1 Ma chiney, fare pilung i Benjamin e lemnag ni rib tʼuf, ni tomuren ni ke muʼ ko numon ngakʼ fapi gidiiʼ, ma nge fek fithingan e piʼin ni kar falʼeged e mʼag u thilraed Got ni ngar fol gaed ko pi motochiyel rokʼ.

2 Me yibi buch ni dariy beeʼ ni magaey, ma kemus ni yigoʼ piʼin bitir nib achichig, nge piʼin ni kar michmich gaed ko fare mʼag ma kar feked nga dakeanraed fithingan Kristus.

3 Nge ku bayay, yibi buch u napʼan ni ke muʼ fare pilung i Benjamin i rinʼ e pinnʼey, ma ke bangbeng nag fare pagael ni fak ni Mosiah ni nge mang ba mitethin nge pilung ko gidiiʼ rokʼ, make piiʼ ngakʼ gubin e pi yalen ni baaʼ rogon ko fare lung, maki melʼeg e priest ni ngar filed banʼen ko fapi gidiiʼ, ni nge yog riy ni ngar rungʼaged mar nanged fapi motochiyel rokʼ Got, ma ngar puged uran ngoraed fare michmich ni kar tayed, me pag fare ulung ngar suloed nga taferaed, mar suloed, ni yaed gubin, nga taferaed nra reb e tabnaew ma yaed roraed.

4 Ma arame tabab Mosiah ko lung u tagil e chitamangin. Me tabab ko lung u napʼan e guyey e duw rokʼ, ma arame ke yaeni aw ni gonpon e ke poloʼ, aningeg miriʼay nge medilip nge nelʼ e duw ni ke yaen u napʼan ni chuw Lehi u Jerusalem.

5 Ma pilung ni Benjamin e paer ni dalip e duw me yimʼ.

6 Me yibi buch ni pilung ni Mosiah e paer ni be yaen u woʼen fare Somoel, ma i fol ko pi motochiyel rokʼ nge pi yalen rokʼ, ma i fol ko pi motochiyel rokʼ u fithikʼ gubin banʼen ni demutrug ko mang e ke chiyliy ngakʼ.

7 Ma pilung ni Mosiah e guy rogon e gidiiʼ rokʼ ni ngar ngongoliyed e mileayʼ. Nge ku arragon ngakʼ, niʼir, maki ngongoliy e mileayʼ, ni nge yaeni aw ni dabi yinʼ dakean e gafgow ko gidiiʼ rokʼ, ya nge yog ni rinʼ ni boed rogon ni rinʼ e chitamangin u fithikʼ gubin banʼen. Ma arame yaeni aw ni dakuriy e sileleʼeg thin u fithikʼ e gidiiʼ rokʼ u langgin dalip e duw.