1 Me yibi buch u tomuren ni ke muʼ fare pilung i Limhi ko numon ngakʼ e pi gidiiʼ rokʼ, ya boʼor bogi banʼen ni weliy ngoraed ma buchʼuw riy e gu yoloey nga langgin e kaney e babyor, i yog ngakʼ gubin e pi gidiiʼ rokʼ bogi banʼen ni morngaʼagen pi walagraed ni ur moyed u lan fare binaw nu Zarahemla.

2 Me yoeg ngakʼ Ammon ni nge sakʼiy ngalang u pʼoewchen fare ulung i gidiiʼ, nge weliy ngoraed ni yaed gubin e nʼen ni ke buch rokʼ pi walagraed u napʼan ni chuw Zeniff ko farengi binaw nge yibi madaʼ ko ngiyalʼ niʼir e ke chuw ko farengi binaw.

3 Ma ki yoeg ngoraed e tin tomur e thin ni fil fare pilung i Benjamin ngoraed, me weliy fan ngakʼ fapi gidiiʼ rokʼ fare pilung i Limhi, ni nge yog nra nanged fan gubin e pi thin ni ke yoeg.

4 Me yibi buch u tomuren ni ke muʼ i rinʼ gubin e pinnʼey, me yoeg pilung i Limhi ko fare ulung i gidiiʼ ni ngar suloed, me yoeg ni yaed gubin nra beeʼ me sul nga tabinaew rokʼ.

5 Me yibi buch ni yoeg ni fapi plates ni bay e chep riy ni morngaʼagen e gidiiʼ rokʼ ko ngiyalʼ inʼen ni kar chuw gaed ko fare binaw nu Zarahemla, e ngan fek iyib nga pʼoewchen Ammon, ni nge yog ni biʼeg.

6 Chiney, e chingiyalʼ inʼen ni biʼeg Ammon fare chep, ma fare pilung e baʼadag ni nge nang ni faʼanra yog ni nge piliyeg e thin riy, ma Ammon e yoeg ngakʼ ni dabiyog rokʼ.

7 Me gaʼar fare pilung ngakʼ: Bachan e kirbaenʼ rog ko gafgow nibe tay e gidiiʼ rog, ma kug lʼoeg aningegi ragag nge dalip e gidiiʼ rog ni nga ranoed nga lan wuruʼ e binaw, ni gomanga yog nra pirʼeged fare binaw nu Zarahemla, ni gomanga yog nug wenig gaed ngakʼ e pi walagmaed ngar chuweged gamaed u tanpaʼ e pi toʼogor romaed.

8 Mar malog gaed u lan wuruʼ e binaw nib yoʼor e rran, machane ur fol gaed, ma dar pirʼeged fare binaw nu Zarahemla mar suloed ko giney e binaw, ma tomuren ni kar malekag gaed u dakean bangi binaw nib sug e lupath riy, ma tomuren ni kar pirʼeged bangi binaw nib sug yilen e gidiiʼ riy, nge gamanman u dakean, ma kub sug u dakean e naʼun ni ke puthputh nga butʼ ni gubin mit, nge tomuren ni kar pirʼeged bangi binaw niki immoy nib sug dakean ko gidiiʼ ni boed urngin fayu ulung i gidiiʼ ku Israel.

9 Ere ireray e mich ni pinnʼey ni kar weliyed e ba riyulʼ, ni kar feked iyib riliwʼ nge aningeg yang i plates nib sug e yol u dakean ni kan ker, ni yuyang i gol.

10 Ma musap gaed, kur feked iyib yuyang i breastplate, nib gaaʼ yang, ma ni falʼeg ko brass nge copper, nrib felʼ rogon.

11 Nge ku bayay, ra feked iyib e sayden, ni ke mʼing koelingin, ma sayden riy e ki longuy e tʼay; ma dariy beeʼ ko rangi binaw nem nra yog ni nge piliyeg e thin riy ara pi yol ni kan ker nga dakean fapi plates. Ere gube gaʼar ngom: Rayog ni ngam piliyeg fan?

12 Ma kug be gaʼar ngom bayay: Gamnang beeʼ nra yog ni nge piliyeg e thin? Ya gu baʼadag ni pi chep ney e nga ni piliyeg nge yib ni thin rodaed; ya, sana, yaedra piiʼ e llowaenʼ ngodaed u morngaʼagen e piʼin ni ke magaey ko fapi gidiiʼ ni kan liiʼraed, ni arame gin ni yibe pi chep ney riy; ara sana, yaedra piiʼ ngodaed ba llowaenʼ u morngaʼagen e pi gidiiʼ ney ni kan liiʼraed; ma gu baʼadag ni nggu nang ko mang tapgin e yamʼ ni kar tayed.

13 Ere Ammon e gaʼar: Rrayog ni nggu weliy ngom, O pilung, morngaʼagen beeʼ nib moʼon niʼir e rayog ni nge piliyeg e thin ko fapi chep; ya bay banʼen rokʼ nra sap riy, me piliyeg e thin ko gubin e pi chep ni ke kakrom; ma ba tawaʼath ni yib rokʼ Got. Ma pinnʼem e kanoeg ni mamaʼen e piliyeg thin, ma dariy beeʼ ni rayog ni nge sap riy ma kemus ni faʼanra kan chiyliy ngakʼ, ma faʼanra chey ni sap riy ma ra yimʼ. Ma chaʼan ni kan chiyliy ngakʼ ni nge sap ko pinnʼem, ireram e chaʼ ni kanoeg nib tathogthog banʼen u dakean.

14 Ma musap gaed, fare pilung ko fapi gidiiʼ ni yaed bay u lan fare binaw nu Zarahemla e beeʼ nib moʼon ni kan chiyliy ngakʼ ni nge rinʼ e pinnʼey, ma ire bay rokʼ e re tawaʼath ney ni ke piiʼ Got.

15 Ma fare pilung e yoeg ni beeʼ nib tathogthog banʼen u dakean e bagaʼ ko profet.

16 Ma Ammon e yoeg ni tathogthog banʼen u dakean e beeʼ nib tayiʼiy ma ku ba profet; ma kub tawaʼath nib gaaʼ ni gathi yug demutrug beeʼ ma ra yog ngakʼ, kemus ni faʼanra bay rokʼ fare gelingin Got, ma dariy beeʼ nra yog ngakʼ; e gelingin nib gel ma kemus ni faʼanra piiʼ Got ngakʼ.

17 Machane beeʼ nib tathogthog banʼen u dakean e rayog ni nge nang e tin ke thimur banʼen, nge ku tin ni bay yib banʼen, ma u dakeanraed e yira yiʼiy nag gubin banʼen riy, ara, chirogon, e pinʼen nib simithmith morngaʼagen e yaedra nang, nge pinʼen nib miith e ra yib nga tamilang, nge pinʼen ni dannang morngaʼagen e yira nang roraed, ma kuyra nang roraed boech banʼen ni gomanga boech ma dab nnang.

18 Ireray rogon ni Got e bing woʼen ko gidiiʼ, nu dakean e mich, ma ra yog ni ngan ngongoliy e maʼangʼang riy; ere, ke mang beeʼ nib gaʼfan ngakʼ e gidiiʼ rokʼ.

19 Ere chiney, e napʼan ni ke muʼ Ammon i yoeg e pi thin ney ma fare pilung e ri falfalaenʼ ni rib gel, me oge magaer ngakʼ Got, nibe gaʼar: Dar maerwaer u wunʼug banʼen nib miith ni bay ko yungi plates ney, nge pi mamaʼen e piliyeg thin ney e dar maerwaer u wunʼug nni tʼaer midlen ngan tay ni fan ko ngan tamilngeg gubin e tin nib miith banʼen mab riyulʼ ngakʼ e gidiiʼ.

20 O arib mangil e pi muruwel rokʼ fare Somoel, ma rib nʼuw napʼan ni gumʼaenʼ u puluwon e gidiiʼ rokʼ; arragon, ma rib malmit nge minaenʼ e gidiiʼ ko tirokʼ banʼen; ya dabra gayed e gonop, ara ra adaged ni nge gagyeg nagraed.

21 Arragon, yaed e boed rograed ba saaf ni malboch nibe miil rokʼ e chaʼ nib tagafaliy e gamanman, mar garar gaed, ma yibe tuluf raed, ma be longuy raed e gamanman nu mapan.