Jeje Ko Rekwojarjar
Mosaia 22


Jebta 22

Karōk ko rej kōm̧m̧an n̄an armej ro n̄an ko jān kōm̧akoko an riLeman ro—Kar kōkadek riLeman ro—Armej ro raar ko, ro̧o̧l n̄an Zaraemla, im erom doon Kiin̄ Mosaia. Iturinļo̧k 121–120 M.K.

1 Im kiiō ālikin men kein Ammōn im kiin̄ Limai raar jino ekkōnono ippān armej ro ekōjkan aer naaj kōtļo̧k er make jān kōm̧akoko; im em̧ool raar kōm̧m̧an bwe aolep armej ro ren kuktok ippān doon; im men in raar kōm̧m̧an bwe ren maron̄ bōk ainikien armej ro kōn menin.

2 Im ālikin men kein raar lo ejjeļo̧k iaļ n̄an kōtļo̧k er make jān kōm̧akoko, ijello̧kun wōt n̄e eaar n̄an bōk kōrā ro aer im ro nejier, im bwijin in sip ko aer, im mennin mour ko aer, im im̧ōn kōppād ko aer, im ilo̧k ilo āne jem̧aden; bwe kōnke riLeman ro raar kanooj bwijlep, eaar ejjeļo̧k maron̄ n̄an armej ro an Limai n̄an aitwerōk ippāer, im ļōmņak n̄an kōtļo̧k er make jān kōm̧akoko jān jāje eo.

3 Kiiō ālikin men kein Gideon eaar ilo̧k im jutak im̧aan kiin̄ eo, im ba n̄an e: Kiiō O kiin̄, kwaar eo̧ron̄ naan ko aō elōn̄ iien ko m̧ae iien in ke jaar aitwerōk ippān ro jeid im jatid, riLeman ro.

4 Im kiiō O kiin̄, eļan̄n̄e kwaar jab lo eō juon rikarejeram̧ ejej tokjān, ak eļan̄n̄e kwaar ron̄jake n̄an iien in naan ko aō ilo jabdewōt wāween, im raar wōr tokjāer n̄an eok, em̧ool āindein ikōņaan bwe kwōn ron̄jaki naan kein aō ilo iien in, im inaaj rikarejeram̧ im kōtļo̧k armej ro am̧ jān kōm̧akoko.

5 Im kiin̄ eo eaar kōtļo̧k n̄an e bwe en maron̄ kōnono. Im Gideon eba n̄an e:

6 Kwōn watōk diwōj-deļo̧n̄ eo itulik, deblo̧ke wōrwōr eo itulik, ilo tulik in jikin kwelo̧k in. RiLeman raņ, ak ribaar ro an riLeman raņ, ilo bon̄ rej kadek; kōn menin jen jilkinļo̧k juon kean̄ ilubwiljin aolep armej rein bwe ren aintok ippān doon bwijin in mennin mour ko aer im mennin mour ko reļļap, bwe ren maron̄ tōlļo̧k er ilo āne jem̧aden eo ilo bon̄.

7 Im inaaj ilo̧k ekkar n̄an naan in jiron̄ eo am̧ im kōļļāik ewōj eo āliktata kōn wain n̄an riLeman raņ, im renaaj kadek; im jenaaj eļļā ilo diwōj-deļo̧n̄ in ittino ilo ituanmiin̄ in kāām eo aer n̄e rej kadek im kiki.

8 Āindein jenaaj ilo̧k ippān kōrā ro ad im ro nejid, bwijin in mennin mour ko ad, im mennin mour ko ad reļļap ilo āne jem̧aden; im jenaaj ito-itak ipeļaakin āneen Silom.

9 Im ālikin men kein kiin̄ eo eaar eo̧ron̄ naan ko an Gideon.

10 Im kiin̄ Limai eaar kōm̧m̧an bwe armej ro an ren aintok bwijin in mennin mour ko an ippān doon; im eaar jilkinļo̧k ewōj in wain n̄an riLeman ro; im eaar barāinwōt jilkinļo̧k eļapļo̧k wain, āinwōt juon men in leļo̧k n̄an er; im raar idaak ilo ejjeļo̧k wōņāān wain eo kiin̄ Limai eaar jilkinļo̧k n̄an er.

11 Im ālikin men kein armej ro an Limai raar ilo̧k ilo bon̄ ilo āne jem̧aden eo kōn bwijin in mennin mour ko aer im mennin mour ko aer reļļap, im raar ilo̧k ipeļaakin āneen Silom ilo āne jem̧aden, im ukōt tok iaļ eo aer n̄an āneen Zaraemla, im kar tōl er jān Ammōn im ļōm̧aro jein im jatin.

12 Im rekar bōk aolep aer gold, im silver, im mennin aorōk ko aer, ko raar maron̄ būki, im barāinwōt mennin aikuj ko aer ippāer, ļo̧k ilo āne jem̧aden; im raar wōnm̧aanļo̧k ilo em̧m̧akūt eo aer.

13 Im ālikin pād elōn̄ raan ko ilo āne jem̧aden raar tōprakļo̧k ilo āneen Zaraemla, im kar kobaļo̧k ippān armej ro an Mosaia, im erom ro doon.

14 Im ālikin men kein Mosaia eaar bōk er kōn m̧ōņōņō; im eaar barāinwōt bōk aļo̧o̧k ko aer, im barāinwōt bļo̧o̧k ko armej ro an Limai rekar loi.

15 Im kiiō ālikin men kein ke riLeman ro raar lo bwe armej ro an Limai raar ilo̧k jān āneo ilo bon̄, raar jilkinļo̧k juon jarin tariņaeļo̧k ilo āne jem̧aden n̄an lukwarkware er;

16 Im ālikin raar lukwarkware er ruo raan ko, raar maron̄ jab ļoorļo̧k wōt jenkwaer; kōn menin raar jebwābwe ilo āne jem̧aden.