1 Aretak ri ajawinel Benjamín xuqʼuis u bixic ri tzij ri yatajinak che rumal ri u ángel ri Ajawaxel, xcʼulmataj chi xrilo ri qʼuialaj winak, jeʼ, e kajinak pa ri ulew, rumal chi xquixej quib ri winak cho ri Ajawaxel.

2 Ri e areʼ xquichomaj jas qui banic ri qui cʼojical pa ri qui tiojil, xquichomaj chi ri cʼajcʼaj ulew utz na chquiwäch. Conojel junam xquirak qui chiʼ, xquibij: O, chel ulok ri cʼux la chke, banaʼ la chi cächacun ri u quiqʼuel ri Cristo rech cutoj ka mac, rech cäkacʼam ri cuyubal ka mac, rech cʼut quechʼajchʼojarisataj ri kanimaʼ. Rumal uj cujcojon che ri Jesucristo, ri u Cʼojol ri Dios, ri xubano ri caj y ri uwächulew, y conojel ri jastak. Ri areʼ cäkaj na chquixol ri calcʼual ri achijab.

3 Xcʼulmatajic chi bitajinak cʼut waʼ jastak, cʼäte riʼ, ri Ruxlabal ri Ajawaxel xkaj paquiwiʼ, xenojisax rucʼ quicotemal rumal xquicʼam ri esabal qui mac. Xquinaʼ chi cʼo ri jamaril pa canimaʼ rumal ri nimalaj qui cojobal che ri Jesucristo, ri cäpe na. Waʼ je jas ri u tzij ri ajawinel Benjamín xubij chque.

4 Cʼu ri ajawinel Benjamín xujak u chiʼ jumul chic y xuchaplej cʼut che qui tzijobexic, xubij: Wachil, wachalal walaxic, nu winak, quinwaj chic jumul chi quitatabej, rech quito, y rech quichʼobo ri nicʼaj nu tzij chic ri quinbij na chiwe.

5 Chiwilampeʼ, we ri etamabal re ri rutzil ri Dios ix u cʼastajisam rech quinaʼ pa iwanimaʼ chi ix man cʼo tä i patan, y chi man ix patal taj, y ix kajinak—

6 Quinbij chiwe chi we tä ix petinak che ri etamabal rech ri rutzil ri Dios, xukujeʼ rech ri u cuinem ri man cuyaʼ tä chi cäjunamaxic, y ri sak u noʼjibal, ri u kʼiʼobal che reyexic, cʼu ri utzilal nim u wäch ri copanic cucʼ ri calcʼual ri achijab, xukujeʼ ri tojbal macaj ri xsucʼumatajic tzpa ri jekbal re ri uwächulew, rumal rech jachin ri cucuʼbisaj u cʼux rucʼ ri Ajawaxel, y cunimaj cʼut ri u takbal rucʼ u sacʼajinic, we cukʼiʼ pa ri cojobal cʼä pa ri qʼuisbal rech ri u cʼaslemal, are quinbij ri cʼaslemal pa ri tiojil—

7 Quinbij chi are waʼ ri achi ri cucʼamo ri colotajibal rumal ri tojbal macaj ri xsucʼumax tzpa ri u tiquiribal ri uwächulew chque conojel winak ri xecʼojiʼ tzpa ri u kajic ri Adán, ri e cʼo wäcamic, y ri cäcʼojiʼc na che junalic cʼä pa ri qʼuisbal re ri uwächulew.

8 Rumal we beyal riʼ cäpe ri colotajibal. Man cʼo tä jun colotajibal chic chuwäch waʼ, ri bitajinak, y man cʼo tä xukujeʼ jun u banic chic rech cäcolotaj ri achi, xak xuwi waʼ ri nu bim canok.

9 Chixcojonok che ri Dios, chicojoʼ chi areʼ kas cʼolic, chi areʼ xuban can conojel ri jastak ri cʼo cho ri ulew, y xukujeʼ ri cʼo chicaj. Chicojoʼ cʼut chi areʼ cʼo ronojel ri etamabal, ronojel cuinem, cho ri ulew, xukujeʼ cho ri caj. Chicojoʼ chi ri achi man cuchʼob tä ronojel ri jastak ri cäcuin cuchʼobo ri Ajawaxel.

10 Xukujeʼ chicojoʼ chi takal chiwe chi quiqʼuex i cʼux che ri u mac, chi quiyaʼ canok, chi quimachʼachʼej iwib chuwäch ri Dios, chi quitaʼ che chi cucuyu ri i mac. We tä quicoj waʼ jastak, chicojoʼ i chukʼab che u banic.

11 Jumul chic quinbij chiwe, je jas ri xinbij can nabe, ix i rikom ri etamabal rech ri u juluwem ri Dios, o we tä iwetaʼm chrij ri rutzil, we tä i naʼom ri lokʼokʼebal u cʼux, we tä cʼut i cʼamom ri esabal i mac ri cuyaʼ jun nimalaj quicotem pa ri iwanimaʼ, je jas i rikom waʼ, jeriʼ quinwaj chi cäcanaj pa ri iwanimaʼ ri i natabal re ri nim u kʼij ri Dios. Xukujeʼ cänataj chiwe chi man cʼo tä i patan ix, y chi cʼo ri nimalaj rutzilal chiwe cʼä pa ri u kʼiʼic ri cʼäxcʼolil iwumal ix, ri man takal tä chiwe chi cäyaʼic ri utzalaj jastak chiwe, chi quimachʼachʼej iwib rucʼ jun nimalaj machʼachʼem, chi quisiqʼuij ri u biʼ ri Ajawaxel ronojel kʼij, chi amakʼel co ix cʼo wi pa ri cojobal che ri cäpe na, ri bim canok rumal ri u chiʼ ri ángel.

12 Chiwilampeʼ cʼut quinbij chiwe, we tä quiban waʼ, amakʼel cʼo na i quicotemal, cʼo na sibalaj lokʼokʼebal cʼuxaj rech ri Dios iwucʼ. Amakʼel cʼut cʼo na iwucʼ ri esabal ri i mac. Quixnimarisax na pa ri iwetamabal che ri u juluwem ri areʼ ri xixubano, xukujeʼ ri retamabal che ri xucʼ y ri kastzij.

13 Man cʼo tä na i rayibal rech quiyokʼ iwib, xak chi quirayij chi quixcʼojiʼc pa quicotemal rucʼ utzilal, chi cäyaʼic chque chquijujunal achijab ri kas rech.

14 Xukujeʼ man quiyaʼ tä na chi ri iwalcʼual quebinic e chʼanalic rucʼ qui numical. Miyaʼ chque chi cäquixalkʼatij ri u takbal ri Dios. Miyaʼ chque chi cäquichʼoʼjij quib, y chi cäwalajisax coyowal cachbil quib rech cäquipatanij ri itzel, areʼ ri ajtij rech ri macaj, areʼ ri itzel uxlabal ri bitajinak canok cumal ri ka tat, areʼ ri u cʼulel ronojel suqʼuilal.

15 Xak chebitijoj ri iwalcʼual chi quebinic pa ri tak be rech ri kastzij, chi quechʼob na ri utz chuwäch ri man utz taj. Chebitijoj chi cäquilokʼokʼej quib, chi cäquipatanij quib xukujeʼ.

16 Xukujeʼ, ri ix quiyaʼ na toʼbal chque ri cʼo qui rajwaxic. Quiyaʼ ri i jastak che ri cʼo u rajwaxic. Miyaʼ che ri molonel chi cutaʼ na chiwe y man quiqʼueqʼuej che u yaʼic, y miwesaj bic apanok rech cäcämic.

17 We ne quibij: Ri jun achi u cʼamom puwiʼ ri u mebaʼil. Rumal riʼ, man quinyuk tä ri nu kʼab che, man quinyaʼ tä ri nu wa che. Man quinyaʼ tä che ri cʼo wucʼ rech man curik tä cʼäx, are kas tzʼakat ri cʼajisabal u wäch.

18 Xane quinbij chiwe: O at achi, jachin ri cuban jeriʼ, nim u rajwaxic rech cuqʼuex u cʼux che ri u mac. We tä man cuqʼuex tä u cʼux che ri u banom, cäcäm na che junalic, man cʼo tä na u cʼolibal pa ri rajawibal ri Dios.

19 Are je baʼ, ¿la man konojel uj molonel xukujeʼ? ¿La man rajwaxic tä ri Kajawal chke konojel, jeʼ, ri kas Dios, rumal tak conojel ri ka jastak, ri ka wa, ri katzʼiak, ri kʼän puak, ri sak puak, apachique cʼut u banic ri kʼinomal ri cʼo kucʼ?

20 Chiwilampeʼ cʼut, wachanim riʼ, ix i siqʼuim ri u biʼ, cʼu ix i tzʼonom ri esabal ri i mac. ¿La xuyaʼ areʼ chi man cʼo tä u patan i boʼchiʼm tokʼob? Man jeʼ taj. Areʼ xmacʼquienic ri ruxlabal piwiʼ, y xuban chi xoc sibalaj quicotemal pa ri iwanimaʼ. Xutzʼapij ri i chiʼ rech man quixcuin taj quixchʼawic rumal sibalaj waʼ nimalaj i quicotemal.

21 Wachanim cʼut, we tä ri Dios, ri xixuwinakirisaj, areʼ rajwaxic chiwe pa ri i cʼaslemal, pa ronojel ri cʼo iwucʼ, y pa ronojel ri quibano, we tä areʼ cuyaʼ chiwe apachique sucʼalaj jasäch ri quitaʼ che rucʼ cojobal, we quixcojo chi kas quicʼam na, cʼu we cuban jeriʼ, sibalaj rajwaxic chi quiyaʼ ri i jastak iwechbal iwib.

22 We tä quikʼat tzij puwiʼ ri achi ri cutzʼonoj chiwe rech quisipaj ri cʼo iwucʼ, rech man cäcäm taj, y ix quiwetzelaj u wäch, sibalaj tzʼakat ri kʼatbal tzij ri cäpe na piwiʼ rumal rech man xiyaʼ taj ri cʼo iwucʼ che areʼ. Man iwech taj ri jastak, xak rech ri Dios. Ri i cʼaslemal rech ri Dios xukujeʼ. Rucʼ ronojel waʼ, man cʼo tä quiyaʼo y man quiqʼuex tä i cʼux che ri i banom.

23 Quinbij chiwe: Tokʼob u wäch ri jun achi, rumal rech ri jastak cʼo rucʼ cäsach na u wäch. Y wachanim, quinbij cʼut we jastak chque ri kʼinomab pa ri jastak rech we uwächulew.

24 Xukujeʼ quinbij chque ri mebaʼib, ix ri man cʼo tä jastak, xak cʼo ri rech camic y ri rech chuek, quintzijonic chiwe iwonojel ri quixutuj u wäch ri molonel rumal maj cʼo iwucʼ, quinwaj chi quibij pa iwanimaʼ: Man quinyaʼ taj rumal maj cʼo wucʼ, xane we tä cʼo wucʼ quinyaʼ na.

25 We tä quibij waʼ pa iwanimaʼ, man cʼo tä i mac chnuwäch, we tä man quiban jeriʼ, cäcʼajisan na i wäch. Kas tzʼakat cʼut ri cʼajisabal i wäch rumal quirayij ri man i cʼamom taj.

26 Wacamic, rumal conojel ri jastak ri in nu bim canok chiwe, are cʼu riʼ rech cʼolic ri esabal i mac che ronojel kʼij, rech quixbinic chʼajchʼoj chuwäch ri Dios. Quinwaj chi quiyaʼ ri i jastak chque ri mebaʼib, chijujunal ix chiyaʼ je jas ri cʼo iwucʼ. Jeriʼ chiyaʼ u wa che ri cänumic. Chiyaʼ ri ratzʼiak che ri chʼanalic. Jeʼ, jix chrilic ri yawabib, y chebitoʼoʼ rech areʼ quecunaxic pa ri qui tiojil, xukujeʼ pa ri cuxlabal, je jas ri rajwaxic chque.

27 Chiwilaʼ chi cäbantaj we jastak pa ri sucʼumal, rucʼ ri iwetamabal chrij jas ri utz y ri man utz taj. Man cäbix tä chi jun cäxiqʼuinic na naj, xane ja ri cukʼiʼ wi u chukʼab. Xukujeʼ rajwaxic chi cäsacʼajinic, rech cäcuin cuchʼeco ri sipanic. Rumal riʼ, rajwaxic chi cäbantaj na ronojel ri jastak rucʼ ri u sucʼumal.

28 Quinwaj chi cänataj chiwe, chi jachin cʼo chixol ix ri cutaʼ che ri u culja chi cukaj puak che, rajwaxic chi cutzelej u qʼuexel ri jasäch ri u kajom che je jas xubij. We man quiban tä jeriʼ, quixmacunic. Xukujeʼ quiban na chi cämacunic ri i culja.

29 Qʼuisbal re, man quincuin taj quinbij chiwe ronojel ri jastak ja ri quixmacun wi, are cʼu ri, cʼo qʼui tak u beyal y u banbal, e sibalaj man quincuin taj che rajilaxic.

30 Xane quincuin quinbij waʼ, we man quichajij tä iwib, y we man quichʼoʼjij tä iwib che ri chomabal, ri i tzij, cʼu ri i banom, y we man quinimaj tä ri u takbal ri Dios, we man quitakej tä pa ri i cojobal che ri u petic ri Kajawaxel, cʼä pa ri qʼuistajic rech ri i caslemal, we man cʼo tä waʼ, cäsachtajic na i wäch. Wacamic at achi, cänataj riʼ chawe rech man cäsach tä a wäch.