Introdukshon

Doktrina i Kombenionan ta un kolekshon di revelashonnan divino i deklarashonnan inspirá duná pa e establesimentu i regulashon di e reino di Dios riba tera den e delaster dianan. Aunke ku mayoria di e sekshonnan tabata dirigí na miembronan di E Iglesia di Hesu-Kristu di e Santunan di e Delaster Dianan, e mensahe, atvertensia, i eksòrtashonnan ta pa e benefisio di henter humanidat i ta kontené un invitashon na tur hende tur kaminda pa skucha e stèm di Señor Hesu-Kristu, papiando na nan pa nan bienestar temporal i nan salbashon sempiterno.

Mayoria di e revelashonnan den e kompilashon aki a wòrdu risibí pa medio di José Smith Jr., e promé profeta i presidente di E Iglesia di Hesu-Kristu di e Santunan di e Delaster Dianan. Otronan a wòrdu emití pa medio di algun di su susesornan den e Presidensia (wak enkabesamentunan di D&K 135, 136 i 138, i Deklarashonnan Ofisial 1 i 2).

E buki di Doktrina i Kombenionan ta un di e obranan kanóniko di e Iglesia huntu ku e Beibel Santu, e Buki di Mormon, i e Pèrla di Gran Balor. Sinembargo, Doktrina i Kombenionan ta úniko pa motibu ku e no ta un tradukshon di un dokumento antiguo, pero e ta di orígen modèrno i a wòrdu duná di Dios pa medio di Su profetanan skohí pa e restourashon di Su obra Santu i e establesimentu di e reino di Dios na tera den e dianan aki. Den e revelashonnan, por skucha e stèm tierno pero firme di Señor Hesu-Kristu, papiando un biaha mas den e dispensashon di e plenitut di tempu; i e obra ku ta inisiá ku esaki ta preparatorio pa Su Segundo Binida, den kumplimentu i konforme esakinan ku e palabranan di e santu profetanan for di prinsipio di mundu.

José Smith Jr. a nase dia 23 di desèmber 1805, na Sharon, Kondado di Windsor, Vermont. Durante su infansia, el a muda ku su famia na kaminda awendia yama Manchester, na parti wèst di New York. Miéntras e tabata biba einan durante e primavera di 1820, tempu e tabatin dieskuater aña di edat, el a eksperensiá su promé vishon, den kual Dios, e Tata Eterno i Su Yu Hesu-Kristu a bishit’é den persona. A bis’é den e vishon aki ku e Iglesia berdadero di Hesu-Kristu ku a wòrdu establesé den tempunan di Tèstamènt Nobo, i kual a atministrá e plenitut di e evangelio, no tabata eksistí mas na mundu. A sigui otro manifestashonnan divino den kua el a wòrdu siñá dor di hopi angel; i a mustr’é ku Dios tabatin un obra spesial pa e hasi na tera i ku pa medio di dje e Iglesia di Hesu-Kristu lo wòrdu restourá na tera.

Den transkurso di tempu, José Smith a wòrdu kapasitá pa medio di asistensia divino pa tradusí i publiká e Buki di Mormon. Miéntras tantu e i Oliver Cowdery a wòrdu ordená na e Saserdosio Aaróniko pa medio di Huan e Boutista na mei 1829 (wak D&K 13), i poko despues nan a wòrdu ordená tambe na e Saserdosio di Melkisedèk dor di apòstelnan antiguo Pedro, Hakobo i Huan (wak D&K 27:12). A sigui otro ordenashonnan den kual yabinan di saserdosio a wòrdu konferí dor di Moises, Elias e Profeta, Elias i hopi profeta antiguo (wak D&K 110; 128:18, 21). E ordenashonnan aki tabata, de echo, un restourashon di outoridat divino na hende riba tera. Dia 6 di aprel 1830, bou di direkshon selestial, e Profeta José Smith a organisá e Iglesia, i asina e Iglesia berdadero di Hesu-Kristu tabata operashonal un biaha mas komo un institushon entre hende, ku outoridat pa siña e evangelio i atministrá e ordenansanan di salbashon. (Wak D&K 20 i e Pèrla di Gran Balor, José Smith—Historia 1.)

E revelashonnan sagrado aki a wòrdu risibí komo kontesta na orashon, den tempunan di nesesidat, i a surgi for di situashonnan real di bida ku ta envolví hende real. E profeta i esnan ku e tabata asosiá kuné a buska guia divino, i e revelashonnan aki ta sertifiká ku nan a risibié. Den e revelashonnan, por mira e restourashon i despliege di e evangelio di Hesu-Kristu i e introdukshon di e dispensashon di e plenitut di tempunan. Ta mustrá tambe den e revelashonnan aki e movementu pa wèst di e Iglesia for di New York i Pennsylvania pa Ohio, pa Missouri, pa Illinois, i finalmente na e Gran Vaye di Amérika parti wèst i e esfuersonan grandi di e Santunan den prokurá pa establesé Sion riba tera den tempunan modèrno.

Vários di e promé sekshonnan ta trata asuntunan ku tin di aber ku e tradukshon i publikashon di e Buki di Mormon (wak sekshonnan 3, 5, 10, 17, i 19). Algun sekshon posterior ta reflehá e obra di e Profeta José Smith den preparashon di un tradukshon inspirá di e Beibel, durante kual a risibí hopi di e sekshonnan doktrinal (wak, por ehèmpel, sekshonnan 37, 45, 73, 76, 77, 86, 91 i 132, kada un di kual tin algun relashon direkto ku e tradukshon di e Beibel).

Den e revelashonnan, e doktrinanan di e evangelio ta wòrdu eksponé ku splikashonnan tokante tal asuntunan fundamental manera e natularesa di e Deidat, e orígen di hende, e realidat di Satanas, e propósito di mortalidat, e nesesidat pa obediensia, e nesesidat pa arepentimentu, e obranan di e Spiritu Santu, e ordenansa i práktikanan ku ta pertenesé na salbashon, e destino di mundu, e futuro kondishonnan di hende despues di e Resurekshon i e huisio, e eternidat di relashon matrimonial i e naturalesa eterno di e famia. Meskos, ta indiká e despliege gradual di e struktura atministrativo di e Iglesia ku e yamamentu di obisponan, e Promé Presidensia, e Konseho di e Diesdosnan, i e Setenta i e establesimentu di otro ofisio i quorumnan ku ta presidí. Finalmente, e testimonio ku a wòrdu duná di Hesu-Kristu—Su divinidat, Su mahestuosidat, Su perfekshon, Su amor i Su poder redentor—ta hasi e buki aki di gran balor pa e famia humano i “ta bal pa e Iglesia meskos ku e rikesanan di henter Tera” (wak enkabesamentu di D&K 70).

E revelashonnan a wòrdu registrá originalmente dor di José Smith su skirbidónan, i miembronan di Iglesia a kompartí ku entusiasmo un ku otro e kopianan skirbí na man. Pa krea un registro mas permanente, skirbidónan poko despues a kopia e revelashonnan aki den bukinan di registro manuskrito, kual lidernan di Iglesia a usa den preparashon pa e revelashonnan ku ta bai wòrdu imprimí. José i e promé Santunan a wak e revelashonnan manera nan tabata wak e Iglesia: bibu, dinamiko, i suheto na refinashon ku revelashon adishonal. Nan a rekonosé tambe ku erornan no intenshonal lo a sosodé den e proseso di kopiamentu di e revelashonnan i preparashon pa publikashon. Pues, un konferensia di Iglesia a puntra José Smith na 1831 pa “korehí e erornan òf fayonan ei kual e por enkontrá pa medio di e Spiritu Santu.”

Despues ku e revelashonnan a wòrdu revisá i korehí, miembronan di Iglesia na Missouri a kuminsá imprimí un buki titulá A Book of Commandments for the Government of the Church of Christ (Un Buki di Mandamentunan pa e Gobernashon di e Iglesia di Kristu), kual tabata kontené hopi di e promé revelashonnan di e Profeta. Sinembargo, e promé intento pa publiká e revelashonnan a kulminá, ora un multitut maligno a destruí e ofisina di imprenta di e Santunan na Kondado di Jackson dia 20 di yüli 1833.

Ora el a tende di e destrukshon di e ofisina di imprenta na Missouri, José Smith i otro lidernan di Iglesia a kuminsá e preparativonan pa publiká e revelashonnan na Kirtland, Ohio. P’asina, un biaha mas, korehí erornan, aklará terminonan i rekonosé e desaroyonan den doktrina i organisashon di Iglesia, José Smith a supervisá e edishon di e teksto di algun revelashonn pa prepará nan pa publikashon na 1835 komo Doctrine and Covenants of the Church of the Latter Day Saints (Doktrina i Kombenionan di e Iglesia di e Santunan di e Delaster Dianan). José Smith a outorisá un otro edishon di e Doktrina i Kombenionan, kual a wòrdu publiká algun luna despues di e martirio di e Profeta na 1844.

E promé Santunan di e Delaster Dianan a balorá e revelashonnan i a konsiderá nan komo mensahenan di Dios. Na un okashon na final di 1831, vários ansiano di Iglesia a duna testimonio solèm ku Señor a duna testimonio na nan alma di e bèrdat di e revelashonnan. E testimonio aki a wòrdu publiká den e edishon di 1835 di Doktrina i Kombenionan komo e testimonio skirbí di e Diesdos Apòstelnan:

Testimonio di e
Diesdos Apòstelnan relashoná ku e Bèrdat di e
Buki di Doktrina i Kombenionan

E Testimonio di e Testigunan di e Buki di e Mandamentunan di Señor, kual mandamentunan El a duna na Su Iglesia pa medio di José Smith, Jr., kende e bos di Iglesia a apuntá pa e propósito aki:

Nos, pues, ta sinti dispuesto pa duna testimonio na henter e género humano, na kada kriatura riba e superfisie di tera, ku Señor a duna testimonio na nos alma, pa medio di e Spiritu Santu ku a wòrdu dramá riba nos, ku e mandamentunan aki a wòrdu duná pa medio di inspirashon di Dios, i ta di benefisio pa tur hende i realmente ta bèrdat.

Nos ta duna e testimonio aki na mundu, Señor siendo nos ayudante; i ta pa medio di e grasia di Dios e Tata, i Su Yu, Hesu-Kristu, ku ta permití nos di tin e privilegio aki di duna e testimonio aki na mundu, den kual nos ta regosihá ekstremadamente, hasiendo orashon na Señor semper pa e yunan di hende por benefisiá di esaki.

E nòmbernan di e Diesdosnan tabata:

Thomas B. Marsh
David W. Patten
Brigham Young
Heber C. Kimball
Orson Hyde
William E. McLellin
Parley P. Pratt
Luke S. Johnson
William Smith
Orson Pratt
John F. Boynton
Lyman E. Johnson

Den edishonnan susesivo di e Doktrina i Kombenionan, revelashonnan adishonal òf otro asuntunan di registro a wòrdu agregá, manera risibí i manera aseptá pa medio di asambleanan òf konferensianan kompetente di Iglesia. E edishon di 1876, prepará pa Èlder Orson Pratt bou di direkshon di Brigham Young, a areglá e revelashonnan kronológikamente i a agregá enkabesamentunan nobo ku introdukshonnan históriko.

Kuminsando ku e edishon di 1835, un seri di shete lès teológiko tambe a wòrdu inkluí; esakinan tabata titulá Lectures on Faith (Lekturanan tokante Fe). Esakinan a wòrdu prepará pa usa den e Skol di e Profetanan na Kirtland, Ohio, di 1834 pa 1835. Aunke di benefisio pa doktrina i instrukshon, e lekturanan aki a wòrdu omití for di Doktrina i Kombenionan for di e edishon di 1921 pasobra nan no a wòrdu duná òf presentá komo revelashonnan na e Iglesia kompletu.

Den e edishon na ingles di 1981 di Doktrina i Kombenionan, tres dokumento a wòrdu inkluí pa promé biaha. Esakinan ta sekshonnan 137 i 138, ku ta pone e fundamentonan di salbashon pa e mortonan; i Deklarashon Ofisial 2, anunsiando ku tur miembro maskulino digno di Iglesia por wòrdu ordená na e saserdosio sin konsiderashon di rasa òf koló.

Den kada edishon nobo di Doktrina i Kombenionan a korehí erornan di pasado i a agregá informashon nobo, partikularmente den e porshonnan históriko di e enkabesamentunan di e sekshon. E edishon aktual ta sigui refiná fecha i nòmbernan di lugánan i ta hasi otro korekshonnan. E kambionan aki a wòrdu hasí pa hiba e material na konformidat ku e informashon históriko mas eksakto. Otro karakterístikanan spesial di e edishon mas resien aki ta inkluí mapanan revisá ku ta mustra e sitionan geográfiko prinsipal den kual e revelashonnan a wòrdu risibí, ademas fotografianan mehorá di sitionan históriko di Iglesia, referensianan ku korelashon, enkabesamentu di sekshonnan, i resúmennan di tema, tur di kual ta diseñá pa yuda lektornan komprondé i regosihá den e mensahe di Señor manera duná den Doktrina i Kombenionan. Informashon pa e enkabesamentu di e sekshonnan a wòrdu tumá for di e Manuskrito di Historia di Iglesia i History of the Church (Historia di Iglesia) publiká (kolektivamente referí na dje den e enkabesamentunnan komo historia di José Smith) i Joseph Smith Papers (Dokumentonan di José Smith).

Translation in Progress