Ba meybil ni fan ngak e en ni pilung

1 Got, mu fil ngak e en ni pilung rogon i turguy ban’en nib mat’aw,mu gagiyegnag nge rin’ e tin ba yal’uw ni bod gur,

2 ya nge gagiyegnag e tirom e girdi’ nib yal’uw,mi i rin’ e tin nib mat’aw ngak e pi’in gafgow.

3 Mang e yigi felan’ me man’og e nam;mang e yigi e nang e nam e tin ni bmat’aw.

4 Mang e yigi turguy e en pilung e tin ba manigil ni fan ko pi’in gafgow;mang e yigi ayuweg e pi’in ke t’uf e ayuw rorad,me gechignag e pi’in yad be gafgow nagrad!

5 Mang e yigi liyor e girdi’ rom ngom u n’umngin nap’an ni bay i par e yal’ ni be mat,ngu n’umngin nap’an ni be par e pul ni be mat ram’en u reb e mfen ngu reb.

6 Mang e yigi par e en ni pilung ni bod e n’uw ni be aw nga daken e yungi flang,nge ran ni be tarannag e but’.

7 Mange yigi par ni be gel feni mat’aw u n’umngin nap’an e yafos rok,mi i man’og u n’umngin nap’an ni bay e pul ni be mat ram’en.

8 Gagiyeg rok e yan u bang e day nga bang e day,me tabab ko lul’ ni Eufrates nge yan i taw nga tungun e fayleng.

9 Girdi’ ko ted ni desert e bay ur siro’gad u p’eowchen;ma pi to’ogor rok e bay ra li’led e fiyath.

10 Pi pilung nu Spain nge pi donguch e bay ur pi’ed e tow’ath ngak;gal pilung nu Sheba ngu Seba e bay ur pi’ew e maligach ngak.

11 Urngin e pilung e bay ur siro’gad ngak;urngin e pi nam ni bay ur pigpiggad ngak!

12 Ma ayweg e pi’in gafgow ni yad ma pining,nge pi’in ke t’uf e ayuw rorad ma kan n’agrad.

13 Ma runguy e pi’in me’waer nge gafgow;ma ayuweg e yafos rok e pi’in ke t’uf e ayuw rorad.

14 Ma chuwegrad u fithik’ e gafgow nge cham,pogofan rorad e ri ba ga’ fan u wan’.

15 Nge par e en ni pilung nib n’uw nap’an!Mang e yugun pi’ e gol nu Sheba;mang e yugu’un meybilnag ni gubin ngiyal’;mang e yigi fal’eg Got wa’athan ni gubin ngiyal’!

16 Mang e yigi yo’or e grain u daken e nam;mang e yigi sug daken e yochi burey ko woldug,ngi i k’uf ni bod e woldug nu Lebanon.Mang e yigi sug e pi binaw ko girdi’,ni bod e pan u daken e pi flang.

17 Mang e yigi par fithingan e en pilung ni dab ni pag talin;mang e yigi par buguwan nn’umngin nap’an ni bay e yal’.Mang e yigi urngin e nam me ning ngak Got ni nge fal’eg wa’athradni bod nike fal’eg wa’athan e en ni pilung.

18 Ke sorok SOMOL, ni Got nu Israel!I go’ ir e ma ngongliy e pi maang’ang ney.

19 Fithingan nib gilbuguwan e ngu’un pining e sorok ngay ndariy n’umngin nap’an!Maluplup rok e mang e yigi suguy e fayleng.Amen! Amen!

20 Irera’ tungun e meybil rok David nib mo’on ni fak Jesse.