1 Nei pwutak kesempwal, I pwurehng ntingwei pwe ke en kak ese me I wie momourte; ahpw I ntingih duwen me kansensuwed.

2 Pwe kilang, I iang mahwin doar ehu ong Mehn Leimen kan, me se sohte pweida; oh Arkiandus kamakamkilahr kedlahs, oh pil Luhram oh Emron; ei, oh tohto nait ohl kesempwal akan mehla.

3 Oh met kilang, nei pwutak, I periki me Mehn Leimen kan pahn kamwomwala aramas pwukat; pwe irail sohte kin koluhla, oh Sehdan kamwakidadahr irail en kin lingeringerpene nanpwungarail ahnsou koaros.

4 Kilang, I kin wie nannantihong doadoahk ong irail; oh ahnsou me I koasoia mahsen en Koht ni inen irail kin masepwehkda oh lingeringer pahi; oh ahnsou me I sohte kin koasoi ineniong irail a mohngiongarail kan kin keptakaila ong mahseno; eri, I masak me Ngehn en Kauno pahn sohlahr ieiang irail.

5 Pwe irail kin lingeringer mehlel me kahrehda e mwomwen me irail solahr masak mehla; oh sohlahr arail limpoakpene; oh irail kin mehn nimpilki kamaramas oh dupuk ahnsou koaros.

6 Oh met, nei pwutak kempoake, mehndahte arail keptakai, kita loaloapwoationg doadoahk; pwe ma kitail pahn uhdihsang doadoahk, kita pahn mihla pahn manaman en dihp; pwe mie ata doadoahk me kita anahne wia nan erein ata pahn momourki paliwar en mour wet, pwe kita en kak powehdi imwintihti en mour pwung koaros, oh kakomoalehdi palingeneta nan wehin Koht.

7 Oh met I ntingih ekis duwen lokolok en aramas pwukat. Pwe nin duwen ei wehwehkihda sang rehn Amworon, kilang, Mehn Leimen kan koledi tohto me re salihdi, me irail koledihsang ni doulik en Serisah; oh mie ohl akan, lih akan, oh seri kan.

8 Oh irail kemehla ehn lih akan arail pwoud kan oh ehn seri kan arail pahpa kan; oh irail kin kamwengehki lih akan uduk en arail pwoud kan, oh seri kan uduk en arail pahpa kan; oh sohte pihl, ihte ekiste, me irail kin kiheng irail.

9 Oh mehndahte tiahk suwed lap wet me Mehn Leimen kan kin wia, e sohte doar duwehte me neitail aramas akan kin wia nan Moriandum. Pwe kilang, tohto nein Mehn Leimen kan serepein kan me irail saliedi; oh mwurin arail kawelahr dahme keieu mwahu oh kesempwal sang soahng koaros, me iei kosonned en mour mwakelekel—

10 Oh mwurin arail wiahier soahng wet, irail kin kemeirailla ni wiepe keieu sohte mwahu, kalkaloke paliwererail akan lao mehla; oh mwurin arail wia met, irail kin kangala udukarail kan duwehte mahn lawalo kan, pwehki mohngiongarail kan eh keptakailahr; oh irail kin wia met pwe dene kilel en komwad.

11 Oh nei pwutak kempoake, ia mwomwen soangen aramas pwukat, me sohte ahneki onepek—

12 (Oh sounparte depe douwer powe, ahnsou me irail wia aramas onepek oh mwahu kei)

13 Ahpw, O nei pwutak, ia mwomwen soangen aramas pwukat, me kin pereniki laud tiahk suwed—

14 Ia mwomwen atail pahn kasik me limen Koht sohte pahn ketin kadeikada kitail?

15 Kilang, mohngiongi weriweriki: Meid suwediong aramas pwukat. Maing Koht, komw ketin kadeikirailda oh ketin karukihla diparail kan, oh wiewia suwed kan, oh tiahk suwed kan sang mwohn sihlangihr!

16 Oh pil ehu, nei pwutak, tohto lihodi oh neirail serepein kan me mihmihte nan Serisah; oh mwongehkan me Mehn Leimen kan sohte wahsang, kilang, nein Sihnepai sounpei kan wahsang, oh kohkohsang irail eri irail raparapahkiseli mwonge; oh lih likeilap tohto lupungumasala nan ahlo oh mehla.

17 Oh sounpei kan me ieiang ie luwet; oh nein Mehn Leimen kan sounpei kan mihmi nanpwungen Serisah oh ngehi; oh koaros me tangala rehn nein Aron sounpei kan lohdieng nan arail mehla.

18 Oh kapwuriamwei en nei aramas ahr pwupwidi! Sohte koasondi rehrail oh sohte mahk. Kilang, ngehi aramas men, oh I ahneki kehlail en aramas men, oh I sohlahr kak ruwesehkin irail ei koasoi kan.

19 Oh irail kehlailla nan arail wiewia sapwung; irail duwepenehte nan arail lemei, sohte kin mahkehng me mah oh pwulopwul; oh irail kin pereniki soahng koaros ihte me mwahu me soh; oh lokolok me nait lih akan oh nait seri kan ahneki pohn sahpwet doarasang soahng koaros; ei, sohte lokaia kak kawehwehda, de pil ntingdi.

20 Oh met, nei pwutak, I solahr pahn koasoia irair sapwung wet. Kilang, ke esehier wiewia suwed en aramas pwukat; ke esehier me irail solahr momouriki padahk, oh solahr kehn wasa; oh arail wiewia suwed kan suwedsangehr ehn Mehn Leimen kan.

21 Kilang, nei pwutak, I sohte kak peksawaskin irail rehn Koht pwe e de pahn kaloke ie.

22 Ahpw kilang, nei pwutak, I kak peksawaskinuhk rehn Koht, oh I koapwoaroapwoariki rehn Krais me ke pahn komourla; oh I kapakapikihong Koht me en doarehla ahmw mour, pwe ke en kadehdeh sapwellime aramas ahr pahn pwuralahng, de arail pahn kamwomwala; pwe I ese me irail udahn pahn mehla ma irail sohte pahn koluhla oh pwurala reh.

23 Oh ma irail pahn mehla e pahn duwehte Mehn Sared ko, pwehki arail ineng en mohngiongarail kan, ahr raparapahki kamaramas oh dupuk suwed.

24 Oh ma irail pahn mehla, kitail ese me tohto riatail akan iangala Mehn Leimen kan, oh pil tohto irail pahn pil iangala irail; eri, ntingihdi ekis duwen mepwukat, ma ke mourla oh I pahn mehla oh sohte kilangki mesei; ahpw I koapwoaroapwoariki me I pahn pwurehng kilang uhk ahnsou mwadang; pwe mie poadoapoad sarawi kan me I pahn kihong uhk.

25 Nei pwutak, loaloapwoationg Krais; oh soahng kan me I ntingihdi en dehr kansensuwedihuk, katoutouihuk ong mehla; ahpw Krais en ketin pwokuhkada, oh sapwellime lokolok oh pwoula, oh eh ketin kasalehiong kahlape atail pahpako, oh sapwellime kalahngan oh kanengamah, oh koapwoaroapwoar en sapwellime lingan oh mour soutuk, en mihmi nan ahmw madamadau kohkohlahte.

26 Oh kupwur kalahngan en Koht Sahmo, me mwoale ketiket wasa ile nanleng, oh atail Kaun Sises Krais, me ketiket ni palimaun en sapwellime manaman, lao soahng koaros pahn mihla pahn eh manaman, en mihmi, oh ieiang uhk kohkohlahte. Ahmen.