Veivuke ni Vuli

iTaba ni iTukutuku Makawa ni Lotu

Lewe ni iVola
iVakamacala Taumada
Raici Vakararaba
1. Veikau Tabu
2. Delana ko Kumora kei na iWasewase ko Palamaira Menijesita
3. Vale Tolonikau nei Josefa Simici Levu
4. Vale ni Tabaivola na Karinidini
5. Uciwai na Sasukuena
6. Vanua a tu kina na iTikotiko nei Pita Witima Levu
7. Sitoa nei Niueli K. Witini kei na Kabani
8. Nodratou Vale na Joni Jonesoni
9. Valetabu e Katiladi
10. Atama-onitai-Amani
11. Vanua ena tara kina na Valetabu e Fa Wesi
12. Valeniveivesu e Lipati
13. Na Vale Levu e Nauvu
14. Sitoa Simede Damudamu nei Parofita Josefa Simici
15. Valetabu e Nauvu
16. Valeniveivesu e Kaceji
17. Na Lako Yani ki na Ra
18. Valetabu e Salt Lake

iTaba ni iTukutuku Makawa ni Lotu

iTaba ni iTukutuku Makawa ni Lotu

iVakamacala Taumada
Na itaba eso oqo ni veivanua ena itukutuku makawa ni Lotu e vakaraitaka na veivanua era a lakova na Yalododonu Edaidai taumada, era a bula ka vakatavuvuli voli kina na parofita ni gauna oqo, ka yaco kina e vuqa na veika a yaco vakaivolanikalou.
Raici Vakararaba
Na mape e ra e vakaraitaka na vanua e tu kina na itaba ena iwasewase oqo. Ena veidraunipepa e tarava, na itaba nabataki yadua ena sala vata mai kei na dua na ivakamacala lekaleka ni veika e yaco tiko. Sa na qai tuvai mai na veika vakaivolanikalou ni vanua koya, vata kei na idusidusi vakaivolanikalou me rawa kina ni o kila na vanua mo wilika kina eso tale na itukutuku ni veika a yaco oqo.
1. Veikau Tabu
Na Veikau Tabu e tu ena tauni ko Palamaira kei Menijesita, e Niu Ioka. Na veikau oqo e toka vaka ki na ra ni vanua a tu kina na nodratou vale na matavuvale na Simici ena 1820.
2. Delana ko Kumora kei na iWasewase ko Palamaira Menijesita
Rai vaka ki na vualiku, e vakaraitaki ena iyaloyalo oqo na Delana ko Kumora e Menijesita, Niu Ioka. E laurai na delana ena tutu imatau e ra ni yaloyalo ka cici sivia vakalailai na veimama ni delana e cake. Na ivakananumi vulavula ka laurai toka ena mua ni delana ki na vualiku e ivakananumi ni agilosi ko Moronai kei na kena yaco mai na iVola i Momani. Na Delana ko Kumora e koto rauta ni 5 na kilomita ena ceva-i-cake ni Veikau Tabu. Na koro ko Palamaira e koto voleka ki na mua ni iyaloyalo ki cake, rauta ni 6½ na kilomita na kena yawa. Na nodratou iteitei na Simici kei na Veikau Tabu erau koto ena yasa i cake ni iyaloyalo ki na imawi.
3. Vale Tolonikau nei Josefa Simici Levu
Na ivakatakarakara ni vale nei Josefa Simici Levu, ka tara ena vanua a dabe toka kina na vale dina volekati Palamaira e Niu Ioka. Eratou a tara na matavuvale na Simici na vale tolonikau taba 1½ sega ni dede ena nodratou yaco mai ki Palamaira. Eratou a vakaitikotiko eke na matavuvale mai na 1819 ki na 1825.
4. Vale ni Tabaivola na Karinidini
Na vale ni tabaivola vakavoui nei Ekaputi B. Karinidini mai Palamaira, Niu Ioka, ka a tabaki kina na imatai ni ilavelave ni iVola i Momani ena 1830. A mokititaka na nona vanua ni teitei ka volitaka e dua na tikina ko Matini Erisi me saumi kina na kena taba e 5,000 na ilavelave ni iVola i Momani. Sa tekivu na kena tuvalaki na ivola ena Okosita 1829, ka sa tu na ilavelave sa taba rawa ena 26 ni Maji 1830.
5. Uciwai na Sasukuena
Na iyaloyalo oqo e vakaraitaka na Uciwai na Sasukuena ena Tauni ko Amoni e Penisilivenia.
6. Vanua a tu kina na iTikotiko nei Pita Witima Levu
Na vale tolonikau oqo e matataka na itikotiko taumada nei Pita Witima Levu mai Feiete, Niu Ioka.
7. Sitoa nei Niueli K. Witini kei na Kabani
E dua na itavi bibi a qaravi ena sitoa oqo nei Niueli K Witini ena itukutuku makawa ni Lotu e Katiladi. Erau a vakaitikotiko vakalekaleka eke ko Josefa kei Ema Simici. A ciqomi eke e vica na ivakatakila bibi. A dau vakayacori ena sitoa na nodra Vuli na Parofita mai na ika 24 ni Janueri 1833 me yacova e dua na gauna ena Epereli 1833.
8. Nodratou Vale na Joni Jonesoni
Na nodrau vale ko Joni kei Alisi Jonesoni a tu mai Airame, Oaio. Na rumu oqo e tiko ena ikarua ni itabavale.
9. Valetabu e Katiladi
Na Valetabu e Katiladi e tiko e Katiladi, Oaio.
10. Atama-onitai-Amani
Ni da rai vaka ki na ceva kosova na buca ko Atama-onitai-Amani, e dua na buca vakadigagalu ka totoka ena vua-i-ra kei Misuri volekata na itikotiko ko Qalatini.
11. Vanua ena tara kina na Valetabu e Fa Wesi
Na itikotiko e Fa Wesi, Misuri, sa yaco me nodra itikotiko e 3,000 ki na 5,000 na Yalododonu ka ra a dro tani mai na veivakacacani ena yasayasa vaka-Jekesoni kei Kilei. Ena 1838 a vakaroti ira na Yalododonu na Turaga me ra tara eke e dua na valetabu (raica na V&V 115:7–8). A mani sega ni rawa ni yaco vakakina ena nodra veivakacacani na dauvakacaca. Ena i ka 31 ni Okotova ni yabaki oya, era a tauri vakavesu kina na Parofita ko Josefa Simici kei ira na iliuliu ni Lotu tale eso, ia ni oti e dua na veilewai mai Rijimodi, eratou a qai bala ki na Valeniveivesu mai Lipati. Ena vulaibatabata mai na 1838–1839, era a vakasevi na Yalododonu Edaidai mai Fa Wesi kei na veivanua tale eso e Misuri ka ra laki tawavanua e Ilinoi.
12. Valeniveivesu e Lipati
Na valeniveivesu mai Lipati, e Misuri. Eratou a tauri vakavesu vakatawadodonu tiko ena loma ni kena lalaga 1.2 na mita na kena vavaku ko Josefa Simici kei na lima tale na turaga mai na ika 1 ni Tiseba 1838 ki na 6 ni Epereli 1839. (A sereki ko Sidini Rikitoni ena mua ni Feperueri.) Ni ratou sa laki sogo tu ena itabavale e ra sara se na iwase butobuto ni vale, eratou moce ena simede batabata, ena buturara ka conaki ena co madu ka lailai sara na kena rarama kei na kena taqomaki mai na draki batabata.
13. Na Vale Levu e Nauvu
Eratou a toki ki na Vale Levu e Nauvu ena Okosita 1843 ko Josefa Simici Lailai kei na nona matavuvale. E muri a qai semati ena dua tale na vale, na yasa ni vale ki na tokalau me 22 taucoko kina na kena rumu. Me tekivu ena Janueri ni 1844, sa cicivaka kina na otela ko Epenesa Robinisoni, ka taura e ono na rumu na Parofita me baleta na nona matavuvale. Sa dau vakayagataki na vale me vanua ni veilasamaki vei ira na vakaitikotiko e Nauvu. Sa dau ciqomi ira na vakaitutu lelevu eke na Parofita.
14. Sitoa Simede Damudamu nei Parofita Josefa Simici
Na sitoa kei na valenivolavola vakavoui oqo nei Josefa Simici Lailai e tiko e Nauvu, Ilinoi. Oqori e dua vei ira na vale bibi duadua ena Lotu ena gauna vaka-Nauvu. E sega walega ni sitoa, a yaco talega me vanua ni itavi ni veimaliwai, veika ni bula vakailavo, veika vakapolitiki, kei na veika vakalotu. A tiko na valenivolavola nei Josefa Simici ena ikarua ni itabavale.
15. Valetabu e Nauvu
Na Valetabu taumada e Nauvu a tara ena vatu buso vulavula dravu ni vanua ko ya. Na vale oqo e 39 na mita na kena balavu ka 27 na mita na kena raba. Na delana e rauta ni 48 na mita mai na dela ni qele. Era a solibula vakalevu na lewe ni lotu me tara kina na valetabu totoka oqo, a tekivutaki na kena cakacaka ena 1841. Eso era cakacaka tu me vica na vula ena tara vale; eso tale era solia na nodra ilavo. E dina ni se bera sara ni tara vakaoti, a vakasinaiti na valetabu mai vei ira na lewenilotu era lako mai me baleta na veicakacaka vakalotu ena veivula eso ni se bera ni ra dro yani ki na Ra. Ni ra sa biuti Nauvu e lewe vuqa na Yalododonu ena itekivu ni vulaitubutubu ni 1846 ena nodra rerevaka na vakacaca mai vei ira na ilawalawa dauvakacaca, era a tu laivi mai e dua na ilawalawa me ra vakacavara na valetabu. Ena 30 ni Epereli, 1846, era vakatabuya kina na vale ni Turaga oqo o rau o Elder Osoni Aidi kei Wilivote Uturavu ena Kuoramu ni Le Tinikarua kei na rauta ni 20 tale. A qai biu tu na valetabu ena Sepiteba ni ra sa vakasevi tani mai Nauvu na vo ni lewe ni Lotu; era qai vakacacana na dauvakacaca na vale tabu oqo. A vakarusai na lomana ena bukawaqa ena Okotova ni 1848. Na valetabu qai taravou tale (ka taba toka oqo), e dua na vakavoui dina ni kena a tara taumada, a vakatabuya o Peresitedi Gordon B. Hinckley mai na ika 27–30 ni June 2002.
16. Valeniveivesu e Kaceji
Na valeniveivesu ena koro ko Kaceji, e Ilinoi.
17. Na Lako Yani ki na Ra
Na itekivu ni kena vakalalai ko Nauvu, e Ilinoi a nakiti me vakayacori ena Maji–Epereli, ia ena vuku ni nodra veivakarerei na ilawalawa dauvakacaca sa mani lewa kina ko Peresitedi Biriqemu Yaga me na qai tekivu na nodra lako yani na Yalododonu ena nodra kosova na Uciwai na Misisipi ena i ka 4 ni Feperueri 1846. A tiko mai ko Peresitedi Yaga me qarava na nodra edaumeni na Yalododonu ka sega kina ni biuti Nauvu me yacova na loma ni vula ko Feperueri.
18. Valetabu e Salt Lake
Valetabu e Salt Lake ni laurai mai na vua-i-cake. Ni oti e vica na siga ena nodra curuma yani na Bucabuca ni Salt Lake na imatai ni kabani ivuvu, a mokuta na qele ko Peresitedi Biriqemu Yaga ena nona ititoko ka kacivaka, “Eke eda na tara kina na valetabu ni noda Kalou.” A kelivaki na qele ena ika 14 ni Feperueri 1853. Ena ika 6 ni Epereli 1853, sa vakadaberi kina na vatunitutu. A vakacavari ka vakatabui na valetabu ena 40 na yabaki mai ki muri ena ika 6 ni Epereli 1893. Eratou dau bose eke ena veimacawa na Mataveiliutaki Taumada kei na Kuoramu ni iApositolo Le Tinikarua me ratou veivosakitaka ka vakasaqara na veidusimaki ni Turaga ena kena cakacakataki ka tarai cake na matanitu ni Kalou.