Ri Wuj Re Ri Mosiah

1 Xcʼulmataj cʼut chi cʼäte ri Mosiah u banom ri xtakan che rumal ri u tat, y u bim chic cʼut waʼ pa ronojel ri ulew, chi ri winak pa tak cʼolibal cäquimulij quib, rech quebec pa ri lokʼalaj rachoch Dios rech cäquita ri u tzij ri cubij na chque ri ajawinel Benjamín.

2 E qʼui ri e areʼ, rumal riʼ man xecajilaj taj, rumal ri winak sibalaj xquiwinakirisaj quib, y xeqʼuiyic pa ri ulew.

3 Xukujeʼ xquicʼam bic nabealaxel re ri qui chijel rech cäquichiʼj awaj, y rech cäquiporoj chiʼjbal che ri Dios, je jas cubij takbal u tzij ri Moisés.

4 Xukujeʼ cʼut rech cäquimaltioxij che ri Ajawaxel ri qui Dios, ri xebucʼam ulok waral tzpa ri jun tinimit re Jerusalén. Y xeresaj lok pa qui kʼab ri qui cʼulel, y xuyaʼ cʼut chque sucʼalaj tak achijab rech areʼ xebux ri cajtijab. Xukujeʼ xuyaʼ jun sucʼalaj achi, are ri cajawinel. Are waʼ xutacʼabaʼ canok ri utzilal pa ri ulew re Zarahemla, y xebutijoj rech cäquinimaj ri u takbal ri Dios, rech quequicotic, y rech coc cucʼ sibalaj lokʼokʼebal che ri Dios y chque conojel ri achijab.

5 Xcʼulmataj cʼut aretak xebopanic pa ri lokʼalaj rachoch Dios, xquicoj ri qui panibal jelaʼ, y chquijujunal achi cucʼ ralaxic, ri rixokil, cʼu ri u cʼojol, y ri u mial, y ri calcʼual cʼu waʼ, ri qui cʼojol, qui mial, ri nabeal cʼä pa ri qʼuisbal chʼip, chquijujunal calpuk winak qui tasom quib.

6 Xquicuʼbaʼ cʼut ri qui panibal chrij ri lokʼalaj rachoch Dios, xquitacʼabaʼ je ri u chiʼ ja ri qui panibal chuwäch ri lokʼalaj rachoch Dios. Je cʼu riʼ, cuyaʼ chi quecanajic chupam y cäquita ri tzij ri cubij na chque ri ajawinel Benjamín.

7 Are cʼu sibalaj nim ri qʼuialaj winak. Rumal riʼ, ri ajawinel Benjamín man cäcuin taj quebutijoj chquijujunal chupam ri u tapia ri lokʼalaj rachoch Dios. Rumal riʼ, xutak chi xyactajic jun nimalaj tzʼak re chajibal, rech rumal riʼ cuyaʼ chi ri u winak cäquita ri tzij ri cubij na areʼ chque.

8 Xcʼulmataj chi xuchaplej u tzijoxic chque ri u winak pa ri nimalaj tzʼak, tzare man e conojel taj xquita ri u tzij cumal ri qʼuia winak. Rumal riʼ, xutak chi cätzʼibaxic ri u tzij ri xubij areʼ rech quetak bic chque ri winak ri man cäquita taj ri u tzij, rech jeriʼ cuyaʼ chi cäquicʼam u tzij.

9 Are tak waʼ ri tzij ri xutziijoj y xutak chi cätzʼibaxic, xubij: Wachalal, iwonojel ix ri i mulim iwib, ri ix ri quixcuin quita ri tzij ri quinbij na chiwe camic. Rumal man xintakan taj chiwe chi je ri u banic man cʼo tä patan chke ri quinbij na chiwe. Xane rech quitatabej ri nu tzij, chi quijak ri i xiquin rech quixcuin quito, chi quijak ri iwanimaʼ rech quixcuin quichʼobo, chi quijak cʼut ri i chomabal rech cäcʼut chiwäch ri mayilaj jastak rech ri Dios ri man esam tä chic.

10 Man nu takom taj chiwe chi quixpetic rech quixej iwib chnuwäch, o chi quichomaj chi ri in quinnimarisaj nu kʼij chuwäch jun winak aj uwächulew.

11 Xane in junam iwucʼ, cuyaʼ chi quinyawajic che tak u beyal ri yabil pa ri tiojil y pa ri chomanic. Pune waʼ, xinquichaʼ we winak, cʼu ri in tat xinujach che ri nu tewichixic. Pa we lokʼalaj chac, cʼu ri u kʼab ri Ajawaxel xuyaʼ chwe chi quinban cʼamal qui be we winak. Jeʼ, sibalaj in u cʼolom rumal ri u cuinem ri man cuyaʼ taj chi cäjunamaxic, rech quinpatanij chiwe rucʼ ronojel ri cuinem, ri etamabal, y ri chukʼab ri u yaʼom ulok chwe ri Ajawaxel.

12 Quinbij chiwe chi jeriʼ u yaʼom chwe chi quixinpatanij pa ronojel nu kʼij cʼä pa we kʼij riʼ. Y man xintzucuj tä cʼut ri i kʼän puak y ri i sak puak, majun i kʼinomal chic.

13 Man xinyaʼ taj chi quixtzʼapix pa cheʼ, xukujeʼ man xinyaʼ taj chi cʼo jun chixol ri cʼo pa u kʼab ri rachalal che ri u patanixic. Man xinyaʼ tä cʼut chi quixcämisanic, o chi quibano itzel tak jastak, o chi quixelakʼanic. Man xinyaʼ taj chi jun achi cämacun rucʼ jun ixok ri man rixokil taj, ni chi jun ixok cämacun rucʼ jun ixok ri man rixokil taj, ni chi jun ixok cämacun rucʼ jun achi ri man rachajil taj. Xukujeʼ man xinyaʼ tä chiwe chi quiban apachique tak mac, xane xixintijoj chi quinimaj ri u takbal ri Ajawaxel, pa conojel ri jastak ri cutak chiwe.

14 Cʼu ri in xukujeʼ, xinchacunic rucʼ ri nu kʼab rech quixinpatanij, ech man quixtojon taj, y rech man cäpe tä ri nimalaj cʼäx piwiʼ. Ix ix kʼalajisanelab che ronojel ri nu bim camic.

15 Xukujeʼ wachalal, man nu banom tä waʼ rech quinnimarisaj wib, man quinbij tä waʼ rech quinbij chi cʼo i mac, xak quinbij waʼ jastak chiwe rech quiwetamaj chi wacamic quincuinic quintzelej u bixic che ri Dios rucʼ jun sakalaj wanimaʼ.

16 Chiwilampeʼ, quinbij chiwe chi we xinbij chi xinchacunic pa ri nu cʼaslemal rech quinpatanij chiwe, man quinwaj tä quinnimarisaj wib rumal. Are baʼ xak in cʼolinak pa ri u pataninic ri Dios.

17 Chiwilampeʼ, quinbij we jastak chiwe rech quiwetamaj ri sak nojibal, rech quiwetamaj chi aretak ix cʼo wi pa ri pataninic chque, ri iwaʼjil i tzʼakat, xak ix cʼo wi pa ri pataninic che ri i Dios.

18 Chiwilampeʼ, i bim chi in ri in iwajawinel, we tä cʼu ri in ri quibij ri iwajawinel, y quinchacun rech quixinpatanij, ¿la man takal tä chiwe chi quixchacunic rech quipatanij iwib?

19 Chiwilampeʼ cʼut, we tä ri in, ri quibij ix ri iwajawinel, xinpatanij chiwe ronojel ri nu kʼij, pune in cʼolinak pa ri pataninic che ri Dios, we tä ri ix quimaltioxij chwe, ¡O takal chiwe chi sibalaj quimaltioxij che ri Iwajawinel ri cʼo chicaj!

20 Quinbij chiwe wachalal, we tä quiyaʼ i maltioxinic, y ri i kʼijilanic rucʼ ronojel ri cuinem rech ri iwanimaʼ che ri jun Dios ri ix u banom, areʼ ix u cʼolom che utz, u yaʼom chiwe chi quixquicotic, y u yaʼom chiwe chi quixcʼojiʼc pa ri utzilal—

21 Quinbij chiwe chi we quipatanij ri jun ri ix u banom tzpa pa ri tiquiribal, y tajin quixicʼolo ronojel kʼij, y tajin cuyaʼ iwuxlab rech quixcuin quixcʼasiʼc, y rech quixsalabic, y rech cʼu quibano je jas ri i rayibal, xukujeʼ quixuchajij pa ronojel aninakil, quinbij chiwe we tä quipatanij areʼ rucʼ ronojel ri iwanimaʼ, jeriʼ ix pataninelab, man cʼo tä quechbex chiwe.

22 Chiwilampeʼ, ronojel ri cutaʼ chiwe, are chi quinimaj ri u takbal. Ri areʼ u chiʼm chiwe chi we quinimaj ri u takbal, quinimarisaj na iwib che ri utz puwiʼ ri uwächulew. Cʼu ri areʼ man cuqʼuex taj ri u bim canok. Rumal riʼ, we quinimaj ri u takbal, quixutewichij na, quixutoʼ na rech quinimarisaj iwib che ri utz.

23 Are cʼu riʼ, nabe, areʼ ix u banom, y u yaʼom chiwe i cʼaslemal. Rumal riʼ, cʼo ri i cʼas rucʼ.

24 Ucab, areʼ cäraj chi quibano ri u takom chiwe, we cʼu quibano, chanim quixutewichij. Rumal cʼu riʼ, u tojom chiwe. Majaʼ xqʼuis ri i cʼas che, cʼo na i cʼas cʼut che junalic. Je baʼ waʼ, ¿jas cʼoliʼc rech quinimarisaj iwib?

25 Wachanim, quintaʼ chiwe: ¿La quixcuin quibij jubikʼ chi iwumal? Quintzelej u bixic chiwe: Man are tä riʼ. Man quixcuin taj quibij chi ri ix junam rucʼ ri cʼajcʼaj ulew, pune, ix bantajinak rucʼ ri cʼajcʼaj ri uew. Tzare chiwilampeʼ, ri cʼajcʼaj ulew are rech ri Dios.

26 Xukujeʼ ri in ri quibij ix chi in ri iwajawinel man nim tä waʼ nu kʼij chiwäch, rumal ri in cʼajcʼaj ulew xukujeʼ. Quiwilo chi xinriʼjobic, chanim quinyaʼ na waʼ nu tiojil, ri cäcamic, cho ri u nan, ri ulew.

27 Rumal riʼ, je xinbij chiwe chi xixinpatanij tajin quinbinic rucʼ jun sakalaj wanimaʼ chuwäch ri Dios. Jeriʼ xinbano chi quimulij iwib camic, rech man cʼo tä nu mac, rech cäpe tä ri i quiqʼuel panuwiʼ aretak in cʼo wi chuwäch ri Dios rech cukʼat tzij panuwiʼ rumal ri xutak chwe chiwij.

28 Quinbij chiwe chi xinban chi quimulij iwib rech quinchʼaj ri watzʼiak che ri i quiqʼuel, wacamic chi quinkaj chanim pa ri mukbal, rech cuyaʼ chi quincämic pa ri utzilal, rech cʼut cumulij ri wuxlabal cucʼ ri winakil ri quebixonic chilaʼ chicaj, rech quebixonic lokʼalaj tak bixonic che jun sucʼalaj Dios.

29 Xukujeʼ quinbij chiwe chi xinbano chi quimulij iwib waral rech cuyaʼ chi quinbij chiwe chi man quincuin tä na chic che u banic ri iwajtij, cʼu ri iwajawinel.

30 Rumal rech chi wachanim tajin quintzijonic chiwe, ronojel ri nu tiojil sibalaj cäbirbatic. Xane ri Ajawaxel Dios quiuchap che nu toʼic, y u yaʼom cʼut chwe chi quintzijonic chiwe, y u takom ulok chwe chi quinbij chiwe chi wacamic areʼ ri nu cʼojol, Mosiah, ri iwajawinel, y ri cʼamal i be.

31 Wacamic, wachalal, quinwaj chi quibano je jas i banom cʼä wacamic. Jeriʼ, je jas xinimaj ri nu takbal, y xukujeʼ xinimaj ri takbal rech ri in tat, cʼä xixnimaric pa ri utzalaj jastak, ix esatajinak pa qui kʼab ri i cʼulel, je u beyal waʼ, we quinimaj ri u takbal ri nu cʼojol, xukujeʼ ri takbal ri Dios ri cäbix na chiwe rumal areʼ, we tä quinimaj, quinimarisaj na iwib che ri utzil, y man cʼo tä na cʼut ri cuinem quech ri i cʼulel piwiʼ.

32 Xane, O nu winak, chichajij iwib rech man cʼo taj chʼoʼj chixol, rech man quixkaj taj che ri u nimaxic ri ruxlabal ri itzel, ri bitajinak rumal ri in tat, Mosiah.

33 Are chiwilampeʼ, bitajinak chi tokʼob u wäch ri jun ri cäraj cunimaj ri itzel uxlabal riʼ. Jachin cäraj cunimaj, y cäcanaj cʼut pa ri u mac, cacäm cʼu rucʼ ri u mac. Cutij na jun cʼajisabal wächaj che ri ranimaʼ, y cucʼam na ri u tojbal, jun junalic cʼajisabal wächaj. Cʼo chic ri retamabal, xane man xraj taj cunimaj. U xalkʼatim cʼut ri u takbal ri Dios.

34 Quinbij chiwe, ix iwonojel, i cʼamom ri tijonic, y man cʼo taj jun chiwe, xak xuwi ri acʼalab man xquicʼam taj ri tijonic. Ix i cʼamom ri tijonic che tak we jastak. Iwonojel iwetaʼm chi takal chiwe che junalic chi quiyaʼ che ri Dios ronojel ri cʼo iwucʼ, chi quiyaʼ iwib xukujeʼ. Iwonojel i cʼamom ri tijonic chquij ri tzij ri tzʼibam canok chejujun junab. Cʼo riʼ chupam ri kʼalajisabal che ri cäpe na ri bitajinak cumal ri lokʼalaj tak kʼalajisanelab che ri cäpe na tzpa ri kʼijal aretak xel bic ri in tat, Lehi, pa Jerusalén.

35 Xukujeʼ ronojel ri xquibij ri ka tat cʼä pa ri camic. Chiwilampeʼ, cʼut, xquibij jas ri xutak ri Ajawaxel chque. Rumal riʼ, areʼ kastzij y sucʼalaj.

36 Wacamic cʼut quinbij chiwe, wachalal, we tä iwetamam waʼ jastak, we tä e cʼutum waʼ jastak chiwäch, cʼäte cʼu riʼ, we tä quixmacunic, y man quiban tä je jas ri bim canok, we tä cäcʼulmataj chi quixtastaj iwib na cho ri Ruxlabal ri Ajawaxel rech man cuyaʼ tä chi coc iwucʼ rech cucʼam i be pa ri be rech ri etamabal, rech jeriʼ cäpe tewichibal piwiʼ, rech cʼu quixnimaric che utzil y rech quixcolotajic.

37 Quinbij baʼ chiwe we tä cʼo jun achi ri cuban jeriʼ, kastzij man nimanel tä che ri Dios. Rumal riʼ, we cuchomaj chi cunimaj na ri itzel uxlabal, y cux na ri u cʼulel ronojel ri suqʼuilal, we tä jeriʼ, man cʼo tä ri u cʼolibal ri Ajawaxel rucʼ, rumal rech chi areʼ man cäcʼojiʼc tä chupam jun tzʼilalaj rachoch.

38 Rumal waʼ, we tä ri jun achi man cuqʼuex tä u cʼux che ri u mac, xak xuwi cäcanajic, y cäcämic je jas jun u cʼulel ri Dios. Cʼäte riʼ, ri u takbal ri suqʼuilal cuban chi cunaʼ pa ri junalic ranimaʼ chi cʼo u mac. Waʼ cuban xukujeʼ chi cucʼuʼ rib chiwäch ri Dios. Kas cunaʼ pa ri u cʼux chi cʼo u mac, cʼo u cʼaxcʼol y ri u kʼoxom je ri u banic jun kʼakʼ ri man cächup taj, cʼu ri rep cäpakiʼc che junalic.

39 Quinbij cʼut chiwe chi ri elbal cʼuxaj man cʼo tä rech rucʼ we achi riʼ. Rumal riʼ, pa qʼuisbal, areʼ copan na pa ri cʼäx, jun cʼäxcʼolil ri man cʼo tä u qʼuisic.

40 O ri ix riʼjalaj tak tataʼib, ix ri alabom, y ri ix ri acʼalab ri quixcuin quita ri nu tzij, are cʼu kʼalaj xintzijonic, rech man cʼäx tä u chʼobic, rech utz quito, quintzʼonoj chiwe chi cänataj chiwe ri cʼäxalaj cʼolibal quech jachinak ri e kajinak pa ri nimalaj mac.

41 Xukujeʼ, quinwaj chi cänataj chiwe ri areʼ ri cäquinimaj ri u takbal ri Dios, ri kas quequicotic, y tewichitalic ri qui banic. Ri e areʼ e tewichitalic pa conojel ri jastak, ri rech ri tiojilal, y ri rech ri uxlabal. We tä cʼu e nimanel cʼä pa ri qʼuisbal, quiecʼamtaj na chicaj rech quecʼojiʼc rucʼ ri Dios pa jun cʼolibal rucʼ junalic quicotemal. O cänataj waʼ chiwe, cänataj chiwe we kastzijalaj jastak, rumal ri Ajawaxel Dios u bim canok.