Doktrina i Kombenionan

1 Skucha, O boso pueblo di mi iglesia, e stèm di esun ku ta biba den altura ta bisa, i kende su wowonan ta riba tur hende; sí, di bèrdat mi ta bisa: Skucha, boso, pueblo lehano; i boso ku ta riba e islanan den laman, skucha konhuntamente.

2 Pasobra di bèrdat e stèm di Señor ta dirigí na tur hende, i no tin ningun ku por skapa; i no tin wowo ku lo no mira, tampoko orea ku lo no skucha, tampoko kurason ku lo no wòrdu penetrá.

3 I esnan rebelde lo wòrdu penetrá ku hopi tristesa; pasobra lo papia di nan maldatnan riba e daknan di kas, i nan echonan sekreto lo wòrdu revelá.

4 I e stèm di atvertensia lo bai na tur pueblo, pa medio di e boka di mi disipelnan, kende ami a skohe den e delaster dianan aki.

5 I nan lo bai i ningun lo para nan, pasobra ami Señor a manda nan.

6 Mira, esaki ta mi outoridat, i e outoridat di mi siervonan, i mi prefasio na e buki di mi mandamentunan, kual ami a duna nan pa publiká pa boso, O habitantenan di e tera.

7 Pues, teme i tembla, O boso, pueblo, pasobra lokual ami Señor a dekretá lo wòrdu kumplí den nan.

8 I di bèrdat mi ta bisa na boso, ku esnan ku sali dunando e bon notisianan aki na e habitantenan di e tera, na nan poder lo wòrdu duná pa seya tantu na tera i den shelu, na e inkredulo i rebelde;

9 Sí, di bèrdat, pa seya nan pa e dia ora ku e furia di Dios lo wòrdu dramá sin midí riba e malbadonan—

10 Pa e dia ora ku Señor lo bini pa rekompensá na kada hende di akuerdo ku su obra, i midi kada hende di akuerdo ku e midí kual el a midi su próhimo.

11 Pues e stèm di Señor ta dirigí te na e ekstremonan di e tera, pa tur ku kièr skucha por skucha:

12 Boso prepará, boso prepará pa e lokual tin di bini, pasobra Señor ta serka;

13 I e rabia di Señor ta sendé, i su spada ta limpiá den shelu, i e lo kai riba e habitantenan di tera.

14 I e brasa di Señor lo wòrdu revelá; i e dia lo yega ku esnan ku no kièr skucha e stèm di Señor, tampoko e stèm di su siervonan, tampoko pone atenshon na e palabranan di e profeta i apòstelnan, lo wòrdu kòrtá for di entre e pueblo;

15 Pasobra nan a desviá for di mi ordenansanan, i a kibra mi kombenio sempiterno;

16 Nan no ta buska Señor pa establesé su hustisia, pero kada hòmber ta kana den su propio kaminda, i segun e imágen di su propio dios, kende su imágen ta den e semehansa di e mundu, i kende su supstansia ta esun di un ídolo, kual ta bira bieu i lo bai pèrdí den Babilonia, asta e gran Babilonia, kual lo kai.

17 Pues, ami Señor, sabiendo e kalamidat kual lo bini riba e habitantenan di e tera, a yama mi siervo José Smith Jr., i a papia kuné for di shelu, i dun’é mandamentunan;

18 I tambe a duna mandamentunan na otronan, pa nan proklamá e kosnan aki na mundu; i tur esaki pa e lokual e profetanan a skirbi por wòrdu kumplí—

19 E kosnan débil di mundu lo bini i abatí esnan poderoso i fuerte, pa hende no konsehá su próhimo, tampoko konfia den e brasa di karni—

20 Sino ku tur hende por papia den e nòmber di Dios e Señor, asta e Salbador di mundu;

21 Pa fe tambe por oumentá riba tera;

22 Ku mi kombenio sempiterno por wòrdu establesé;

23 Ku e plenitut di mi evangelio por wòrdu proklamá pa medio di e débil i e simpel te na e ekstremonan di tera, i dilanti rei i gobernantenan.

24 Mira, ami ta Dios i a deklar’é; e mandamentunan aki ta di mi, i a wòrdu duná na mi siervonan den nan debilidat, segun e manera di nan idioma, pa nan por yega na entendimentu.

25 I di tal manera ku nan faya, e por wòrdu manifestá;

26 I di tal manera ora nan buska sabiduria nan por wòrdu instruí;

27 I di tal manera ora nan peka nan por wòrdu disipliná, pa nan por arepentí;

28 I di tal manera ora ku nan ta humilde nan por wòrdu fortalesé, i bendishoná for di altura, i risibí konosementu di tempu pa tempu.

29 I ku mi siervo José Smith, Jr., despues di a risibí e registro di e Nefitanan, por tin e poder pa tradusí e Buki di Mormon pa medio di e mizerikòrdia di Dios i e poder di Dios.

30 I tambe esnan na kende e mandamentunan aki a wòrdu duná, por tin poder pa establesé e fundeshi di e iglesia aki, i lag’é sali for di skuridat i for di tiniebla, e úniko iglesia berdadero i bibiente riba e superfisie di henter e tera, ku kual ami, Señor, ta hopi komplasí, papiando na e iglesia kolektivamente i no individualmente—

31 Pasobra ami Señor no por konsiderá piká ku e mas mínimo grado di toleransia.

32 No opstante, esun ku arepentí i kumpli ku e mandamentunan di Señor lo wòrdu pordoná;

33 I esun ku no arepentí, for di dje lo kita asta e lus kual el a risibí; pasobra mi Spiritu lo no lucha semper ku hende, e Señor di Ehérsitonan ta bisa.

34 I atrobe, di bèrdat mi ta bisa na boso, O habitantenan di e tera: Ami Señor ta dispuesto na hasi e kosnan aki konosí na tur karni;

35 Pasobra ami no ta hasi eksepshon di persona, i kièr pa tur hende sa ku e dia lo yega lihé; e ora no a yega ainda, pero e ta serka, ora pas lo wòrdu kitá for di tera, i e diabel lo tin poder riba su propio dominio.

36 I tambe Señor lo tin poder riba su santunan, i lo reina meimei di nan, i lo baha den huisio riba Idumea, òf e mundu.

37 Skrudiñá e mandamentunan aki, pasobra nan ta bèrdat i fiel, i e profesianan i promesanan kual nan ta kontené, tur lo wòrdu kumplí.

38 Loke ami Señor a bisa, mi a bisa, i mi no ta diskulpá mi mes; i aunke e shelunan i e tera stòp di eksistí, mi palabra lo no stòp di eksistí, pero tur lo wòrdu kumplí, sea pa medio di mi propio stèm òf pa medio di e stèm di mi siervonan, e ta meskos.

39 Pasobra mira, i wak, Señor ta Dios, i e Spiritu ta duna testimonio, i e testimonio ta bèrdat, i e bèrdat ta permanesé pa semper hamas. Amèn.