1 Me yibi buch ni gamaed bayay e gu tabab gaed i muruwliy fare lung ma arame yog nug pired bayay ko farengi binaw u fithikʼ e gapas. Mugog ni ngan guy rogon ngan ngongoliy gubin mit e talin e cham, ni nge yog e talin e cham ko gidiiʼ rog ni fan nga bingyalʼ ni ke yib bayay fapi Lamanites ko mael ngakʼ e gidiiʼ rog.

2 Ere mug tay e matanag nge liyeg farengi binaw, ni nge yib fapi Lamanites bayay ma dab kug ggin gaed ngoraed min liiʼmaed nggu mʼaed; ere aray rogon nug tay e matanag ko gidiiʼ rog nge gamanman rog, ni nga dab kur mul gaed nga paʼ e pi toʼogor romaed.

3 Me yibi buch ni yog nug pired ko farengi binaw rokʼ e pi chitamangmaed nib yoʼor e duw, arragon, u langgin riliwʼ nge lʼagruw e duw.

4 Mugog ko piʼin pumoʼon ni ngar giʼed e butʼ u mileay, mar yunged gubin mite grain nge gubin mite waʼamngin ni gubin mit.

5 Mugog ni piʼin ppin e ngar bichbichyed e tiret, miyaed rinʼ e farwol nge muruwel, miyaed falʼeg gubin mite mad nib falelʼ, arragon, nge mad ni gubin mit, ni nge yog nug upnguyed doewmaed; ma aray rogon ni felʼ rogmaed u dakean farengi binaw—ma aray rogon ni ʼulʼul e gapas ngomaed u dakean farengi binaw u lan riliwʼ nge lʼagruw e duw.

6 Me yibi buch ni pilung i Laman e keyimʼ, ma beeʼ nib pagael ni fak e ire yinʼ luwan. Me tabab i kʼaring e damomuw ngakʼ e gidiiʼ rokʼ ni ngar togopluw gaed ko gidiiʼ rog; ere mar tabab gaed i falʼeg rograed ko mael, ni ngar baed ni mael ngakʼ e gidiiʼ rog.

7 Machane gulʼoeg e pi spy rog ngar liyeged farengi binaw nu Shemlon, ni nge yog nug nangfan rogon faraed dumʼmidil, ni nge yog nug tay e matanag ni fan ngoraed, ni nga dabiyog ni ngar baed ngakʼ e gidiiʼ rog ngar liiʼed raed.

8 Me yibi buch ni rabaed ko leluʼoch ko farengi binaw nu Shilom, ni yaed e salthaw roraed nib yoʼor, ni piʼin pumoʼon ni kar feked e gatʼing, nge gane gatʼing, nge sayden, nge sarey, nge malang, nge gawul; ma kar pupuyed e piy u loelugraed kar mudroeʼ gaed; ma kar mʼaged nochi ke oeng ni keruʼ e garbaw nga lukungraed.

9 Me yibi buch nug guy rogon ni piʼin nib ppin nge bitir ko gidiiʼ rog e ngar miith gaed nga lan wuruʼ e binaw; ma kugguy rogon ni gubin e pumoʼon ni pilibthir nra yog ni un ko cham, nge ku gubin e pagael nib felʼ yangren nra yog ni ngar uned ko cham, ni ngar mukun gaed nga taʼabang nga ranoed ni cham ngakʼ fapi Lamanites; mug fekraed nggu tayraed nga gilʼraed ko mael nibe yaen u rogon e duw roraed.

10 Me yibi buch nug waroed ni nggu mael gaed fapi Lamanites; nge gag, ni mus ngog, ni kug pilibthir, ma guʼun ko yaen ni nggu mael gaed fapi Lamanites. Me yibi buch nug waroed ko mael u gelingin Somoel.

11 Chiney, fapi Lamanites e dariy banʼen ni yaed manang u morngaʼagen fare Somoel, ara gelingin Somoel, ere ur tagaʼ gaed nga gelingraed. Machane riyaed bogi gidiiʼ nib yargael, nrogon gelingin e gidiiʼ.

12 Yaed bogi gidiiʼ ni malboch, mab tagalngach, ma yaed baʼadag e puʼoeg rachaʼ nga nimʼ, mab michaenʼraed ko fare yalen e pi chitamangraed, niʼir e baʼaray—nib mich u wunʼraed nni tuluf raed nga wuruʼ fare nam nu Jerusalem ni bachan e pi denen rokʼ e pi chitamangraed, mab kireb paʼ e pi walagraed ngoraed u lan wuruʼ e binaw, ma kub kireb paʼay ngoraed u napʼan e milekag roraed u maday.

13 Nge ku bayay, ni kub kireb paʼay ngoraed u lan farengi binaw ni sommʼon niʼur suweyed, u tomuren ni kar thʼaebed e day nga barbaʼ, ma gubin e pinnʼey ni aray rogon ni bachan e Nephi e bagel e yulʼyulʼ rokʼ i koel folan e pi motochiyel rokʼ Somoel—ere, rib tʼuf rokʼ Somoel, ya fare Somoel e rungʼag e pi meybil rokʼ me piiʼ e fulweg riy, me powiʼiyraed u napʼan e milekag roraed u lan wuruʼ e binaw.

14 Ma pi walagen e ur damomuw gaed ngakʼ ya darur nanged fan e pi muruwel rokʼ fare Somoel; ma kur damomuw gaed ngakʼ u maday ni bachan e kar ʼelʼel niged gumʼirchaʼraed ngakʼ Somoel.

15 Nge ku bayay, ma kur damomuw gaed ngakʼ u napʼan ni kar taw gaed ko farengi nam nni michmicheg, ni bachan e roeged ni ke fek u paʼraed matʼawngiraed i yoeg e nʼen ni nge rinʼ fapi gidiiʼ; mar gayed rogon ni ngar liiʼed nge yimʼ.

16 Nge ku bayay, kur damomuw gaed ngakʼ ni bachan e chuw nge yaen nga lan wuruʼ e binaw ni boed rogon ni motochiyel nag Somoel ngakʼ, me fek fapi chep ni kan ker nga dakean fapi plate ni brass, ya roeged ni ke moroʼroʼ ngoraed.

17 Ere aray fan nra filed ngakʼ pifakraed ni ngar fananikayed raed, ma ngar liiʼed raed ngar mʼaed, ma ngar moroʼroʼ gaed ngoraed ma kur feked banʼen roraed u matgael, mar rinʼed gubin banʼen nra yog ni ngar rinʼed me yog ni ngar liiʼed raed; ere bay ba fananikan ni gubinfen roraed ngakʼ pifak Nephi.

18 Ere ri ireray fan ni fare pilung i Laman, e baen nigeg ko sabaenbaen rokʼ, nge sasaliyeb rokʼ, nge pi michmich rokʼ nib falʼfan, ni baʼaray ni kug fek e pi gidiiʼ rog riy nga lan e rangi binaw ney, ni nge bung rograed i liiʼraed ngar mʼaed; arragon, ni kug gafgow gaed ni ke aray urngin e duw u lan e giney e binaw.

19 Ere chiney e gag, Zeniff, e tomuren ni kug muʼ i weliy gubin e pinnʼey ngakʼ e gidiiʼ rog ni morngaʼagen fapi Lamanites, mug kʼaringraed ning ranoed ko mael u gelingraed ni kar tayed e pagaenʼ roraed ngakʼ Somoel; ere, rug mael gaed nga taʼabang.

20 Me yibi buch nug tulufed raed ngar chuw gaed bayay ko farengi binaw romaed; mug liiʼed raed ngar mʼaed me awe ldoew, ni rib yoʼor iyaed e dan thiʼeg.

21 Me yibi buch nug suloed bayay ko binaw romaed, ma gidiiʼ rog e ra tabab gaed bayay i chuguliy e gamanman roraed mar falʼeged e mileayʼ.

22 Ere chiney e gag, ni kug pilibthir e gu tay fare lung nga paʼ reb fapi pagael ni fakag; ere, dakuriy e nʼen ni nggog. Ma nge falaenʼ Somoel ko gidiiʼ rog. Amen.