ປຈສ, ມັດທາຍ 6:14. ປຽບທຽບໃສ່ກັບ ມັດທາຍ 6:13; ມີການປ່ຽນແປງທີ່ຄ້າຍຄືກັນ ໃນ ລູກາ 11:4
ພຣະຜູ້ເປັນເຈົ້າບໍ່ນຳພາເຮົາໄປສູ່ການລໍ້ລວງ.
14 ແລະ ຂໍຢ່າພາພວກຂ້ານ້ອຍເຂົ້າໄປໃນການລໍ້ລວງ, ແຕ່ຂໍປົດປ່ອຍພວກຂ້ານ້ອຍຈາກມານຊົ່ວຮ້າຍ.
ປຈສ, ມັດທາຍ 6:22. ປຽບທຽບໃສ່ກັບ ມັດທາຍ 6:22
ຖ້າຫາກດວງຕາຂອງພວກເຮົາເຫັນແກ່ລັດສະໝີພາບຂອງພຣະເຈົ້າແຕ່ຢ່າງດຽວ, ທັງຮ່າງກາຍຂອງພວກເຮົາ ກໍຈະເຕັມໄປດ້ວຍຄວາມສະຫວ່າງ.
22 ຕາເປັນໂຄມໄຟຂອງຮ່າງກາຍ; ສະນັ້ນ ຖ້າຫາກຕາຂອງພວກເຈົ້າເຫັນແກ່ລັດສະໝີພາບຂອງພຣະເຈົ້າແຕ່ຢ່າງດຽວ, ທັງຮ່າງກາຍຂອງພວກເຈົ້າກໍຈະເຕັມໄປດ້ວຍຄວາມສະຫວ່າງ.
ປຈສ, ມັດທາຍ 6:25–27. ປຽບທຽບໃສ່ກັບ ມັດທາຍ 6:25; 10:10
ພຣະເຢຊູເຕືອນສານຸສິດຂອງພຣະອົງ ເຖິງວຽກງານທີ່ຫຍຸ້ງຍາກຂອງເຂົາເຈົ້າ ແຕ່ສັນຍາວ່າ ພຣະອົງຈະຕຽມທາງໄວ້ໃຫ້ ແລະ ວ່າພຣະບິດາເທິງສະຫວັນຈະຈັດຫາໃຫ້ເຂົາເຈົ້າ.
25 ແລະ, ອີກເທື່ອໜຶ່ງ, ເຮົາກ່າວກັບພວກເຈົ້າວ່າ, ເຈົ້າທັງຫລາຍຈົ່ງໄປທົ່ວໂລກ, ແລະ ບໍ່ຕ້ອງຫ່ວງໃຍນຳຊາວໂລກ; ເພາະຊາວໂລກຈະກຽດຊັງພວກເຈົ້າ, ແລະ ຈະຂົ່ມເຫັງພວກເຈົ້າ, ແລະ ຈະຂັບໄລ່ພວກເຈົ້າອອກໄປຈາກທຳມະສາລາຂອງພວກເຂົາ.
26 ເຖິງຢ່າງໃດກໍຕາມ, ພວກເຈົ້າຈະໄປຫາເຮືອນນີ້ເຮືອນນັ້ນ, ສິດສອນຜູ້ຄົນ; ແລະ ເຮົາຈະນຳໜ້າພວກເຈົ້າ.
27 ແລະ ພຣະບິດາເທິງສະຫວັນຂອງພວກເຈົ້າ ຈະຈັດຫາໃຫ້ພວກເຈົ້າ, ສິ່ງໃດກໍຕາມທີ່ພວກເຈົ້າຕ້ອງການສຳລັບອາຫານ, ສິ່ງທີ່ພວກເຈົ້າຈະກິນ; ແລະ ສຳລັບເສື້ອຜ້າ, ສິ່ງທີ່ພວກເຈົ້າຈະນຸ່ງ ຫລື ຫົ່ມ.
ປຈສ, ມັດທາຍ 6:38. ປຽບທຽບໃສ່ກັບ ມັດທາຍ 6:33
ກ່ອນອື່ນໝົດ ພວກເຮົາຄວນສະແຫວງຫາທີ່ຈະສ້າງອານາຈັກຂອງພຣະເຈົ້າ.
38 ດັ່ງນັ້ນ, ຢ່າສະແຫວງຫາສິ່ງທີ່ເປັນຂອງໂລກ, ແຕ່ກ່ອນອື່ນໝົດ ຈົ່ງສະແຫວງຫາທີ່ຈະສ້າງອານາຈັກຂອງພຣະເຈົ້າ, ແລະ ທີ່ຈະສະຖາປະນາຄວາມຊອບທຳຂອງພຣະອົງ, ແລະ ສິ່ງທັງໝົດເຫລົ່ານີ້ ຈະຖືກເພີ່ມເຕີມໃຫ້ແກ່ພວກເຈົ້າ.