ma are ko tei i aona.

10 Ao e anaganaki nakoim bwa ko na ata te tai are rineaki ibukin itoi ni kabane ake a rineaki bwa ana anga te oota, ni karokoa ko a kaan ma kaintokanuean te Atua.

11 Ngaia are ngai, Aberaam, I ^ataetae ma te Uea, ni itara mata, n aron te aomata ae taetae ma temanna; ao e tuangai mwakuri ake a karaoaki ni baina;

12 Ao e taku nakoiu: Natiu, natiu (ao baina e aroraki nako), nooria N na kaotii nakoim baikai ni kabane. Ao e katoka baina i aon matau, ao I noori bwaai ake a karaoaki ni baina, ake a mwaiti; ao a rikirake mwaitia imatau, ao I aikoa kona n noora tokina.

13 Ao e taku nakoiu: Aio bon Tineaa, are bon taai. Ao e taku nakoiu: Kokobo, are bon te itoi. Ao e taku nakoiu: Orea, are bon namwakaina. Ao e taku nakoiu: Kokoubim, are nanona taian itoi, ke ni kabane oota aika korakora, ake a mena i annang i karawa.

14 Ao e bon tairiki ngke e taekini taeka aikai te Uea nakoiu: N na ^akamwaitiko, ao am ^bkariki ake imwiim, n ai aron baikai; ao ngkana ko kona ni wareka ^cmwaitin te tano, bon anne mwaitin am kariki.

15 Ao te Uea e taku nakoiu: Aberaam, I kaoti baikai nakoim i mwaain ae ko nako Aikubita, bwa ko aonga n taekini ni kabane taeka aikai.

16 Ngkana iai uoua bwaai, ao iai teuana ae rietata nakon are teuana, e na iai bwaai aika rietata riki i aoia; ngaia are ^aKorobo bon te kabanea n korakora i buakoia ni kabane Kokoubim ake ko a tia n noori, ibukina bwa bon te kabanea ni kaan nakoiu.

17 Ngkai, ngkana iai uoua bwaai, teuana ae rietata nakon are teuana, ao namwakaina e rietata nakon te aonaba, ngkanne e kona ni iai te buraneti ke te itoi ae mena i etana; ao akea te bwai ae na baireia te Uea ae Atuam i nanona bwa e na karaoia ma ti are e na bon ^akaraoia.

18 E ngae n anne e karaoa te itoi ae korakora riki; n ai arona naba, ngkana iai uoman tamnei, ao temanna e rabakau riki nakon are temanna, ma tamnei aika uoman aikai, e ngae ngke temanna e rabakau riki nakon are temanna, akea moaia; boni iai ngaia mai mwaaina, a na bon akea tokiia, ana maiu rimwi, bwa a bon ^agnolaum, ke akea tokiia.

19 Ao te Uea e taku nakoiu: Boni iai uoua koaua aikai, bwa boni iai uoman tamnei, temanna e rabakau riki nakon are temanna; e na iai temanna riki ae rabakau riki nakoia; Ngai te Uea ae Atuam, I ^arabakau riki nakoia ni kabane.

20 Te Uea ae Atuam e kanakoa ana anera bwa e na ^akamaiuko man baia ana ibonga Erekana.

21 I maeka i buakoia ni kabaneia; Ngaia are, Ngai ngkai I a ruo nakoim bwa N na taekini nakoim ^amwakuri ake a tia ni karaoi baiu, are mai iai ^bwanawanau e rianako nakoia ni kabaneia, bwa I tautaeka i karawa i eta, ao n te aonaba inano, n te wanawana ao te iango raoi ni kabane, i aoia ni kabane rabakau ake e a tia n nooria matam man te moan tai; I ruo ni moanakin te tai i buakoia ni kabane rabakau ake ko a tia n noori.

22 Ngkai te Uea e a tia ni kaotia nakoiu, ae Aberaam, ^arabakau ake a barongaaki ^bi mwaain rikin te aonaba; ao i buakoia aikai ni kabane a boni mwaiti ake a ^crine ao a kakannato.

23 Ao te Atua e nooriia tamnei aikai bwa a raoiroi, ao e tei i buakoia, ao e taku: Naakai N na karikiia bwa au taan tautaeka; bwa e tei i buakoia nakekei ake bon tamnei, ao e nooria bwa a bon raoiroi; ao e taku nakoiu: Aberaam, ngkoe bon temanna mai i buakoia; ko a kaman ^arineaki i mwain bungiakim.

24 Ao iai ^atemanna ae tei i buakoia ae ai aron te Atua, ao e taku nakoia naake a raonna: Ti na nako n ruo, bwa iai te mwaawa ikekei, ao ti na uoti bwaai aikai, ao ^bti na karaoa te ^caonaba are a na kona ni maeka i aona naakai.

25 Ao ti na ^akataiia ma ngkai, n nooria ngkana a na ^bkaraoi bwaai ni kabane are e na tuangiia te Uea ae Atuaia.

26 Ao naake a kawakini ^amoan maekaia a na karakaaki aroia; ao naake aki kawakini moan maekaia a na aki karekea te mimitong n te abanuea naba anne ma naake a kawakina moan maekaia; ao naake a kawakina ^bkauouan maekaia a na mwaiti riki ^cmimitong i aon atuuia n aki totoki.

27 Ao te ^aUea e taku: Antai ae N na kanakoa? Ao temanna e kaeka n ai aron ^bNatin te Aomata: Aio Ngai, kanakoai. Ao ^ctemanna riki e kaeka ao e taku: Aio Ngai, kanakoai. Ao te Uea e taku: N na kanakoa te moan.

28 Ao te ^akauoman e bon un, ao e aki kawakina moan maekana; ao, n te bong arei, a ^bmwaiti aika iria.