1 Mira, mi ta bisa n’abo ku komo ku mi siervo Martin Harris a deseá un testimonio for di mi man, ku abo, mi siervo José Smith, Jr., tin e planchanan di kual bo a testifiká i duna testimonio ku bo a risibí for di mi;

2 I awor, mira, esaki lo bo bis’é—esun ku a papia ku bo, a bisa n’abo: Ami, Señor, ta Dios, i a duna esakinan n’abo, mi siervo José Smith, Jr., i a manda bo pa bo para komo un testigu di e kosnan aki;

3 I mi a rekerí pa bo drenta den un kombenio ku mi, pa bo no mustra nan eksepto na e personanan na kende ami a manda bo; i bo no tin poder riba nan eksepto ku ami konsedé esaki n’abo.

4 I bo tin un don pa tradusí e planchanan; i esaki ta e promé don ku mi a konferí n’abo; i mi a manda bo pa no profesá di tin ningun otro don te ora mi propósito wòrdu kumplí den esaki; pasobra lo mi no konsedé n’abo ningun otro don te ora ku e realisá.

5 Di bèrdat, mi ta bisa n’abo, ku angustia lo bini riba e habitantenan di e tera si nan no skucha mi palabranan;

6 Pasobra mas despues lo bo wòrdu ordená pa bai i komuniká mi palabranan na e yunan di hende.

7 Mira, si nan no kere mi palabranan, nan lo no kere bo, mi siervo José, si e tabata posibel pa bo mustra nan tur e kosnan aki kual mi a konfia n’abo.

8 O, e generashon inkredulo i tèrko aki—mi rabia ta sendé kontra nan.

9 Mira, di bèrdat, mi ta bisa n’abo, mi a reservá e kosnan ei kual mi a konfia n’abo, mi siervo José Smith, pa un propósito sabio den mi, i e lo wòrdu revelá na futuro generashonnan;

10 Pero e generashon aki lo risibí mi palabra pa medio di bo;

11 I ademas di bo testimonio, e testimonio di tres di mi siervonan, kende lo mi yama i ordená, na ken lo mi mustra e kosnan aki i nan lo sali ku mi palabranan ku a wòrdu duná pa medio di bo.

12 Sí, nan lo sa ku siguridat ku e kosnan aki ta bèrdat, pasobra for di shelu lo mi deklar’é na nan.

13 Lo mi duna nan poder pa nan por mira i kontemplá e kosnan aki manera nan ta;

14 I na ningun otro hende lo mi konsedé e poder aki, pa risibí e mesun testimonio entre e generashon aki, den e komienso aki di e lantamentu di mi iglesia i su salida for di e desierto—kla manera luna, i briyante manera solo, i teribel manera un ehérsito ku bandera.

15 I lo mi manda e testimonio di tres testigu di mi palabra.

16 I mira, ken ku kere den mi palabranan, nan lo mi bishitá ku e manifestashon di mi Spiritu; i nan lo nase di mi, asta di awa i di e Spiritu—

17 I bo mester warda un poko mas, pasobra bo no a wòrdu ordená ainda—

18 I nan testimonio tambe lo sali pa kondenashon di e generashon aki si nan hasi nan kurason duru kontra nan;

19 Pasobra un plaga desolador lo sali entre e habitantenan di e tera, i lo sigui wòrdu dramá di tempu pa tempu, si nan no arepentí, te ora ku e tera bira bashí, i e habitantenan di esaki wòrdu konsumí i destruí kompletamente dor di e splendor di mi binida.

20 Mira, mi ta bisa bo e kosnan aki, meskos ku mi a anunsiá tambe na e pueblo tokante e destrukshon di Herusalèm; i mi palabra lo wòrdu verifiká na e momentu aki manera el a wòrdu verifiká antes.

21 I awor, mi siervo José, mi ta manda bo pa arepentí i kana mas rekto dilanti mi, i pa no sede mas na persuashonnan di hende;

22 I pa bo ta firme den warda e mandamentunan ku kual mi a manda bo; i si bo hasi esaki, mira mi ta konsedé bo bida eterno, asta si bo bida wòrdu kitá.

23 I awor, atrobe, mi ta papia n’abo, mi siervo José, konserniente e hòmber ku ta deseá e testimonio—

24 Mira, mi ta bisa na dje, e ta alsa su mes i no ta humiliá su mes sufisientemente dilanti mi; pero si e lo bùig dilanti mi, i humiliá su mes den orashon ferviente i fe, den e sinseridat di su kurason, e ora ei lo mi konsedé un bista di e kosnan kual e ta deseá pa wak.

25 I e ora ei e lo bisa na e pueblo di e generashon aki: Mira, mi a wak e kosnan kual Señor a mustra na José Smith Jr., i mi sa ku siguransa ku nan ta bèrdat, pasobra mi a wak nan, pasobra a mustra nan n’ami pa medio di e poder di Dios i no di hende.

26 I ami Señor ta manda mi siervo Martin Harris, pa e no papia mas na nan konserniente e kosnan aki, eksepto e lo bisa: Mi a wak nan, i el a mustra nan n’ami pa medio di e poder di Dios; i esakinan ta e palabranan kual e lo bisa.

27 Pero si e ninga esaki e lo kibra e kombenio kual el a hasi ku mi previamente, i mira, e lo wòrdu kondená.

28 I awor, eksepto e humiliá su mes i konfesá na ami e kosnan ku el a hasi kual ta robes, i hasi kombenio ku mi ku e lo warda mi mandamentunan, i ehersé fe den mi, mira, mi ta bisa na dje, e lo no tin tal manifestashonnan, pasobra ami lo no permitié wak e kosnan di kual mi a papia.

29 I si esaki ta e kaso, mi ta manda bo, mi siervo José, pa abo bisa na dje, ku e lo no hasié mas, ni molestiá mi mas konserniente e asuntu aki.

30 I si esaki ta e kaso, mira, mi ta bisa n’abo José, ku ora bo a tradusí algun página mas lo bo stòp pa un tempu, asta te ora mi manda bo atrobe; e ora ei bo por tradusí atrobe.

31 I eksepto bo hasi esaki, mira, lo bo no tin e don mas, i lo mi kita e kosnan kual mi a konfiá bo kuné.

32 I awor, pasobra mi ta premirá e espera pa destruí bo, sí, mi ta antisipá ku si mi siervo Martin Harris no humiliá su mes i risibí un testimonio for di mi man, ku e lo kai den transgreshon;

33 I tin hopi ku ta warda pa destruí bo for di e superfisie di tera; i pa e motibu aki, pa bo dianan por wòrdu prolongá, mi a duna bo e mandamentunan aki.

34 Sí, pa e motibu aki mi a bisa: Stòp, i para ketu te ora mi manda bo, i lo mi proveé ​​medionan pa kumpli ku e lokual mi a manda bo.

35 I si bo ta fiel den warda mi mandamentunan, lo bo wòrdu alsá na e delaster dia. Amèn.