Ba tangin e sorok

1 Gimed urngin e pi’in gimed mmat’aw,e nge felan’med ni bochan e tin ke rin’ SOMOL;pi’in yad be fol rok, e ngar pininged e sorok ngak!

2 Mu chubeged harp ngam pininged e magaer ngak SOMOL;mu tang niged ni gimed be chubeg e harp ni ragag yal’ e seng riy.

3 Mon’ed reb e tang nib be’ech ngak,mu chubeged e harp nge mus rogmed riy, mi gimed tolul’ nib ga’ lam’ed!

4 Thin rok SOMOL e ba riyul’,ma gubin e maruwel rok e ra pagan’uy ngay.

5 I SOMOL e ba t’uf rok e tin nib mat’aw ma ba yal’uw,t’ufeg rog ni dabimus e ke suguy e fayleng.

6 I SOMOL e non me sum e pi tharmiy,I non me sum e yal’ nge pul nge pi t’uf.

7 I kunuy urngin yang e day nga ta’bang;i kunuy ngalan e rigur nib to’ar.

8 Fayleng ni polo’, mu pired ni bay madgun SOMOL u wun’um.Gimed girdi’en urngin e nam nu fayleng, mu ngatgad ngak!

9 Ya nap’an ni non, me sum e fayleng;miki non, me yib i m’ug urngin ban’en.

10 I SOMOL e ma kirebnag e tanom ko pi nam,ma tel ni dabiyag e tin ka ra puruy’ niged.

11 Machane tin ke tanomnag e ndariy n’umngin nap’an,ma tiriggil rok e ma par ni manemus.

12 Ba felan’ e re nam ni SOMOL e Got rorad;ba felan’ e girdi’ nike mel’egrad ni ngar manged girdi’en!

13 I SOMOL e be changar u tharmiy nga but’,be guy e girdi’ ni gubin.

14 Gin ke par riy be gagiyeg e be changar riy nga but’nga daken urngin e pi’in yad be par u daken e fayleng.

15 Ir e chamiy gubin e leam rorad,ma manang urngin e ngongol rorad.

16 Ba pilung e der ma gel ko mael ni bochan e ba gel ma ba yo’or e salthaw rok;ba salthaw e der ma gel ni bochan gelngin.

17 Ma pi os ko mael e gathiyad e ra gel niged e mael;gelngirad nib gel e dabi ayuw.

18 I SOMOL e ma yaliy e pi’in bay madgun u wun’rad,ni pi’in ke pagan’rad ko t’ufeg rok ni dabimus.

19 Ma yororiyrad ko yam’;nge uyongol.

20 Ke lagan’dad ngak SOMOL;ir e yoror nge ta’ayuw rodad.

21 Ke felan’dad ni bochan SOMOL;ke pagan’dad nga fithingan nib thothup.

22 SOMOL, t’ufeg rom ni dabimus e mang e yigi par romad,bod ni ku gu ted e lagan’ romad ngom.