KAEN LAL E BABYOR

Sorok ni yibe pining nga feni manigil Got

1 Mu pininged e magaer ngak SOMOL, ya ir e mmanigil;ma t’ufeg rok e bmanemus!

2 Mu uned ngog i pining e sorok ngak SOMOL,ni gimed gubin e pi’in nike ayuwegmed u pa’ e to’ogor romed.I ir e ke lagmed u pa’ e pi to’ogor romed,

3 ke chuwegmed ko pi nam ni gathi nam romed,ke fulwegmed u lan e ngek nge ngal, ngu lan e lel’och nge yimuch.

4 Boch i gimed e uranod u daken e ted i yan ndariy e kanawo’ riy,ma dar pir’eged wo’rad ngalan reb e binaw ni ngar pired riy;

5 ra pired ni karm’ad ko bilig nge belel,ndakur fineyed ni ku yad ra fos.

6 Nap’an nra gafgowgad ni aram rogon miyad wenig ngak SOMOL,me ayuwegrad ko gafgow nike aw ngorad.

7 Ya pow’iyrad u ba kanawo’ nib k’iy,nga bbinaw ni ir e ngar pired riy.

8 Thingar ra pininged e magaer ngak SOMOL ni bochan e t’ufeg rok e dabimus,nge bochan e tin ni bfel’ nike rin’ ngorad!

9 Ma chuweg e belel rok e pi’in karm’ad ko belel,ma pi’in karm’ad ko bilig e ma pi’ ngorad e tin ni bfel’ ngar fosgad.

10 I par boch i yad u fithik’ e lumor u kalbus,ya kar pired ni yad e kalbus ni ka nin’ e chen ngorad yad be gafgow,

11 ni bochan e ra togopluwgad ko tin ni yog Got ni Gubin ma Rayag Rok,ya ra dabuyed ni ngar folgad ko pi fanow rok.

12 Ke aw porowrad ko maruwel nib gel;yad ra aw nga but’, ma dabi yan be’ i ayuwegrad.

13 Nap’an nra gafgowgad ni aram rogon miyad wenig ngak SOMOL,me ayuwegrad ko gafgow nike aw ngorad.

14 Ke chuwegrad u fithik’ e lumor u kalbus,me th’ab e chen ni ka ni m’ag ngorad.

15 Thingar ra pininged e magaer ngak SOMOL ni bochan e t’ufeg rok e dabimus,nge bochan e tin ni bfel’ nike rin’ ngorad.

16 Ma t’ar e mab nga but’ nni ngongliy ko wasey ni bronze,me t’ar nga but’ yuley i wasey.

17 Boch i yad e i m’ar ni bochan e denen ni ur ngongliyed,mu’ur gafgowgad ni bochan e kireb rorad;

18 ni chichingeg e ggan nga owcherad,me chugur ni nge math e pogofan rorad.

19 Nap’an nra gafgowgad ni aram rogon miyad wenig ngak SOMOL,me ayuwegrad ko gafgow nike aw ngorad.

20 I non miyad gol,me lagrad ko riya’.

21 Thingar ra pininged e magaer ngak SOMOL ni bochan e t’ufeg rok e dabimus,nge bochan e tin ni bfel’ nike rin’ ngorad.

22 Thingar ra urfiyed e gamanman ngar pi’ed ngak ni maligach ni aram e yad be pining e magaer ngak,miyad tang u fithik’ e felfelan’ ngar weliyed urngin e tin ke rin’!

23 Boch i yad e i chur u maday u barkow,ni yad be muruwliy e salpiy rorad u maday;

24 ra guyed e tin ke rin’ SOMOL,ni pi ngongol rok ni bfel’ ni bay u maday.

25 I non, me thow nifngin e yoko’,me sum e n’ew ni ba ga’.

26 Mi i yan fapi barkow nga p’ebugul e n’ew ngi i chuplog nga but’;ni be chugur ni nge pil, ma pi pumo’on ni yad bay u daken fapi barkow e rrusgad;

27 ur tuturpelgad ma yad be thigthig ni gowa kar balyanggad ko rrum;rogon farad salap ko maruwel u barkow e yan i aw nike m’ay fan.

28 Nap’an nra gafgowgad ni aram rogon miyad wenig ngak SOMOL,me ayuwegrad ko gafgow nike aw ngorad.

29 I mocha’nag e yoko’me gapas e n’ew.

30 Me felfelan’rad ya ke mocha’,me fekrad i yan ko gin yad be nameg nde buch ban’en rorad.

31 Thingar ra pininged e magaer ngak SOMOL ni bochan e t’ufeg rok e dabimus,nge bochan e tin ni bfel’ nike rin’ ngorad.

32 Thingar ra weliyed u lan e mu’ulung rogon feni sorok,miyad pining e sorok ngak u p’eowchen e mu’ulung rok e pi’in pi’lal ni yad ma yog e thin.

33 I SOMOL e mliknag e yu pa’ i lul’,me taleg e pi alublub.

34 I pingeg e but’ nib yong’ol nge buday ni daki fel’,ni bochan e kireb ni i ngongliy e pi’in i par u rom.

35 I pilyeg e ted ni desert nge ngal’ ni lipath,nge but’ ni mlik nge yib e ran riy.

36 I pag e girdi’ ni karm’ad ko bilig ngar pired u rom,ngar toyed bbinaw u rom ngar tafned.

37 Ra woldug niged e yungi flang miyad yung e grape,ngar t’ared wom’ngin nrib yo’or.

38 Ke fal’eg wa’athan e tirok e girdi’ ke yo’or pifakrad,me tay yu ran’ i garbaw ni fakrad nda i lich.

39 Nap’an ni waer girdi’en Got ko mael ngar tamra’gad,ni bochan e gafgow nni gelnag ngorad ngar gafgowgad,

40 me dag ngak e pi’in yad be gafgow nagrad ni dariy farad,me tayrad ngu’ur derawgad u daken e ted ndariy e kanawo’ riy.

41 Machane ayuweg e pi’in ke t’uf e ayuw rorad u fithik’ e gafgow rorad,me yo’ornag chon e tabinaw rorad ni bod yu ran’ i saf.

42 Pi’in yad mmat’aw e ra guyed ni aram rogon, me felan’rad,ma urngin e pi’in kireb e ra th’abed gulungrad.

43 Pi’in yad ba gonop e mang e yugur leam niged e pin’ey;mang e yugur tafnay niged fare t’ufeg rok SOMOL ni dabimus.