1 Me yibi buch ni Limhi nge gidiiʼ rokʼ e ra suloed ko fare binaw ku Nephi, ma kur tabab gaed bayay ko paer u lan farengi binaw u fithikʼ e gapas.

2 Me yibi buch u tomuren ni bukun e rran ni ke yaen ma fapi Lamanites e ra tabab gaed bayay ko damomuw ni togopluw ngakʼ fapi Nephites, ma arame ra tabab gaed ko wub nga mathil ko binaw nib liyegraed.

3 Ere chiney e dar thog rograed ni ngar liiʼed raed ngar mʼaed, ni bachan fare michmich ni ke tay fare pilung roraed ngakʼ Limhi; machane yaedra bat nag linglingiraed, ma yaed be gagyeg nag matʼawngiraed u dakeanraed; mar tabab gaed i tay e chugum nib totomal nga dakean i keruʼraed, man gafaliy raed ni boed ba donkey nib maʼay—

4 Arragon, gubin e pinnʼey ma nrinʼ ni nge yog ni muguʼul fare thin rokʼ Somoel.

5 Ere chiney e pi gafgow ni kirbaenʼ rokʼ fapi Nephites e rib almarin, ma dariy rogon nra yog ni ngar chuweged yaed u paʼraed, ya fapi Lamanites e ra longbiyed raed ni gaʼangin yang.

6 Me yibi buch ni fapi gidiiʼ rokʼ Nephi e ra tabab gaed ko nonnon ngakʼ fare pilung ni bachan e pi gafgow roraed; ma kur tabab gaed i lemnag ni nga ranoed ngakʼ fapi Lamanites ko mael. Mar kʼarnged e chachalban ko fare pilung ko nonnon ni yaed be tay; ere pithig e thin ngoraed ni ngar rinʼed ni boed rogon ni yaed baʼadag.

7 Ma arame ra kunuyed yaed nga taʼabang bayay, mar chuw gaed nga madan e mael roraed, ma ranoed ngakʼ fapi Lamanites ni ngar tulufed yaed ngar chuw gaed u dakean e binaw roraed.

8 Me yibi buch ni fapi Lamanites e ragel gaed ngoraed, min tuluf raed ngar suloed, ma boʼor i yaed e nliiʼ.

9 Ere ngiyalʼ ney e ri almarin e kirbaenʼ nge kalngaenʼ u fithikʼ fapi gidiiʼ rokʼ Limhi, piʼin ni ppin e yaed be yoer nag pi figirngiraed, nge piʼin bitir e yaed be yoer nag e pi chitamangraed, nge piʼin walag ni pumoʼon e yaed be yoer nag pi walagraed ni pumoʼon.

10 Ere chiney e rib yoʼor e piʼin ni ppin ni ke yimʼ figirngiraed u dakean fare binaw, ma yaed be yoer ni gubin e rran, ya rib gel ba murus ni bachan fapi Lamanites ni ke yib i aw ngoraed.

11 Me yibi buch ni pi miyoer roraed ni dar tal e kʼaring e tin ni ke magaey ko fapi gidiiʼ rokʼ Limhi ngar damomuw gaed ngakʼ fapi Lamanites; ma ranoed bayay ko mael, machane kur waer gaed bayay ngar suloed, ma kari gel boech e gafgow roraed ni boʼor i yaed e keyimʼ.

12 Arragon, ma ku ranoed bayay ko yan dalip yay, ma kur gafgow gaed ni ku aram rogon; ma piʼin ni dan liiʼraed e ra suloed bayay ko fare binaw ku Nephi.

13 Mar sobutʼ niged yaed nge taʼareb tolngiraed ko butʼ, mar paged yaed ngar manged sib, ma kur paged yaed nga un gafgow nagraed, ma yibe susuruyraed nga mʼon ma yibe sulwegraed nga tomur, min gel nag e tomal ko tin ni yaed be fek nge muruwel roraed, u rogon ni baʼadag e pi toʼogor roraed.

14 Mar mʼing niged yaed nge mus rogon faraed sobutʼ; ma riyaed be wenig ngakʼ Got; arragon, ni gubin e rran ni poloʼ ni ur meybil gaed ngakʼ Got ni nge chuwegraed u fithikʼ e gafgow nge kirbaenʼ roraed.

15 Ere chiney e fare Somoel e isasagaʼal ni nge motoyil me piiʼ e fulweg ko meybil roraed ni bachan e pi denen roraed; machane fare Somoel e motoyil ko meybil roraed, me tabab i munguy nag gumʼirchaʼen fapi Lamanites mar tabab gaed i baʼudeg e pi muruwel roraed; machane fare Somoel e de guy nib gamog ni nge chuwegraed u tanpaʼ e pi toʼogor roraed.

16 Me yibi buch ni ra tabab gaed ko monʼog ni buchʼuw ma buchʼuw u lan fare binaw, mar tabab gaed i yung e awoch nib yoʼor, mar chuguliyed e gamanman nge garbaw, ma dakur gafgow gaed ni bilig.

17 Ma ngiyalʼ innʼey e ke yoʼor e piʼin nib ppin ngakʼ e piʼin pumoʼon; ere pilung i Limhi e yoeg ni gubin e pumoʼon ma ngar piiʼed e ayuw ni ggan ni fan ko fapi ppin nge bitir roraed ni ke yimʼ figirngiraed nge pi chitamangraed, ni nga dab kur mʼaed ko bilig; ere biney e rrinʼed ni bachan e rib yoʼor iyaed e keyimʼ.

18 Chiney e fapi gidiiʼ rokʼ Limhi e ruguyed rogon nra yog ni ngar kunuyed yaed nga ur pired ni yaed taʼab ulung u taʼabang, mar matanagiyed e awoch roraed nge pi gamanman roraed;

19 Ma fare pilung e mus ngakʼ ma dar pagaenʼ ni nge yaen nga wuruʼ fare binaw, ma kemus ni faʼanra nge un e pi matanag rokʼ ngakʼ, ya be rus ni richey me thap nga paʼ fapi Lamanites.

20 Me yoeg ni gidiiʼ rokʼ e ngar matangiyed e binaw nib liyeg raed, ni gomanga yog nra koeled fapi priest ni kar miil gaed nga lan wuruʼ e binaw, ni yaed e kar iringed fapi ppin ni fak fapi Lamanites, ma ireram e nʼen ni kʼaring e gafgow nib almarin nga puluwraed.

21 Ya yaed baʼadag ni ngar feked raed ni nge yog nra gechig niged raed; ya yaed be yib nga lan e binaw ku Nephi ni ke nepʼ, mar feked e awoch roraed ma kub yoʼor bogi banʼen nib tʼuf roraed ni kur feked; ere rapoch gaed nga ur soen niged yaed.

22 Me yibi buch ni dakuriy e wagaey u thilin fapi Lamanites nge fapi gidiiʼ rokʼ Limhi, nge yaeni madaʼ ko ngiyalʼ ni Ammon nge pi walagen e kar baed nga lan fare binaw.

23 Ma fare pilung e napʼan ni immoy u wuruʼ e garog ko fare binaw ni yaed e matanag rog, me pirʼeg Ammon nge pi walagen; ma bachan e lemnag ni yaed fapi priest rokʼ Noah ere guy rogon ni ngan koelraed, min mʼagraed, ma ninʼraed nga kalbus. Ma faʼan gomanga yaed fapi priest rokʼ Noah make guy rogon ni ngan liiʼraed ngar mʼaed.

24 Machane napʼan ni pirʼeg ni gathi yaed, ya yaed pi walagen ni fapi Nephites, ni kar baed ko fare binaw nu Zarahemla, mari falfalaenʼ ni rib gel.

25 Chiney e fare pilung i Limhi e malʼog, u mʼon ko ngiyalʼ ni yib Ammon, ni lʼoeg ini pumoʼon ni ngar gayed fare binaw nu Zarahemla; machane dar pirʼeged, mar malog gaed u lan wuruʼ e binaw.

26 Machane, ra pirʼeged ba binaw niki i paer e gidiiʼ riy; arragon, ba binaw nib sug dakean ko yil ni ke malikʼ; arragon, bbinaw ni i paer e gidiiʼ riy make mogothgoth; ere, bachan e ra lemniged ni ireram fare binaw nu Zarahemla, mar suloed ko fare binaw ku Nephi, mar taw gaed nga wuruʼ e binaw ni dawori yoʼor e rran u mʼon ni nge yib Ammon.

27 Mar suloed ni bay ba chep ni kar feked ke un ngoraed, nib chep ni bay morngaʼagen fapi gidiiʼ riy ni kan pirʼeg yilraed; ni kan ker nga dakean e plate ni wasey.

28 Ere chiney e Limhi e ri falfalaenʼ bayay u napʼan ni ke nang rokʼ Ammon, ni pilung i Mosiah e bay ba tawaʼath rokʼ ni yib rokʼ Got, ni ireram e gin nra yog riy ni ngan piliyeg e thin ko fapi yungi pilet ni kan ker e yol nga dakean; arragon, nge Ammon e riki falfalaenʼ.

29 Machane Ammon nge pi walagen e ki kirbaenʼraed ni bachan e rib yoʼor i walagraed ni kan liiʼraed ngar mʼaed;

30 Nge ku bachan e fare pilung i Noah nge priest rokʼ nra wawliyed fapi gidiiʼ ngar rinʼed e denen nib yoʼor mit nge ngongol ni kireb nib togopluw ngakʼ Got; maki kirbaenʼraed ni bachan Abinadi ni ke yimʼ; nge ku bachan e chuw ni tay Alma nge fapi gidiiʼ nra uned ngakʼ, niʼir e sunmiy ba galasia rokʼ Got u dakean e madangdang nge gelingin Got, ngo dakean e mich ko fapi thin ni ke weliy Abinadi.

31 Arragon, ri kirbaenʼraed ko mochuw nra tayed, ya dar nanged ko uw e kar miil gaed ngay. Chiney e manga boech ma kar uned ngoraed nib falaenʼ raed ngay, ya kuyaed ma kar falʼeged ba mʼag u thilraed Got ni ngar pigpig gaed ngakʼ mar fol gaed ko pi motochiyel rokʼ.

32 Ere chiney ku napʼan e wub ni tay Ammon, ma fare pilung i Limhi e ki piiʼ ir nga ba mʼag u thilrow Got, nge ku boech e gidiiʼ rokʼ nib yoʼor, ni ngar pigpig gaed ngakʼ mar fol gaed ko pi motochiyel rokʼ.

33 Me yibi buch ni fare pilung i Limhi nge boech e gidiiʼ rokʼ nib yoʼor e ra adaged ni ngan tawfe nagraed; machane dariy beeʼ ko rangi binaw nem ni ke piiʼ Got matʼawon. Nge Ammon e siyeg ni nga dabi tawfe nigey, ya be yaenaenʼ rokʼ niʼir ba tapigpig ni dematʼaw rogon.

34 Ere dariy bingyalʼ ni ra yarmiyed yaed nib galasia, ere ur pired ni yaed be soen ma yaed be motoyil ko fare Kan ni Thothup rokʼ Somoel. Chiney e ur fineyed ni ngar boeded Alma nge pi walagen, niʼir e miil nga lan wuruʼ e binaw.

35 Ra adaged ni ngan tawfe nagraed ni nge micheg me mang mich riy nib mʼagaenʼraed ngay ni ngar pigpig gaed ngakʼ Got u poloʼ i gumʼirchaʼraed; machane ra yinʼed yaran e tawfe roraed; ma babyoren e tawfe roraed e bay fin un piiʼ.

36 Ere chiney e gubin e pinʼen nibe lemnag Ammon nge gidiiʼ rokʼ, nge fare pilung i Limhi nge gidiiʼ rokʼ, e ngar guyed rogon ni ngar chuw gaed u tanpaʼ fapi Lamanites ngu kalbus.