1 Xcʼulmaxic chi aretak ri ajawinel Benjamín xuqʼuis u tzij chque ri u winak, xtakan cʼut ri u taʼic chque rech cäretamaj we xquicoj ri u tzij ri u bim canok chque.

2 Juntir cʼut xechʼawic, xquibij: Jeʼ, cäkacojo conojel ri a tzij ri a bim canok chque. Xukujeʼ ketaʼm chi are kastzij y sucʼ, rumal ri Ruxlabal ri Ajawaxel, ri kas Cuinel, sibalaj xujuqʼuexo. Jeʼ ri kanimaʼ xqʼuextajic. Xel bic ri itzel tak chomabal che ri macaj pa ka jalom, xak xuwi cʼo wi ri utzalaj chomabal rech cäkaban ri utz che junalic.

3 Ri uj cʼut xukujeʼ, cʼo jun nimalaj ka noʼjibal che ri u chʼobic ri cäpe na, waʼ rumal ri nimalaj tokʼobisam wachaj ri Dios, y xukujeʼ rumal ri u cʼutum ri Ruxlabixel chke, y we cuyaʼo, cujchʼaw na che ri u kʼalajisaxic ronojel jastak ri cäpe na.

4 Are cʼu riʼ, ri ka cojobal ka yaʼom chque ri jastak ri u bim canok chke ri kajawinel. Ri areʼ xujucʼam che waʼ nimalaj etamabal, rumal riʼ, cujquicotic rucʼ jun nimalaj quicotemal.

5 Cäkayaʼ cʼut chi cäkaban yabal tzij rucʼ ri ka Dios che u nimaxic ri u rayibal, rech cäkaban nimanel che ri u takbal cucʼ ronojel ri jastak ri cutak chke pa ronojel kʼij rech ka cʼaslemal, rech man cäpe tä jun cʼäxcʼolil ri man cʼo tä u qʼuisic pakawiʼ kumal uj, je jas ri u bim can ri ágel, rech man cäkakumuj tä pa ri kumbal jawi cʼo wi ri royowal ri Dios.

6 Are waʼ ri tzij ri xraj ri ajawinel Benjamín chi cäquiyaʼo ri e areʼ. Rumal riʼ, xubij chque: Ix i kʼalaisam canok ri tzij ri xinrayij, cʼu ri yabal tzij ri i banom are jun tzʼakatalaj yabal tzij.

7 Wacamic cʼut, rumal ri yabal tzij ri i banom, quixchʼabex na ri ralcʼual ri Cristo, ri u cʼojel y ri u mial. Chiwilampeʼ cʼut, camic ri ix ralcʼualam pa ri uxlabal, rumal cʼut quibij chi xqʼuextaj ri iwanimaʼ rumal ri cojobal che ri u biʼ. Rumal waʼ quixalcʼualax rumal, y xixux ri u cʼojol y ri u mial.

8 Chuxeʼ cʼut we nimalaj biʼaj riʼ, ix tzokopitalic, man cʼo tä jun biʼaj chic ri quixutzokopij wi, man cʼo tä chic jun biʼaj ri cuyaʼ ri colotajibal. Rumal riʼ, quinwaj chi quicʼam ulok ri u biʼ ri Cristo piwiʼ ix, iwonojel ri ix ri i banom yabal tzij rucʼ ri Dios chi amakʼel ix nimanel cʼä pa ri u qʼuisbal ri i cʼaslemal.

9 Jachin cʼut cuban waʼ, cäcʼojiʼc na pa ri u wiquiakʼab ri Dios, rumal cäretamaj na ri u biʼ ri cuchʼabej areʼ, rumal cächʼabex na areʼ pa ri u biʼ ri Cristo.

10 Wacamic, cäcʼulmataj cʼu riʼ, jachin man cucʼam tä puwiʼ ri u biʼ ri Cristo, cʼo chi cächʼabex na areʼ pa jun biʼaj chic, rumal riʼ, cäriktaj na pa ri u mox kʼab ri Dios.

11 Quinwaj chi cänataj na chiwe xukujeʼ, chi are waʼ ri biʼaj ri xinkʼalajisaj chi quinyaʼ na chiwe ri man cächup tä riʼ, xak xuwi rumal ri macaj. Rumal riʼ, chichajij iwib rech man quixkaj tä pa ri macaj, rech we biʼaj riʼ man cächup tä pa iwanimaʼ.

12 In quinbij chiwe: Quinwaj chi tza cänataj chiwe y chi cätzʼibaxic pa ri iwanimaʼ we biʼaj riʼ, rech man quixriktaj tä pa ri u mox ri Dios. Mas utz we quito y quichʼob u wäch ri chʼabal ri quixusiqʼuij na, xukujeʼ cʼut, ri biʼaj rumal ri quixusiqʼuij na areʼ.

13 Are cʼut ¿jas u chʼobic cuban jun achi che jun rajaw we man cächacunic tä rucʼ, ri man retaʼm tä u wäch areʼ, ri naj cʼo wi che ri u chomabal y ri u rayibal ri ranimaʼ?

14 Xukujeʼ ¿la cuchap jun achi ri quiej re ri u cʼulja, y cucʼam bic, y cucʼolo cho ja? In quinbij chi man je tä riʼ, mawi cuyaʼ tä rech cäwaʼic cucʼ ri u quiejel ri areʼ, xane cäresaj apan riʼ. Jeriʼ cäban na chiwe we man iwetaʼm tä ri biʼaj rumal ri quixsiqʼuix na.

15 Rumal riʼ, quinwaj chi co quixtaqʼuiʼc ix tacʼalic, man quixsalab taj rech quixqʼuiyaric chupam ri utzalaj chac, rech quixtunubatajic rucʼ ri Cristo, ri kAjawaxel, ri kas Cuinel, rech quixux ix rech, xukujeʼ, rech quixcʼam na chicaj, rech quichʼec ri colotajibal, y ri junalic cʼaslemal, rumal ri etamabal, ri cuinem, ri kʼaal tzij, y ri elbal cʼuxaj rech ri jun ri banowinak ronojel ri jastak cho ri uwächulew y cho ri caj, areʼ ri Dios cʼo puwiʼ juntir. Amen.