1 Gag, Zeniff, ni kan fil ngog gubin e thin ko fapi Nephites, ma bay e llowaenʼ rog u morngaʼagen farengi binaw rokʼ Nephi, ara morngaʼagen farengi binaw ni sommʼon ni suwey e pi chitamangdaed, ma kuʼun lʼugeg ni guba spy nga fithikʼ fapi Lamanites ni nge yog nug fekthin u rogon e salthaw roraed, gomanga yog ni oge salthaw romaed ngoraed ngan liiʼraed—machane napʼan nug guy boechi yaed nib mangil me mʼag u wunʼug ni nga dab ni liiʼraed ngar mʼaed.

2 Ere, gag e gu mogow puruyʼ ngakʼ pi walageg u lan wuruʼ e binaw, ya gu baʼadag ni angaʼ romaed e nge falʼeg ba michmich ngoraed; machane beeʼ nib kireb ma baʼadag e puʼoeg rachaʼ e yoeg ni ngan liiʼeg nggumʼ; machane gu tawaʼath u dakean e ayuw ni rachaʼ ni mapʼ nib yoʼor ni bachag; ya i cham e matam nge matam, walag nge walag, nge madaʼ ko ngiyalʼ ni ke yoʼor e salthaw romaed ni ke yimʼ u lan wuruʼ e binaw; ma gamaed sul, gamaed e tin nug magaey gaed ni dan liiʼmaed, ko fare binaw nu Zarahemla, ni nggu weliyed e nʼen ni ke buch ngakʼ e pi leʼengiraed nge pi bitir roraed.

3 Ere machane, yigi gel i lemnag rog ni nggu tafnaʼ e binaw ni tafen e pi chitamangmaed, mug kunuy e gidiiʼ nib yoʼor ni baʼadag ni ngar uned ngar tafnayed boech e gi binaw nem, ma arame gu tabab niged bayay e milekag romaed iyaen nga lan wuruʼ e binaw ni nggu waroed ko farengi binaw; machane ggafgow gaed ko uyngol nge pi gafgow ni gel; ya ba sasagaʼal iyib ngaenʼmaed fare Somoel ni Got romaed.

4 Machane, tomuren ni ke yoʼor e rran ni kug garbael gaed u lan wuruʼ e binaw ma gamaed nʼuf e pi tent romaed ngalang ko gin nliiʼ pi walagmaed riy, nib chugur ko farengi binaw ni tafen e pi chitamangmaed.

5 Me yibi buch ni guwaen bayay ni kug fek aningeg e gidiiʼ nggu waroed nga lan fare binaw, ngakʼ fare pilung, ni gomanga gunang laniyaenʼ fare pilung, nge gomanga yog nug nang rayog nug waroed e gidiiʼ rog nggu pired ko farengi binaw u fithikʼ e gapas fa dangay.

6 Mu guwaen ngakʼ fare pilung, me falʼeg ba mʼag u thilmow ni rayog ni nggu paer ko farengi binaw nu Lehi-Nephi, nge farengi binaw nu Shilom.

7 Maki yoeg ko gidiiʼ rokʼ ni ngar chuw gaed ko rangi binaw nem, ere gag nge gidiiʼ rog e guwaroed nga lan farengi binaw ni nggu pired riy.

8 Ma gamaed tabab i toey e naʼun, ma gamaed falʼeg bayay e yoror ko fare binaw, arragon, ni yoror ko fare binaw nu Lehi-Nephi, nge fare binaw nu Shilom.

9 Ma gamaed tabab i falʼeg e mileayʼ, arragon, ni gu yunged gubin mite awoch, ni awoch ko corn, nge wheat, nge barley, nge neas, nge sheum, nge awoch ko gubin mite waʼamngin; ma gamaed tabab ko yoʼor iyaen me felʼ rogmaed u lan farengi binaw.

10 Chiney e fare sabaenbaen nge sasaliyeb rokʼ fare pilung i Laman, e ni fek e gidiiʼ rog riy nga kalbus, ni aram fan ni piiʼ farengi binaw ni nggu pired riy.

11 Ere yibi buch, u tomuren ni kug pired u lan fare binaw ni ragag nge lʼagruw e duw napʼan ma fare pilung i Laman e tabab ko magar, nibe rus ni richey me yoʼor e gidiiʼ rog ngar gel gaed u lan farengi binaw, ma dabiyog ni ngar gel gaed ngoraed ngan fekraed nga kalbus.

12 Chiney e pichaʼanem e bogi gidiiʼ ni yaed ba malmal ma yaed ma liyoer ko liyos; ere yaed baʼadag ni ngar feked gamaed nga kalbus, ni nge yog nra abich gaed u paʼaʼmaed; arragon, ni nge yog nra duruwʼiyed yaed ko pi saaf nu dakean e falang romaed.

13 Ere yibi buch ni fare pilung i Laman e tabab i kʼaring e damomuw ngakʼ e gidiiʼ rokʼ ni ngar togopluw gaed ko gidiiʼ rog; ere arame tabab e mael nge togopluw u lan farengi binaw.

14 Ya, langgin fare ragag nge dalip e duw ko fare lung rokʼ u lan fare binaw rokʼ Nephi, nib palog nga yimuch ko farengi binaw nu Shilom, u napʼan ni gidiiʼ rog e yaed be piiʼ e raen ma yaed be duruwʼiy e saaf roraed, ma yaed be mileayʼ, me yib ba ulung i Lamanites ngoraed mar tabab niged i liiʼraed, ni ngar feked e saaf roraed nge corn roraed u mileayʼ roraed.

15 Arragon, me yibi buch nra miil gaed, ni gubin e piʼin ni dawor ni koelraed, nga lan fare binaw rokʼ Nephi, mar pininged gag ni nggu ayuwegraed.

16 Me yibi buch nug piiʼ ngoraed e gatʼing, nge gane gatʼing, nge sayden, nge sarey, nge gul, nge gawul, nge gubin mite talin e cham nra yog ni nggu falʼeged, me gag nge gidiiʼ rog e guwaroed ngakʼ fapi Lamanites ni nggu mael gaed.

17 Arragon, u dakean gelingin Somoel e guwaroed riy ko mael ngakʼ fapi Lamanites; ya gag nge gidiiʼ rog e rug meybil gaed ni rib almarin ngakʼ Somoel ni nge chuwegmaed u paʼ e pi toʼogor romaed, ya ke yib ngaenʼ maed ba ayuw ni piiʼ ngakʼ e pi chitamangmaed.

18 Ma Got e rungʼag me piiʼ e fulweg ko pi meybil romaed; ma gamaed yaen u gelingin Got; arragon, ma gamaed yaen ko cham ngakʼ fapi Lamanites, ma lan rebe rran nge rebe nepʼ ma kug liiʼed dalip e biyuʼ nge aningeg i ragag nge dalip i yaed; gu liiʼed yaed nge madaʼ ko ngiyalʼ ni kug tulufed raed nga wuruʼ e binaw romaed.

19 Nge gag, ma guʼun ko ayuw i kʼeyag e gidiiʼ roraed ni kar mʼaed. Ere muguyed, rib almarin e kirbaenʼ nge kalngaenʼ ni kug tayed, ya lʼagruw miriʼay nge medilip i ragag nge mereb i walagmaed e kar mʼaed.