1 Xcʼulmataj cʼut chi ri Alma xanimaj chquiwäch ri u pataninelab ri ajawinel Noé. Areʼ xuqʼuex u cʼux che ri u mac y che ri itzel ri u banom, xbec chi cʼuyal chquixol ri winak, xuchaplej u cʼutic ri u tzij ri Abinadí.

2 Kas jeʼ, xebutijoj chrij ri cäcʼulmataj na, xukujeʼ cʼut chrij ri cʼastajibal quech ri cäminakib, y ri esabal qui mac ri winak, y ri cäbantaj na rumal ri cuinem, y ri cʼäxcʼolil rech ri u cämical ri Cristo, y ri u cʼastajibal, y ri pakibal pa ri caj.

3 Xutijoj cʼut chque conojel ri cäquicojo ri u tzij. Xebupixabaj cʼut chi cʼuyal rech man cuta taj ri ajawinel. E qʼui xquicoj ri u tzij.

4 Xcʼulmataj chi janipa ri xecojonic, xebec pa jun cʼolibal u biʼ Mormón, ri ajawinel u cojom waʼ biʼaj che, ri cäriktaj cʼut che u cʼulbat ri nimalaj ulew. Cʼo jujun tak mul, cärik xolotal pa ri junab, e nojinak cucʼ cʼaʼnalaj tak juyubal awaj.

5 Cʼo cʼu pa ri ulew re Mormón jun qʼuiyibal jaʼ re chʼajchʼojalaj jaʼ jawi xeʼ wi ri Alma. Chunakaj ri jaʼ cʼo jun cʼolibal jawi cʼo wi alaj tak cheʼ. Chilaʼ xrawaj wi rib pa kʼij chuwäch ri u tzucunic ri ajawinel.

6 Xcʼulmataj cʼut chi conojel ri xecojonic, xebec cʼut jelaʼ chutaic u tzij.

7 Ocʼowinak sibalaj kʼij, qui mulim quib e qʼui winak pa ri cʼolibal re Mormón chutaic ri u tzij ri Alma. Jeʼ, conojel ri xquicoj ri u tzij xemulix che u taic. Xutijoj cʼut chquiwäch y xukʼalajisaj ri qʼuexbal cʼuxaj che ri macaj, y ri esabal macaj, y ri cojobal che ri Ajawaxel.

8 Xcʼulmataj cʼu waʼ, xubij: Chiwilampeʼ ri jaʼ rech ri Mormón (are jewaʼ u biʼ), y wachanim cʼut, je jas i rayim chic cʼut chi quixoquic pa ri u jumalaj chij ri Dios, rech cʼu cäbix u winak chiwe, rech cʼut quitoʼ chbil iwib y xak junam quicʼam bic ri ralal ri iwekan, rech man quinaʼ taj ri ralal—

9 Kas jeʼ, we cʼo ri i rayibal rech quixokʼic cucʼ ri areʼ ri quebokʼic, jeʼ, chi quicuʼbisaj qui cʼux ri rajwaxic chque quecuʼbisax qui cʼux, rech cʼut ix kʼalajisanelab rech ri Dios pa tak ri kʼij, pa tak ri jastak xukujeʼ, pa tak cʼolibal jawi ix cʼo wi, pune cʼä ri i cämical, rech quesatajic ri i mac rumal ri Dios, y chi quixajilaxic cucʼ ri winak re ri nabe cʼastajibal, rech cʼo junalic i cʼaslemal—

10 Quinbij chiwe wacamic, we are waʼ ri u rayibal ri iwanimaʼ, ¿jachin re ri ix cäkʼatinic che ri u banic ri i kasbal xeʼ jaʼ pa ri u biʼ ri Ajawaxel, je jas jun kʼalajisabal chuwäch chi i banom yabal tzij rucʼ che u patanixic, y che u nimaxic u takbal, rech sibalaj cumaqʼuij ulok ri Ruxlabal piwiʼ?

11 Y aretak ri winak qui tom tak we tzij, xquipakʼapaʼ qui kʼab rucʼ quicotemal, y xquibij: Are waʼ ri rayibal pa kanimaʼ.

12 Cʼäte cʼu riʼ, xcʼulmataj chi ri Alma xuchap ri Helam, areʼ nabe chquiwäch ri nicʼaj, y xbec rucʼ, y xetaqʼuiʼc pa ri jaʼ, y xucoj u chukʼab che u bixic: O Ajawaxel maqʼuij la ri Uxlabal la puwiʼ ri pataninel la, rech cuban we chac riʼ rucʼ jun chʼajchʼojalaj ranimaʼ.

13 Are cʼu u bim chic we tzij, ri Tuxlabal rech ri Ajawaxel xkaj puwiʼ, y xubij: Helam, cʼo wucʼ ri u takanic ri Dios, ri ronojel Cuinel, y catinkasaj xeʼ jaʼ je jas jun kʼalajisabal chi a banom yabal tzij che u patanixic areʼ cʼä pa ri a cämical pa ri a tiojil. Y chi cämacʼquenic ri Uxlabal rech ri Ajawaxel pawiʼ, y chi cuyaʼ ri junalic a cʼaslemal rumal ri esabal macaj rech ri Cristo, areʼ ri u sucʼumam cnaok pa ri tiquiribal rech ri uwächulew.

14 Cʼäte Alma u bim canok we tzij, ri e quieb, Helam y Alma, xquikajisaj quib xeʼ ri jaʼ, xewalij chic cʼu ulok puwiʼ ri jaʼ, xquicot ri canimaʼ rumal chi xenojisax che ri Uxlabixel.

15 Jumul chic, ri Alma xuchap jun chi winak, y xoc che camul pa ri jaʼ, xukasaj cʼut ri jun xeʼ jaʼ je ri xubano che ri nabe, xane ri Alma man xkaj tä chic chuxeʼ ri jaʼ.

16 Je u beyal cʼu waʼ, xebukasaj xeʼ jaʼ conojel ri e petinak pa ri cʼolbal Mormón, y xeajilatajic, xebopan pa quieb cient rucʼ cajib winak. Jeʼ, xekasatajic xeʼ jaʼ pa ri jaʼ rech ri Mormón, xenojisax rucʼ ri tokʼobisam wächaj rech ri Dios.

17 Y pa we kʼij riʼ cʼä pa ri kʼij ri cäpe na, xbix cʼut chque ri u winakil ri Dios, o ri u winakil ri Cristo. Y xcʼulmataj cʼut chi ronojel jachin cʼut ri xuban ri u kasbal xeʼ jaʼ rumal ri u cuinem y ri u takanic ri Dios, areʼ xetan rucʼ ri u winakil.

18 Xcʼulmataj cʼut chi ri Alma, rucʼ ri u takanic ri Dios, xukʼaxaj ri u takanic ri Dios pa qui kʼab jujun achijab, xquiban tewichinelab. Xukʼaxaj u takanic ri Dios pa u kʼab jun tewichinel chquijujunal nicʼaj ciento, rech quebutzijobej, y rech quebutijoj chrij ri jastak rech ri rajawibal ri Dios.

19 Y xutak chque chi xak cäquitijoj ri jastak ri u tijom chque, y jas ri qui bim ri lokʼalaj kʼalajisanelab che ri cäpe na.

20 Xutak cʼu chque chi cäquitijoj xak xuwi ri qʼuexbal cʼuxaj che ri macaj, y ri cojobal che ri Ajawaxel, ri resam canok ri qui mac ri u winak.

21 Xutak chque chi man cʼo tä chʼoʼj chquixol, xak xuwi chi quecaʼy sibalaj sucʼ, rucʼ jun qui cojobal y jun kasbal xeʼ jaʼ, rucʼ ri canimaʼ ximom cachbil quib rucʼ lokʼokʼebal cʼuxaj.

22 Jeriʼ xtakan chque chi quequitzijobej. Jeriʼ cʼut xebux e ralcʼual ri Dios.

23 Xtakan chque chi cäquichajij ri lokʼalaj kʼij re uxlanem, chi cäquinimaj u lokʼ, chi ronojel kʼij cäquimaltioxij che ri Ajawaxel qui Dios.

24 Xukujeʼ xtakan chque chi ri tewichinelab, ri u kʼaxam chque ri u takanic ri Dios, chi quechacun na rucʼ ri qui kʼab che tzukbal que.

25 Xkʼataj jun kʼij pa tak jujun samana rech cäquimulij quib che ri qui tijoxic ri winak, y rech cäquikʼijilaj ri qui Dios, y xukujeʼ cʼut chi cäquimulij quib pa tak mul ri quecuinic.

26 Cʼu ri tewichinelab man yatal tä chque chi quetzukic cumal ri winak, xak xuwi rumal ri qui chac cäquicʼam na ri tokʼobisam wächaj rech ri Dios, rech quenimaric rumal ri Uxlabixel, y rech cʼo ri retamabal ri Dios cucʼ rech jeriʼ quetijonic rucʼ ri u cuinem y ri u takanic ri Dios.

27 Xukujeʼ, ri Alma xtakan chque ri areʼ re ri winakil chi cäquiyaʼ ri qui jastak, chquijujunal je jas ri cʼo cucʼ. We jun cʼo u qʼuiyal rucʼ, rajwaxic chi sibalaj cuyaʼ na, we jun xaʼ jubikʼ cʼo rucʼ, xak cäraj jubikʼ chi cuyaʼo, y cäyataj na che jachin ri man cʼo tä rucʼ.

28 Are jeriʼ cäquiyaʼo ri qui jastak rucʼ tzokopital rutzil ri canimaʼ, rucʼ utzalaj qui rayibal che ri Dios, xukujeʼ chque ri tewichinelab ri cʼo ri rajwaxic chque, jeʼ, chque conojel winak ri cʼo rajwaxic chque y e chʼanalic.

29 Are cʼu waʼ ri xubij areʼ chque, je jas u takom ulok ri Dios che. Sucʼum cʼu waʼ xebin cho ri Dios, xquitoʼo cachbil quib pa ri jastak re we cʼaslemal riʼ, xukujeʼ pa ri jastak re ri uxlabal. Waʼ je jas ri qui rajwaxic y ri qui rayibal.

30 Xcʼulmataj cʼut chi juntir waʼ xbantajic pa ri ulew re Mormón, jeʼ, chuxcut ri jaʼ re Mormón, pa ri cʼachelaj ri cʼo chunakaj ri jaʼ rech Mormón. Sibalaj jeʼlic cäcaʼy are chquiwäch ri are ri xquirik ri retamabal ri qui Colonel jelaʼ, jeʼ, y sibalaj e tewichim rumal quebixon chunimarisaxic u kʼij che junalic.

31 Y xbantaj cʼu we jastak pa ri cʼulbat re ri nimalaj ulew, rech man copan tä waʼ jastak che ri retamaxic ri ajawinel.

32 Xane chiwilampeʼ, xcʼulmatajic chi ri ajawinel xurik jun salaben ib chquixol ri winak, xebutak cʼut ri u pataninelab che qui cʼaqʼuelexic. Rumal riʼ, pa ri kʼij tajin cäquimulij quib che ri u taic ri u tzij ri Ajawaxel, bixinak che ri ajawinel.

33 Cʼu ri ajawinel xubij chi are ri Alma tajin quebuwalajisaj ri winak rech cäquicʼulaj chrij. Rumal waʼ, xebutak ri rajchʼoʼjab che ri quetzelaxic.

34 Xcʼulmataj cʼut chi ri Alma y ri u winakil ri Ajawaxel xquetamaj ri qui petic ri rajchʼoʼjab ri ajawinel. Rumal riʼ, xquichapo ri qui panibal, cʼu ri quixokilal y ri calcʼual, xebel bic pa ri ulew cätzʼinowic.

35 Xebajilitajic cʼut, ri e areʼ cajib cient rucʼ nicʼaj cient winak.