1 Ere chiney napʼan ni ke rinʼ Mosiah e biney me piiʼ e thin nge garar u dakean e nam ni gaʼangin yang, nga fithikʼ gubin e gidiiʼ, ni baʼadag ni nge nang laniyaenʼraed u morngaʼagen ko miniiʼ e nge mang pilung roraed.

2 Me yibi buch ni sul e thin ko gidiiʼ, ni yaed be gaʼar: Gamaed baʼadag Aron ni fakam ni nge mang pilung romaed nge gaaʼ romaed.

3 Ma ngiyalʼ ney e ke yaen Aron ko fare binaw ku Nephi, ere fare pilung e dabiyog ni nge piiʼ ngakʼ fare lung; ara gomanga ra mʼagaenʼ Aron ngay ni nge yaen ko lung; ara gomanga bay reb fapi pagael ni fak Mosiah nra mʼagaenʼ ngay nge yaen ko lung.

4 Ere fare pilung i Mosiah e piiʼ e thin bayay nga fithikʼ fapi gidiiʼ; arragon, ni piiʼ e thin ni kan yoloey nge yaen nga fithikʼ fapi gidiiʼ. Ma baʼaray e pi thin nni yoloey, ni gaʼar:

5 Musap gaed, O gimed e gidiiʼ rog, ara pi walageg, ya aray rogon ni gube taymed, gu baʼadag ni ngam tafnaey niged e rennʼey niʼir e kan piningmed ni ngam lemniged—ya gimed baʼadag ni nge yog beeʼ ni nge mang pilung romed.

6 Chiney e gube yoeg ngomed ni chaʼ ni bay matʼawon ko fare lung e ke siyeg ir riy, ma dabi mʼagaenʼ ngay ni nge yaen ko lung.

7 Ma chiney e faʼanra ngan dugliy beeʼ ni nge yinʼ luwan, ma musap gaed rug be rus ngay nra sum e maleʼeg thin nga fithikʼmed. Ya miniiʼ e manang rayog ni fakag, niʼir e bay matʼawon ko fare lung, e nge thilyeg papngin nge damomuw me wawliy boech e pi gidiiʼ ney ngar uned ngakʼ, ni rayog ni nge sunmiy e mael nge togopluw nga fithikʼmed, niʼir e ramang tapgin e puʼoeg rachaʼ ni yoʼor me thilyeg yalen fare Somoel, arragon, me gatheay e pi yaʼel nge dagur ko gidiiʼ ni yoʼor.

8 Ere chiney e gube yoeg ngomed ni ngad gonop gaed ma gadaed lemnag e pinnʼey, ya dariy matʼawngidaed ni ngad gatheayed fakag, ara bay matʼawngidaed ni ngad gatheayed yug beeʼ niʼir e nge yinʼ luwan.

9 Ma faʼanra fakag e rasul bayay ko ufʼuf rokʼ nge pinʼen nib mʼayfan me thilyeg e tafnaey rokʼ ko pinʼen ni ke muʼ i yoeg, me gay matʼawon ko fare lung, niʼir e ra wawliy nge pi gidiiʼ ney ngar denen gaed nib almarin.

10 Ere chiney e ngad gonopiyed ma gaed sap nga mʼon ko pinnʼey, ma gadaed rinʼ e bin nra yib nag e gapas ngakʼ e pi gidiiʼ ney.

11 Ere bay gu mang pilung romed u langgin e tin ni kubay ko pi rran rog; machane, ngad dugiliyed e pi tapuf-oloboch, ni ngar pufthin niged e pi gidiiʼ ney nrogon e motochiyel rodaed; ma gaed biʼech nag i yarmiy e pi gamʼing ko am ko pi gidiiʼ ney, ya gadaed ra dugliy e pumoʼon nib gonop ni ngar manged tapuf-oloboch, ni piʼin nra pufthin nag e pi gidiiʼ ney u rogon e pi motochiyel rokʼ Got.

12 Chiney e kab felʼ ni Got e nge pufthin nag beeʼ ko bin baʼaray nib gidiiʼ e nge pufthin nag, ya rogon ni ma pithig Got e oloboch e gubin e ngiyalʼ mab matʼaw, ma rogon ni ma pithig e gidiiʼ e oloboch e gathi gubin e ngiyalʼ nib matʼaw.

13 Ere, faʼanra gomanga rayog ni nge yog e pumoʼon ngomed nib matʼaw ni nge mang pilung romed, ni yaedra yunʼuy e pi motochiyel ku Got, mar pithiged e oloboch ko pi gidiiʼ ney u rogon e pi motochiyel rokʼ, arragon, faʼanra rayog ngomed e pumoʼon ni nge mang pilung romed ni yaedra rinʼ ni woed ni rinʼ e chitamag i Benjamin ni fan ko pi gidiiʼ ney—Gube yoeg ngomed, ni faʼanra rayog ning i paer riy ni aray rogon meʼere ra mʼag ni nge gubin e ngiyalʼ ma bay e pilung ni nge gagyeg nagmed.

14 Ma ku arragon ngog ni kug muruwel u poloʼ i gelingin nge ba tafnaey ni ke yog ngog, ni nggu fil ngomed fapi motochiyel rokʼ Got, ma nggu yarmiy e gapas u gaʼangin yang fare nam, ni nge yaeni aw ni dariy e mael ara maleʼeg thin, ara moroʼroʼ, ara paʼan matgael, ara mathang pogofan, ara demutrug ko mang kireb;

15 Ma chaʼ ni rinʼ e kireb e kug gechig nag u rogon e oloboch ni ke bucheg, nrogon yalen fare motochiyel ni piiʼ e pi chitamangdaed ngodaed.

16 Ere chiney e gube yoeg ngomed, ni bachan e dematʼaw gubin e gidiiʼ, ere demʼag ni nge yog ba pilung ngomed ara bogi pilung ni nge gagyeg nagmed.

17 Ya musap gaed, rib almarin e kireb ni ma rinʼ e gidiiʼ ni bachan taʼareb e pilung nib kireb, arragon, nge gafgow ni ubchiyaʼ ni yima tay riy.

18 Arragon, mu lemniged fare pilung i Noah, nge pi ngongol rokʼ rib kireb, nge pi ngongolen e fananikan rokʼ, nge kupi ngongolen e kireb nge fananikan ko gidiiʼ rokʼ. Ere muguyed rib almarin ba gafgow ni ubchiyaʼ nra aw gaed nga fithikʼ; nge ku bachan e pi denen roraed min fekraed riy nga kalbus.

19 Ma faʼan manga boech ni gathi bachan e ayuw rokʼ fare Tasunmiy nib sug ko gonop, ni bachan e yulʼyulʼ ko kalngaenʼ roraed, ma kar pired u kalbus ni dariy liyiben mar chuw gaed nge yibi madaʼ ko chiney.

20 Machane musap gaed, i chuwegraed ni bachan e ur mʼing niged yaed u pʼoewchen; nge bachan e ur yulʼyulʼ gaed ko meybil ngakʼ ere chuwegraed u tanpaʼ e pi toʼogor roraed; ere aray rogon ni ma muruwel Somoel nga gelingin u gubin e magagawon u fithikʼ e gidiiʼ, ni be kʼiyeg paʼ nib sug ko murnguy ngakʼ e piʼin ni kar tayed e pagaenʼ roraed ngakʼ.

21 Ere musap gaed, chiney e gube yoeg ngomed, ni dabiyog ni ngam chuweged ba pilung nib kireb ko lung ma kemus nu dakean e togopluw ni almarin, nge puʼoeg rachaʼ nib yoʼor.

22 Ya musap gaed, ire bay e tafagear rokʼ ni yaed ma ʼuni rinʼ e kireb, ma ke liyeg e pi matanag rokʼ; ma ire ma dariy fan nag e pi motochiyel rokʼ e piʼin ni yaed be paer u paʼanfelʼ u pʼoewchen; ma ire ma yit e pi motochiyel rokʼ Got nga butʼ me yaen u dakean;

23 Ma ire ma falʼeg e pi motochiyel, me piiʼ nga fithikʼ e gidiiʼ rokʼ, arragon, bogi motochiyel ni be ayuweg e ngongol rokʼ nib kireb; ma chaʼ ni dabi fol ko pi motochiyel rokʼ e ra guy rogon ngan liiʼ ngemʼ; ma piʼin ni yaedra togopluw ngakʼ e ralʼoeg e salthaw rokʼ ngoraed ngar cham gaed, ma faʼanra yog rokʼ ma ra liiʼraed ngar mʼaed; ere aray rogon e pilung ni dematʼaw ni ma thilyeg e pi yalen gubin e tin nib matʼaw.

24 Ere chiney e musap gaed gube yoeg ngomed, ni de tʼuf ni nge yib e mitney e ngongolen e fananikan ngomed.

25 Ere, mu melʼeged nge yog ngomed u lungun e yoʼor, e pi tapuf-oloboch, ni nge yog nni pithig e oloboch romed u rogon fapi motochiyel niʼir e ke piiʼ e pi chitamangdaed ngomed, nib matʼaw, niʼir e piiʼ Somoel ngoraed.

26 Ma chiney e gathi ba yalen ni lungun e gidiiʼ ni yoʼor e nge dugliy banʼen ni demutrug ma dabi mʼag ko tin nib matʼaw; machane bagaʼ ni lichen e gidiiʼ e yaed baʼadag e tin ni dematʼaw; ere biney e ngam fol gaed riy mi gimed tay ni nge mang motochiyel romed—ni ngam dugiliyed e pi gamʼing romed u lungun e gidiiʼ ni yoʼor.

27 Ma faʼanra yaeni taw ko ngiyalʼ i nʼen ni lungun e gidiiʼ ni yoʼor e be melʼeg e tin nib kireb, ma arame ngiyalʼ i nʼen ni pi gechig rokʼ Got e bay yibi aw ngomed; arragon, ma arame ngiyalʼ i nʼen ni bay yibi awnag e gafgow ngomed ni woed ni rinʼ ko sommʼon ko rangi binaw ney.

28 Ere chiney e faʼanra bay e tapuf-oloboch romed, ma dabra pithiged e oloboch romed nrogon e motochiyel ni kan piiʼ, ma rayog ni ngam guyed rogon ni nge pithig e chaʼ ni pilung ko tapuf-oloboch.

29 Ma faʼanra piʼin pilung ko tapuf-oloboch romed e darur pithiged e oloboch u yalen nib matʼaw, ma thingar mu guyed rogon ni nge mukun in, e tin nib sobutʼ ko pi tapuf-oloboch romed nga taʼabang, ngar pithiged e oloboch rokʼ e piʼin pilung ko pi tapuf-oloboch romed, u rogon lungun e gidiiʼ ni yoʼor.

30 Ere gube chiyliy ngomed ni ngam rinʼed e pinnʼey u fithikʼ e madguw romed ngakʼ Somoel; ma gube chiyliy ngomed ni ngam rinʼed e tin ni baʼaray, ni dab mu tayed ni nge paer beeʼ nge mang pilung romed; ma faʼanra nge denen e pi gidiiʼ ney mar rinʼed e pi ngongol nib kireb ma yaed e ngar feked riyaʼen.

31 Ya musap gaed gube yoeg ngomed, ni pi denen ko gidiiʼ ni yoʼor e be sum ko pi ngongol ni kireb ko pi pilung roraed; ere pi ngongol roraed nib kireb e ngan gechig nag e pi pilung roraed riy.

32 Ere chiney e gubaʼadag ni paʼ ni baʼaray ni de taʼareb dodowen e gidiiʼ, e ngan chuweg u lan e re nam ney, ni rib gaaʼ nu fithikʼ e pi gidiiʼ rog ney; machane gubaʼadag ni re nam ney e nge paer nib nam nib puf-matʼawoy riy, ma nge gubin e gidiiʼ nra beeʼ ma nge falaenʼ nga matʼawon nge yalen ko gabin ni taʼab rogon, u nʼumngin i napʼan ni fare Somoel e be guy nib mʼag ni ngad pired riy ma gaed tafnaʼ farengi nam, arragon, u nʼumngin i napʼan ni bay rebi pifakdaed ni ka be paer u dakean farengi nam.

33 Ma kub yoʼor boech banʼen ni yoloey fare pilung i Mosiah nge yaen ngoraed, ni be tamilngeg ngoraed gubin e pi moʼomawʼ nge magawon ko pilung nib matʼaw arragon, nge gubin e pi muruwel ni fan ko gidiiʼ roraed, nge ku arragon ni gubin e pi nonnon ko fapi gidiiʼ ko pilung roraed; me weliy ni gubin ngoraed.

34 Me yoeg ngoraed ni pinnʼey e thingar ni chuweg; machane, rogon i gagyeg nag e paer e bay ko gidiiʼ ni gubin, ni gubin e gidiiʼ nra beeʼ ma nge rinʼ e girokʼ e muruwel riy.

35 Ma ki tamilngeg ngoraed gubin i thibngin e muruwel ni yaedra pirʼeg, rokʼ ba pilung ni dematʼaw ni nge gagyeg nagraed;

36 Arragon, ma gubin e pi denen rokʼ nge ngongolen e fananikan rokʼ, nge gubin e pi mael, nge pi maleʼeg thin, nge puʼoeg rachaʼ, nge moroʼroʼ nge yargael, nge denen ko pi gathar, nge gubin mit e denen ni dabiyog i weliy rogon—me yoeg ngoraed ni pinnʼey e thingar dab nrinʼ, ya bogi banʼen nib togopluw ko fapi motochiyel rokʼ Got.

37 Ere chiney e yibi buch, u tomuren ni ke muʼ fare pilung i Mosiah i garareg e pinnʼey nga fithikʼ e gidiiʼ rokʼ me michaenʼraed nga fini riyulʼ e thin rokʼ.

38 Ere ra feked laniyaenʼraed ko pilung, mari mʼagaenʼraed ngay ni nge gubin e gidiiʼ ma nge taʼareb rogon u dakean gaʼangin yang e nam; arragon, ma nge gubin e gidiiʼ ma nge mʼagaenʼ ngay nra beeʼ ma ngan gechig nag ko pi kireb rokʼ.

39 Ere, yibi buch nra kunuyed yaed nga taʼabang ni kar yu ulung gaed u dakean gaʼangin yang e nam, ni nga roeged laniyaenʼraed ko miniiʼ e nge mang tapuf-oloboch roraed, ni nga i pithig e oloboch roraed u rogon fare motochiyel ni kan piiʼ ngoraed; ere ra falfalaenʼ gaed ni rib gel ni bachan e puf-matʼawon ni kan piiʼ ngoraed.

40 Me gel e murnguy roraed ngakʼ Mosiah; arragon, mar liyoer gaed ngakʼ ni dariy beeʼ ni kar rinʼed ngakʼ ni aram rogon; ya daʼur sap gaed ngakʼ ni ir beeʼ nib tafalipaʼ ni be gay rogon e gin ni nge felʼ rogon riy, arragon, ya chogow ni salpiy e ma gafgow nigey; ya ire dawori fael paʼ ngoraed ko salpiy roraed, ara ki i falaenʼ i puʼoeg e rachaʼ; machane ire ke yognag e gapas nga lan e nam, ma ke piiʼ matʼawon e gidiiʼ rokʼ ni ngan chuwegraed ko gubin mit e kalbus; ere ra liyoer gaed ngakʼ, arragon, ni rib gel, dabiyog i weliy rogon.

41 Me yibi buch ni ur dugiliyed e pi tapuf-oloboch ni nge gagyeg nagraed, ara ngar pufthin niged raed u rogon e motochiyel; ma ur rinʼed e biney ni aray rogon u gaʼangin yang fare nam.

42 Me yibi buch ni Alma e kan dugliy ni nge mang e bin sommʼon e pilung ko tapuf-oloboch, ma kuʼir fachaʼ nib tolang ko priest, ya chitamangin e ke dugliy ko binem e liw, ma ke piiʼ ngakʼ e muruwel riy ni morngaʼagen gubin e pi gamʼing ko fare galasia.

43 Ere chiney e yibi buch ni Alma e iyaen u kanawoʼen fare Somoel, ma be fol ko pi motochiyel rokʼ, ma i puf-oloboch u yalen nib matʼaw, ma arame yaeni aw ni bay e gapas nib ʼulʼul u dakean gaʼangin yang fare nam.

44 Ere aray rogon ni tabab e gagyeg ko pi tapuf-oloboch u dakean gaʼangin yang fare binaw nu Zarahemla, u fithikʼ gubin fapi gidiiʼ ni kanoeg e Nephites ngoraed; ma Alma e ire bin sommʼon e pilung ko tapuf-oloboch.

45 Ere chiney e yibi buch ni yimʼ e chitamangin, ni ke gaman meruk i ragag nge lʼagruw e duw rokʼ, ni ke paer ni aram nʼumngin i napʼan ni nge muguʼuliy fapi motochiyel rokʼ Got.

46 Me yibi buch niki yimʼ Mosiah, ni ke gaman guyey nge dalip e duw ko lung rokʼ, ma ke gaman nelʼ i ragag nge dalip e duw rokʼ; ni arame ke gaman lal miriʼay nge mereb e duw ko ngiyalʼ ni chuw Lehi u Jerusalem.

47 Ma aray rogon ni mus e lung ko pilung ni i gagyeg fapi gidiiʼ rokʼ Nephi u tanggin; ma arame me mus e pi rran rokʼ Alma, niʼir e sunmiy e galasia roraed.