1 Im ālikin men kein Limai im armej ro an raar ro̧o̧l n̄an jikin kwelo̧k in Nipai, im kar jino jokwe ilo āneo bar juon alen ilo aenōm̧m̧an.

2 Im ālikin men kein ke ar mootļo̧k elōn̄ raan ko riLeman ro raar bar jino in lim̧otak ilo illu ņae riNipai ro, im raar jino n̄an itok ilo tōrerein ko an peļaakin āneo.

3 Kiiō raar mijak im jab m̧an er, kōnke kanejnej eo kiin̄ eo aer eaar kōm̧m̧ane n̄an Limai; a rekar ubrare er ilo ^ajepāer, im kwaļo̧k maron̄ ioer; im kar jino n̄an likūt eddo ko ^breddo ioer, im kōm̧akūtkūt er āinwōt ren kar kōm̧m̧an n̄an juon kidu donkey ebwebwe—

4 Aaet, aolep men in eaar kōm̧m̧an bwe naan an Irooj en maron̄ kūrm̧ool.

5 Im kiiō en̄taan ko an riNipai ro raar eļap, im eaar ejjeļo̧k iaļ bwe ren kōtļo̧k er jān peier, bwe riLeman ro raar jepooļ er ijeņ im ijeņ.

6 Im ālikin men kein armej ro raar jino aln̄ūrn̄ūr ippān kiin̄ eo kōnke en̄taan ko aer; im raar jino in kōņaan ilo̧k ņae er n̄an kōpata. Im raar kanooj kaen̄taan kiin̄ eo kōn abņōņō ko aer; kōn menin eaar kōtļo̧k n̄an er bwe ren kōm̧m̧an ekkar n̄an ikdeelel ko aer.

7 Im raar kuktok ippān doon bar juon alen, im kōņaan kein tariņae ko aer, im ilo̧k ņae riLeman ro n̄an kokakļo̧k er jān āneo āneer.

8 Im ālikin men kein riLeman ro raar den̄ļo̧ke er, im kokakļo̧k er, im m̧an elōn̄ iaer.

9 Im kiiō eaar wōr juon ^ajan̄ im liaajlo̧ļ ilubwiljin armej ro an Limai, lio ejako pāleen ej jan̄ kōn ļeo pāleen, im ļeo nejin im lio nejin rej jan̄ kōn jemāer, im ļōm̧aro jeiūm̧jāān-jeiūm̧jatin kōn ļōm̧aro jeir.

10 Im kiiō eaar lōn̄ kōrā ro ejako pāleer ilo āneo, im raar kanooj liaajlo̧ļ jān raan n̄an raan, bwe juon lōļn̄o̧n̄ eļap kōn riLeman ro eaar itok ioer.

11 Im ālikin men kein aer liaajlo̧ļ wōt eaar kalim̧otak bwe in armej ro an Limai n̄an illu ņae riLeman ro; im raar bar ilo̧k n̄an kōpata, a kar bar kokak likļo̧k er, im en̄taan kōn eļap jorrāān.

12 Aaet, im raar bar ilo̧k alen kein kajilu, im en̄taan ilo ejja wāween in wōt; im ro raar jab mej raar bar ro̧o̧l n̄an jikin kwelo̧k in Nipai.

13 Im raar kōttāik er em̧ool n̄an bwidej, im ajeļo̧k er n̄an ineen kōm̧akoko, wūjlepļo̧k er bwe ren den̄ļo̧ke er, im n̄an kokakļo̧k er ijeņ im ijeņ, im kainene er, ekkar n̄an kōņaan ko an rikōjdat ro aer.

14 Im raar ^akōttāik er em̧ool ilo m̧wilaļ ko in ettā bōro; im raar kanooj kūr n̄an Anij; aaet, em̧ool aolepān raan eo raar lam̧ōj n̄an aer Anij bwe En kōtļo̧k er jān en̄taan ko aer.

15 Im kiiō Irooj eaar ^arum̧wij n̄an ron̄ kūr eo aer kōnke jero̧wiwi ko aer; mekarta Irooj eaar ron̄ kūr ko aer, im jino kapidodo būruōn riLeman ro bwe ren jino kameraikļo̧k eddo ko aer; ijoke Irooj eaar jab lo ekkar bwe En kōtļo̧k er jān kōm̧akoko.

16 Im ālikin men kein raar jino jebanļo̧k jidik-iļo̧k-jidik ilo āneo, im kar jino kallib grain eļapļo̧k, im bwijin in sip ko, im mennin mour ko, bwe ren jab en̄taan kōn kwōle.

17 Kiiō eaar kanooj ļap bōnbōn in kōrā ro, eļapļo̧k jān em̧m̧an ro; kōn menin kiin̄ Limai eaar jiron̄ bwe aolep em̧m̧aan en ^aajejeļo̧k n̄an rejetak eo an ^bkōrā ro ejako pāleer im ajri ro nejier, bwe ren maron̄ jab jako kōn kwōle; im men in raar kōm̧m̧ane kōnke ļap in bōnbōn eo eaar mej.

18 Kiiō armej ro an Limai raar koba ippān doon ilo juon ānbwin jon̄an wōt aer maron̄, im oņaake grain im mennin mour ko aer;

19 Im kiin̄ eo make eaar jab lōke armej ro an itulik in wōrwōr ko an jikin kwelo̧k eo, m̧ae iien eaar bōk ribaar ro an ippān, kōnke eaar mijak bwe emaron̄ jān jet wāween ko wōtlo̧k ilo pein riLeman ro.

20 Im eaar kōm̧m̧an bwe armej ro an ren lale āneo ipeļaakin ijo, bwe jān jet wāween ren maron̄ bōk pris ro raar koļo̧k ilo āne jem̧aden eo, ro raar ^ako̧o̧te leddik ro nejin riLeman ro, im bwe eaar kōm̧m̧an eļap ko̧kkure n̄an itok ioer.

21 Bwe raar kōņaan n̄an bōk er bwe ren maron̄ kaje er; bwe raar itok ilo āneen Nipai ilo bon̄, im bōkļo̧k grain ko aer im elōn̄ mennin aorōk ko aer; kōn menin raar pād im kōttar er.

22 Im ālikin men kein eaar jab bar wōr poktak ikōtaan riLeman ro im armej ro an Limai; em̧ool m̧ae iien eo ^aAmmōn im ļōm̧aro jein im jatin raar itok n̄an āneo.

23 Im kiin̄ eo ke eaar pād itulik in wōrwōr ko an jikin kwelo̧k eo ippān ribaar eo an, eaar lo Ammōn im ļōm̧aro jein im jatin; im kōnke eaar ļōmņak er rej pris ro an Noa kōn menin eaar kōm̧m̧an bwe ren kar bōk er, im ren lokjak, im joļo̧k er ilo ^akalbuuj. Im eļan̄n̄e raar pris ro an Noa en kar kōm̧m̧an bwe ren ilo̧k n̄an mej.

24 A ke eaar lo bwe raar jab, a bwe raar ro jein im jatin, im kar itok jān āneen Zaraemla, eaar obrak kōn eļap otem ļap m̧ōņōņō.

25 Kiiō kiin̄ Limai eaar jilkinļo̧k, m̧oktaļo̧k jān itok eo an Ammōn, juon ^aoran edik in em̧m̧aan ro n̄an ^bpukpukot āneen Zaraemla; a raar jab lo e, im raar jebwābwe ilo āne jem̧aden.

26 Mekarta, raar lo juon āne eo eaar lōn̄ armej ie; aaet, āneo eaar libobo kōn ^adi ko rem̧ōrā; aaet, āneo eaar wōr armej ie im eo kar ko̧kkure; im er, kōnke raar ļōmņak bwe eaar āneen Zaraemla, raar ro̧o̧l n̄an āneen Nipai, im kar tōprakļo̧k ilo tōrerein ko an āneo ejjab elōn̄ raan ko m̧okta jān itok eo an Ammōn.

27 Im raar bōktok juon ļo̧o̧k ippāer, em̧ool ļo̧o̧k eo an armej ro im di ko dier raar loi; im eaar m̧wijiti ioon alen ko in ore.

28 Im kiiō Limai eaar bar obrak kōn m̧ōņōņō ke eaar jeļā jān lo̧n̄iin Ammōn bwe kiin̄ Mosaia eaar wōr juon an mennin ^aleļo̧k jān Anij, eo kake eaar maron̄ ukok m̧wijm̧wij rot kein; aaet, im Ammōn eaar barāinwōt m̧ōņōņō.

29 Mekarta Ammōn im ļōm̧aro jein im jatin raar obrak kōn būrom̧ōj kōnke elōn̄ iaan ro jeir im jatier raar mej;

30 Im barāinwōt bwe kiin̄ Noa im pris ro an raar kōm̧m̧an bwe armej ro ren kōm̧m̧an elōn̄ jero̧wiwi ko im nana ko ņae Anij; im raar barāinwōt būrom̧ōj kōn ^amej eo an Abinadai; im barāinwōt ^bilo̧k eo an Alma im armej ro raar ilo̧k ippān, ro raar kajutak kabun̄ eo an Anij kōn kajoor im maron̄ an Anij, im tōmak ilo naan ko kar kōnono jān Abinadai.

31 Aaet, raar būrom̧ōj kōn ilo̧k eo aer, bwe raar jab jeļā ia raar ko n̄an e. Kiiō ren kar ilo m̧ōņōņō kobaļo̧k ippāer, bwe er make raar deļo̧n̄ ilo juon bujen ippān Anij n̄an jerbal n̄an e im kōjparok kien ko An.

32 Im kiiō jān itok eo an Ammōn, kiin̄ Limai eaar barāinwōt deļo̧n̄ ilo juon bujen ippān Anij, im barāinwōt elōn̄ iaan armej ro an, n̄an jerbal n̄an e im kōjparok kien ko An.

33 Im ālikin men kein kiin̄ Limai im elōn̄ iaan armej ro an raar kōņaan peptaij; a eaar ejjeļo̧k ilo āneo eaar wōr an ^amaron̄ jān Anij. Im Ammōn eaar abin kōm̧m̧ane men in, watōke e juon rikarejeran ejjab tōllo̧ke.

34 Kōn menin raar jab ilo iien in kajutak er ilo juon kabun̄, a kōttar wōt Jetōb eo an Irooj. Kiiō raar kōņaan erom āinwōt Alma im ļōm̧aro jein im jatin, ro raar koļo̧k ilo āne jem̧aden.

35 Raar kōņaan peptaij āinwōt juon kam̧ool im juon naan in kam̧ool bwe raar m̧ōņōņō in jerbal n̄an Anij kōn aolepān burueer; mekarta raar karum̧wijļo̧k iien eo; im bwebwenato eo kōn peptaij eo aer naaj ^akwaļo̧k e tokālik ijin.

36 Im kiiō aolep kōttōpar ko an Ammōn im armej ro an, im kiin̄ Limai im armej ro an, raar n̄an kōtļo̧k er make jān pein riLeman ro im jān kōm̧akoko.