Sekshon 8
Revelashon duná pa medio di José Smith e Profeta na Oliver Cowdery, na Harmony, Pennsylvania, na aprel 1829. Den kurso di e tradukshon di e Buki di Mormon, Oliver, ku a sigui sirbi komo skirbidó, skirbiendo loke e Profeta tabata dikta, a deseá na ta investí ku e don di tradukshon. Señor a respondé na su súplika dor di konsedé e revelashon aki.
1–5, Revelashon ta bini pa medio di e poder di e Spiritu Santu; 6–12, Konosementu di e misterionan di Dios i e poder pa tradusí registronan antiguo ta bini pa medio di fe.
1 Oliver Cowdery, di bèrdat, di bèrdat, mi ta bisa n’abo, ku asina manera Señor, ku ta bo Dios i bo Redentor ta bibu, meskos asina lo bo risibí un konosementu di kualkier kos ku bo pidi ku fe, ku un kurason honesto, keriendo ku lo bo risibí un konosementu konserniente e grabadonan di registronan antiguo, ku ta di antaño, ku ta kontené e partinan ei di mi Skritura di kual a wòrdu papiá pa medio di e manifestashon di mi Spiritu.
2 Sí, mira, lo mi deklará n’abo den bo mente i den bo kurason, pa medio di e Spiritu Santu, kual lo baha riba bo i kual lo habitá den bo kurason.
3 Awor, mira, esaki ta e spiritu di revelashon; mira, esaki ta e spiritu pa medio di kual Moises a trese e yunan di Israel dor di e Laman Kòrá riba tera seku.
4 Pues esaki ta bo don; hasi uso di dje, i bendishoná bo ta, pasobra e lo libra bo for di e man di bo enemigunan, pues si no t’asina, nan lo mata bo i hiba bo alma na destrukshon.
5 O, kòrda e palabranan aki, i warda mi mandamentunan. Kòrda, esaki ta bo don.
6 Awor esaki no ta bo úniko don; pasobra bo tin un otro don, kual ta e don di Aaron; mira, el a manifestá hopi kos n’abo;
7 Mira, no tin otro poder, eksepto e poder di Dios, ku por kousa e don di Aaron aki di ta ku bo.
8 Pues, no duda, pasobra e ta e don di Dios; i lo bo tiné den bo mannan, i hasi obranan maravioso; i ningun poder lo por kit’é for di bo mannan, pasobra e ta e obra di Dios.
9 I, p’esei, kualkier kos ku lo bo pidi mi pa bisa bo pa e medio ei, esei lo mi konsedé n’abo, i lo bo tin konosementu konserniente esaki.
10 Kòrda ku sin fe bo no por hasi nada; pues pidi ku fe. No bagatelisá e kosnan aki; no pidi pa e lokual bo no mester.
11 Pidi pa bo por konosé e misterionan di Dios, i ku bo por tradusí i risibí konosementu for di tur e registronan antiguo ei kual a wòrdu skondí, ku ta sagrado; i segun bo fe e lo wòrdu hasí n’abo.
12 Mira, ta ami ta esun ku a papi’é; i ami ta e mesun ku a papia n’abo for di e komienso. Amèn.