1 Kiiō ālikin men kein eaar wōr elōn̄ iaan ro rej epepen tokālik ro raar jab maron̄ meļeļe naan ko an kiin̄ Benjamin, kōnke raar ajri ilo iien eo eaar kōnono n̄an armej ro an; im raar jab tōmak ilo imminene ko an ro jemāer.

2 Raar jab tōmak ta eo kar ba kōn jerkakpeje an ro remej, im raar barāinwōt jab tōmak kōn itok eo an Kraist.

3 Im kiiō kōnke jab tōmak eo aer rejjab maron̄ meļeļe naan an Anij; im burueer raar kapeni.

4 Im raar jab kōņaan peptaij; im barāinwōt jab kobaļo̧k ilo kabun̄ eo. Im raar juon armej ejenolo̧k āinwōt kōn tōmak eo aer, im kar āindein wōt tokālik, em̧ool ilo jekjek eo aer elōn̄ im jero̧wiwi; bwe raar jab kūr ioon Irooj aer Anij.

5 Im kiiō ilo iien tōl an Mosaia raar jab jimattan in lōn̄ier wōt armej ro an Anij; a kōnke bōrojepel ko ilubwiljin ro jeir im jatier raar kanooj lōn̄ļo̧k.

6 Bwe ālikin men kein raar m̧oņe elōn̄ kōn naan in m̧oņ ko aer, ro raar pād ilo kabun̄ eo, im kar kōm̧m̧an bwe ren kōm̧m̧an elōn̄ jero̧wiwi ko; kōn menin eaar mennin aikuj bwe ro raar kōm̧m̧ani jero̧wiwi, ro raar pād ilo kabun̄ eo, ren kauweik er ilo kabun̄ eo.

7 Im ālikin men kein, kar bōkļo̧k er im̧aan pris ro, im kar leļo̧k er n̄an pris ro jān rikaki ro; im pris ro raar bōkļo̧k er im̧aan Alma, eo e eaar pris eo eutiej.

8 Kiiō kiin̄ Mosaia eaar leļo̧k n̄an Alma maron̄ ioon kabun̄ eo.

9 Im ālikin men kein Alma eaar jab jeļā kōn er; a eaar lōn̄ rikam̧ool ro ņae er; aaet, armej ro raar jutak im kam̧ool kōn nana ko aer ilo kanooj ļap.

10 Kiiō eaar jab wōr jabdewōt men eaar waļo̧k m̧okta ilo kabun̄ eo; kōn menin Alma eaar inepata ilo jetōb eo an, im eaar kōm̧m̧an bwe er ren aikuj bōktok er im̧aan kiin̄ eo.

11 Im eba n̄an kiin̄ eo: Lo, er rein elōn̄ ro kōm ar bōktok er im̧am̧, ro ņa ruweer jān ro jeir im jatier; aaet, im kar jibwe er ilo elōn̄ nana ko. A im rejjab ukeļo̧k jān nana ko aer; kōn menin kōm ar bōktok er im̧am̧, bwe kwōn maron̄ ekajet er ekkar n̄an men ko ruweer.

12 A kiin̄ Mosaia eba n̄an Alma: Lo, ij jab ekajet er; kōn menin ij lewōj er ilo peium̧ bwe ren ekajet.

13 Im kiiō eaar ļo̧kjānan Alma im bar juon alen inepata; im eaar ilo̧k im kajjitōk jān Irooj ta ej aikuj kōm̧m̧an kōn menin, bwe eaar mijak bwe enaaj kōm̧m̧an bōd ilo mejān Anij.

14 Im ālikin men kein ke ar m̧ōj an lutōkleplep aolepān an n̄an Anij, ainikien Irooj eaar itok n̄an e, im ba:

15 Jeraam̧m̧an n̄an kwe, Alma, im jeraam̧m̧an rej er ro raar peptaij ilo dān ko in Mormon. Kwo jeraam̧m̧an kōnke am̧ tōmak otem tōmak ilo naan ko wōt an eo karejera Abinadai.

16 Im jeraam̧m̧an ej er kōnke aer tōmak otem tōmak ilo naan ko wōt kwaar kōnono n̄an er.

17 Im kwo jeraam̧m̧an kōnke kwaar kajutak kabun̄ eo ilubwiljin armej rein; im renaaj pen, im renaaj armej ro Aō.

18 Aaet, jeraam̧m̧an ej armej rein ro rej m̧ōņōņō in bōk Eta; bwe ilo Eta naaj ān̄inn̄in er; im renaaj Aō.

19 Im kōnke kwaar kajjitōk jān Eō kōn eo ewōr ruōn, kwo jeraam̧m̧an.

20 Kwōj rikarejera; im Ij kōm̧m̧an bujen ippam̧ bwe kwōnaaj bōk mour indeeo; im kwōnaaj jerbal n̄an Eō im ilo̧k ilo Eta, im naaj aintok ippān doon sip ko Aō.

21 Im eo enaaj ron̄ ainikiō naaj Aō sip; im enaaj kwōnaaj bōk e ilo kabun̄ eo, im e Inaaj bōk barāinwōt.

22 Bwe lo, en̄in ej kabun̄ eo Aō; jabdewōt eo ej peptaij naaj peptaiji n̄an ukeļo̧k. Im jabdewōt kwōnaaj bōk enaaj tōmak ilo Eta; im e Inaaj jeorļo̧k an bōd ilo ejjeļo̧k wōņāān.

23 Bwe ej N̄a eo ej bōk Ioō jero̧wiwi ko an laļ; bwe ej N̄a eo eaar kōm̧anm̧an er; im ej N̄a eo Iaar leļo̧k n̄an eo ej tōmak n̄an jem̧ļo̧k in jikin eo ilo anbwijmaron̄ū.

24 Bwe lo, ilo Eta kar kūr er; im eļan̄n̄e rejeļā N̄a renaaj wōnm̧aantak, im naaj wōr juon jikier indeeo ilo anbwijmaron̄ū.

25 Im n̄e jilel eo kein karuo naaj jan̄ innām er ro raar jab jeļā N̄a renaaj wōnm̧aantak im naaj jutak im̧aō.

26 Innām renaaj jeļā bwe N̄aij Irooj aer Anij, bwe N̄aij aer Ripinmuur; a raar abin bōk lo̧mo̧o̧r.

27 Innām Inaaj kwaļo̧k bōro n̄an er bwe Iaar jab jeļā er; im renaaj ilo̧k ilo kijeek ejjeļo̧k jem̧ļo̧kin kar kōpooj n̄an devil im enjeļ ro an.

28 Kōn menin Ij ba n̄an eok, bwe eo enaaj jab ron̄ Ainikiō, ejja in wōt kwōn jab bōk e ilo kabun̄ eo Aō, bwe e Ij jamin bōk e ilo raan eo āliktata.

29 Kōn menin ij ba n̄an eok, kwōn ilo̧k; im jabdewōt eo ej bōd ņae Eō, e kwōnaaj ekajet ekkar n̄an jero̧wiwi ko eaar kōm̧m̧ani; im eļan̄n̄e e ej kwaļo̧k bōro kōn jero̧wiwi ko an im̧aam̧ im Im̧aō, im ukeļo̧k ilo m̧ool in būruōn, e kwōnaaj jeorļo̧k ruōn, im Inaaj jeorļo̧k an bōd barāinwōt.

30 Aaet, im jon̄an emmakijkij in wōt an armej ro aō ukeļo̧k Inaaj jeorļo̧k aer bōd im bōd ko aer ņae Eō.

31 Im bōd ko an doon kom̧ naaj barāinwōt jeorļo̧k jān doon; bwe em̧ool Ij ba n̄an eok, eo ej jab jeorļo̧k bōd an riturin n̄e e ej ba bwe ej ukeļo̧k, ejja in wōt eaar bōktok e make ium̧win liaakeļo̧k.

32 Kiiō Ij ba n̄an eok, Kwōn Ilo̧k; im jabdewōt eo enaaj jab ukeļo̧k jān jero̧wiwi ko an ejja in wōt naaj jab bōnbōn ilubwiljin armej ro Aō; im men in naaj ļoore jān iien in m̧aanļo̧k.

33 Im ālikin men kein ke Alma eaar ron̄ naan kein eaar jei bwe en maron̄ wōr ippān, im bwe en maron̄ ekajet armej ro ilo kabun̄ eo ekkar n̄an kien ko an Anij.

34 Im ālikin men kein Alma eaar ilo̧k im kar ekajet ro rekar po ilo bōd, ekkar n̄an naan eo an Irooj.

35 Im jabdewōt eaar ukeļo̧k jān jero̧wiwi ko aer im kar kwaļo̧k bōro kaki, er eaar bwine er ilubwiljin armej ro ilo kabun̄ eo.

36 Im ro raar jab kwaļo̧k bōro kōn jero̧wiwi ko aer im jab ukeļo̧k jān bōd ko aer, ejja rein wōt raar jab bōnbōn ilubwiljin armej ro ilo kabun̄ eo, im etaer kar joļo̧k.

37 Im ālikin men kein Alma eaar tōl aolep jerbal ko an kabun̄ eo; im raar bar jino in wōr aer aenōm̧m̧an im jeraam̧m̧an otem jeraam̧m̧an ilo jerbal ko an kabun̄ eo, im raar etetal ilo koļmānļo̧kijeņ im̧aan Anij, im bōk elōn̄, im peptaiji elōn̄.

38 Im kiiō aolep men kein Alma eaar kōm̧m̧an im rijerbal ro m̧ōttan ro raar ioon kabun̄ eo, im etetal ilo tiljek otemjeļo̧k, im katakin kōn naan in Anij ilo men otemjeļo̧k, im kar en̄taan kōn elōn̄ kaen̄tanaan otemjeļo̧k, im kar matōrtōre er jān aolep ro raar jab pād ilo kabun̄ eo an Anij.

39 Im raar kauweik ro jeir im jatier; im kar barāinwōt kauweik er, aolep kajjojo jān naan an Anij, ekkar n̄an jero̧wiwi ko an, ak n̄an jero̧wiwi ko eaar kōm̧m̧ani, im kar jiron̄ er jān Anij n̄an jar im jab jokwōd, im n̄an leļo̧k kam̧m̧oolol ko ilo men otemjej.