1 Xcʼulmataj cʼut chi ri Abinadí xuqʼuis waʼ u tzij. Rumal waʼ, ri ajawinel xtakan chque ri ajawib rech cäquicʼam bic, y chi cäquicämisaj cʼut.

2 Xane cʼo jun chquixol, u biʼ Alma, areʼ rijaʼlil ri Nefi xukujeʼ. Areʼ cʼacʼal ala, y xucojo cʼut ri u tzij ri Abinadí ri u bim canok. Areʼ retaʼm chic chrij ri macaj ri xukʼalajisaj ri Abinadí chquij. Rumal waʼ, xboʼchiʼn che ri Ajawinel puwiʼ ri Abinadí rech man cäpe tä royowal rucʼ, xak chi cuyaʼ che chi quel bic rucʼ jamaril.

3 Xane ri ajawinel xpe jun cʼaʼnalaj royowal rucʼ, y xtakan che resaxic ri Alma chquixol, y xebutak ri u pataninel chrij rech cäquicämisaj.

4 Are cʼu waʼ xanimajic chquiwäch y xrawaj rib rech man xquirik taj. Rawam rib qʼuialaj tak kʼij, xutzʼibaj ri u tzij ri Abinadí ri u bim canok.

5 Xcʼulmataj cʼut chi ri ajawinel xutak che ri u chajinelab rech cäquisutij rij ri Abinadí rech cäquichapo. Xquiyutu y xquiqʼuiak pa cheʼ.

6 Ocʼowinak cʼut oxib kʼij, ri ajawinel xtzijon cucʼ ri rajawab, xtakan chi jumul chi ri Abinadí cäcʼam ulok chuwch.

7 Xubij cʼut che: Abinadí, ka rikom jun tzujunic pawiʼ, takal chawe ri a cämical.

8 Are cʼu a bim chi ri kas Dios cäkaj na chquixol ri calcʼual ri achijab. Rumal cʼu waʼ, catcämisax na we man cattzelej tä awib che ri a bim, ri cʼäxalaj a tzij chwij in y chquij cʼut ri nu winak.

9 Cʼäte riʼ, ri Abinadí xubij cʼu waʼ che: Quinbij chawe chi man quintzelej tä wib che ri nu bim chawe chquij we winak riʼ. Rumal waʼ, kastzij xinyaʼ wib pa i kʼab rech quiwetamaj chi kastzij.

10 Kas jeʼ, quinkʼiʼ na cʼä pa ri cämical, y man quintzelej tä wib che ri nu bim, y ri are cʼut jun kʼalajisabal na chiwij. We quinicämisaj, cäturuw na ri quiqʼuel ri man cʼo tä macaj iwumal, are cʼu waʼ xukujeʼ cäcanajic jas kʼalajisabal chiwij pa ri qʼuisbal kʼij.

11 Cʼu ri ajawinel Noé cäraj jubikʼ cutzokopij areʼ, rumal xuxej rib che ri u tzij, jeʼ, xuxej cʼu rib, chi cäpe ri u kʼatbal tzij ri Dios puwiʼ.

12 Xane ri ajawab xquirak qui chiʼ chrij ri Abinadí. Xquichaplej u tzujuxic chic, xquibij cʼut: U yokʼom cʼut ri ajawinel. Rumal waʼ, xpe sibalaj royowal ri ajawinel chrij, y xujach cʼut pa qui kʼab rech cäquicämisaj.

13 Xcʼulmataj cʼu waʼ chi xquichapo, y xquiximo, y xquiban cʼäx che ri u tiojil rucʼ kʼakʼ, jeʼ, cʼä xcämic.

14 Are cʼu ri reb ri kʼakʼ xuchaplej u cʼatic areʼ, xebuchʼabej, y xubij cʼut chque:

15 Chiwilampeʼ, je jas xiban chwe, jeriʼ cäcʼulmataj na chi ri iwijaʼlil cäquiban na chi qʼui winak cäquikʼiʼ na ri u kʼoxom re ri cämical pa ri kʼakʼ. Y waʼ rumal ri qui cojobal che ri colotajibal re ri Ajawaxel ri qui Dios.

16 Cäcʼulmataj cʼu na chi ri ix quirik na ri cʼäx rucʼ ronojel u wäch tak yabil rumal ri i mac.

17 Kas jeʼ, quixsocotax cʼu na pa tak cʼolibal, y quixesax na y quixjabux cʼu na bic jeriʼ y jelaʼ je jas quebanimajic ri jupuk juyubal awaj chquiwäch ri cʼaʼnalaj juyubal tak awaj.

18 Pa ri jun kʼij riʼ, quixtzucux na, y quixchaptaj na pa qui kʼab ri i cʼulel. Cʼäte cʼu waʼ, quirik na jun cʼäxcʼol je ri xinrik in, are ri kʼoxom re ri cämical rech kʼakʼ.

19 Je cʼu waʼ, ri Dios cutzelej u qʼuexel ri cʼäxcʼol chque ri areʼ ri cäquisach qui wäch ri u winak. O Dios cʼamaʼ la ri wanimaʼ.

20 Are cʼu ri Abinadí u bim waʼ u tzijobal, xtzakic, rumal xurik ri cʼäx re ri cämical pa ri kʼakʼ. Jeʼ, xcämisaxic rumal man wukʼekumaj tä ri u takbal ri Dios, xutzʼapij ri sakalaj u tzijobal rucʼ ri u cämical.