1 Im kiiō ke kiin̄ eo eaar ron̄ naan kein, eaar ba n̄an pris ro an: Bōkļo̧k ļein, im m̧an e; bwe ta jān kōm̧m̧ane ippān, bwe ebwebwe.

2 Im raar jutakļo̧k im kajjion̄ in likūt peier ioon e, a eaar ba n̄an er:

3 Jab un̄ūr eō, bwe Anij enaaj m̧an kom̧ eļan̄n̄e kom̧ij likūt peimi ioō, bwe iaar jan̄in kwaļo̧k ennaan eo Irooj eaar jilkintok eō bwe in kwaļo̧ke; im iaar jab ba n̄an kom̧ men eo kom̧ ar ^akajjitōk bwe in ba; kōn menin, Anij e jamin kōtļo̧k bwe inaaj jako ilo iien in.

4 A ij aikuj kakūrm̧ool kien ko im Anij eaar jiron̄ eō; im kōnke iaar ba n̄an kom̧ m̧ool eo kom̧ij illu ippa. Im bar, kōnke iaar kōnono naan in Anij kom̧ ar ekajet eō bwe n̄a ibwebwe.

5 Im ālikin men kein ke em̧ōj an Abinadai kar kōnono naan kein armej ro an kiin̄ Noa raar lōļn̄o̧n̄ im jab likūt peier ioon, bwe Jetōb in Irooj eaar pād ioon; im turin mejān eaar ^aromaak kōn meram otem meram, em̧ool āinwōt Moses ke eaar pād ilo toļ Sainai, ke eaar kōnono ippān Irooj.

6 Im eaar kōnono kōn ^akajoor im maron̄ jān Anij; im eaar wōnm̧aanļo̧k wōt ilo naan ko an, im ba:

7 Kom̧ij lo bwe ejjeļo̧k ami kajoor n̄an m̧an eō, kōn menin ij kadedeļo̧k ennaan eo aō. Aaet, im ij kile bwe e ^awākar e būruōmi kōnke ij ba n̄an kom̧ m̧ool eo kōn jero̧wiwi ko ami.

8 Aaet, im naan kein aō rekobrak kom̧ kōn kejakļo̧kjeņ im bwilōn̄, im kōn illu:

9 A ij kadedeļo̧k ennaan in aō; innām ejjeļo̧k tokjān ia inaaj ilo̧k ie, eļan̄n̄e āindein bwe in mour.

10 A jon̄an in ij ba n̄an eok, ta kom̧ij kōm̧m̧an kake eō, ālikin men in, enaaj āinwōt juon ^akakōļļe im annan̄in men ko renaaj itok.

11 Im kiiō ij kōnono jān bok n̄an kom̧ bwe in ^akien ko an Anij, bwe ij kile bwe rejjab jeje ilo būruōmi; ij kile bwe kom̧ ar katak im katakin kōn nana enan̄in aolepān mour ko ami.

12 Im kiiō, kom̧ij keememej bwe iaar ba n̄an kom̧: Kwōn jab kōm̧anm̧an n̄an eok jabdewōt mennin āe, ak jabdewōt āinwōt men kein ilo lan̄ ilōn̄, ak ko rej ilo laļ ium̧win, ak ko rej ilo dān ium̧win laļ.

13 Im bar juon alen: Kwōn jab badikdik n̄an er, ak jerbal n̄an er; bwe N̄aij Irooj am̧ Anij ij juon Anij ekam̧o, im Ij kipel nana ko an ro jemāer ioon ro nejier, n̄an kein kajilu im kāāmen epepen ko in er ro rej matōrtōre Eō;

14 Im kwaļo̧k jouj n̄an to̧ujin ko in er ro rej iakwe Eō im kōjparok kien ko Aō.

15 Kwōn jab ba pata etan Irooj am̧ Anij; bwe Irooj e jamin likūt ejjeļo̧k ruōn eo ej ba pata Etan.

16 Kwōn keememej raan in ^aJabōt, n̄an kokwōjarjar e.

17 Jiljino raan kwōnaaj jerbal, im kōm̧m̧ani aolep jerbal ko am̧;

18 A raan eo kein kajiljilimjuon ej Jabōt an Irooj am̧ Anij, kwōn jab kōm̧m̧an jabdewōt jerbal, kwe, jaab nejūm̧ m̧aan, jaab nejūm̧ kōrā, rikarejeram̧ m̧aan, jab rikarejeram̧ kōrā, jab kidu ko am̧, jab am̧ ruwamāejet ej pād ilowaan wōrwōr ko am̧;

19 Bwe ilo ^ajiljino raan Irooj eaar kōm̧anm̧an lan̄ im laļ, im lo̧jet, im aolep men otemjej ie; kōn menin Irooj eaar kōjeraam̧m̧an raan in Jabōt, im kokwōjarjar e.

20 Kwōn ^akautiej jemam̧ im jinōm̧, bwe raan ko am̧ ren aetok ioon āneo Irooj am̧ Anij ej lewōj n̄an eok.

21 Kwōn jab ^auror.

22 Kwōn jab ^aļōn̄. Kwōn jab ^bko̧o̧t.

23 Kwōn jab kōnnaan ^anaan in riab ņae riturum̧.

24 Kwōn jab ^aankoņake m̧weo im̧ōn riturum̧, kwōn jab ankoņake lio pāleen riturum̧, jaab ļeo karejeran, jaab lio karejeran, jab an ox, jab an donkey, jaab jabdewōt an riturum̧.

25 Im ālikin men kein ke Abinadai eaar kōm̧m̧an jem̧ļo̧kin ennaan kein eaar ba n̄an er: Kom̧ ar katakin ke armej rein bwe ren lale n̄an kōm̧m̧ani aolep men kein n̄an maron̄ kōjparok kien kein?

26 Ij ba n̄an kom̧, Jaab; bwe eļan̄n̄e kom̧ ar, Irooj e jamin kar kōm̧m̧an bwe in itok im n̄an kanaan enana kōn armej rein.

27 Im kiiō kom̧ ar ba bwe lo̧mo̧o̧r ej itok jān ^akien Moses. Ij bar n̄an kom̧ bwe emennin aikuj bwe kom̧in kōjparok kien Moses n̄an iien in; a ij ba n̄an kom̧, bwe iien eo enaaj itok n̄e e ^bjamin mennin aikuj n̄an kōjparok kien Moses.

28 Im eļapļo̧k, ij ba n̄an kom̧, bwe ^alo̧mo̧o̧r ej jab itok jān ^bkien Moses wōt; a eļan̄n̄e eaar jab kōn ^cpinmuur eo, eo Anij make enaaj kōm̧m̧an kōn jero̧wiwi im bōd ko an armej ro An, bwe ren maron̄ jab naaj lukkuun jako, jekdo̧o̧n n̄e kien Moses.

29 Im kiiō ij ba n̄an kom̧ bwe eaar mennin aikuj bwe en kar wōr juon kien leļo̧k n̄an ro nejin Israel, aaet, em̧ool juon kien ekanooj ^apen; bwe raar juon armej rekijn̄en̄e kōnwaer, ^bjidimkij n̄an kōm̧m̧an bōd, im rum̧wij n̄an keememej Irooj aer Anij.

30 Kōn menin eaar wōr juon ^akien kar leļo̧k n̄an er, aaet, juon kien m̧akūtkūt ko im ^bkain̄i ko, juon kien ren kar kanooj ^cļoore ilo jejjet jān raan n̄an raan, n̄an dāpij er ilo ememej Anij im kuņaer n̄an e.

31 Bwe lo, ij bar n̄an kom̧, bwe aolep men kein rej ^akakōļļe in men ko rej itok.

32 Im kiiō, raar ke meļeļe kien eo? Ij ba n̄an kom̧, Jaab, raar jab meļeļe aolep kien eo; im men in kōnke pen in burueer; bwe raar jab meļeļe bwe ej jamin kar wōr jabdewōt armej en mour ^aijello̧kun wōt n̄e eaar kōn lo̧mo̧o̧ren an Anij.

33 Bwe lo, Moses eaar ke jab kanaan n̄an er kōn itok eo an Messaia, im bwe Anij enaaj pinmuuri armej ro An? Aaet, im em̧ool ^aaolep rikanaan ro raar kanaan jān kar jinoin laļ—raar jab ke kōnono eļapļo̧k ak edikļo̧k kōn men kein?

34 Raar jab ke ba bwe ^aAnij make enaaj kar wanlaļtak ilubwiljin ro nejin armej, im bōk ioon E jekjek in armej, im wōnm̧aanļo̧k ilo kajoor eļap ioon mejān laļ?

35 Aaet, im raar jab ke ba barāinwōt bwe Enaaj kar kakūrm̧ool ^ajerkakpeje an ro remej, im bwe E, e make, en kar en̄taan in jorrāān?