Buk blong Momon

1 Mo nao mi, ^aMomon, i mekem wan ^bhistri blong ol samting we mi bin luk tugeta wetem wanem we mi bin harem, mo mi singaotem hem Buk blong Momon.

2 Mo kolosap sem taem we ^aAmaron i haedem ol histri wetem Lod, hem i bin kam long mi, (long taem ia mi mi kolosap ten yia, mo mi stat blong ^blanem samting folem fasin blong lanem ol samting, blong ol pipol blong mi) mo Amaron i bin talem long mi: “mi luk se yu yu wan tru pikinini, mo yu yu lanem samting kwiktaem nomo.

3 From hemia, taem we bae yu kolosap gat twante mo fo yia, mi wantem se yu mas tingbaot ol samting we yu bin luk long saed blong ol pipol ia; mo taem we yu yu kasem yia ia, go long graon Antum, long wan hil we bae oli singaotem, ^aSim; mo long ples ia mi bin putum wetem Lod, evri tabu toktok long saed blong pipol ia.

4 Mo luk, bae yu tekem ol ^abuk blong Nifae long yu bakegen, mo ol narafala buk yu mas livim long ples we oli stap; mo yu mas raetem long ol buk blong Nifae, evri samting we yu bin luk long saed blong ol pipol ia.”

5 Mo mi, Momon, from mi wan laen blong ^aNifae, (mo nem blong papa blong mi i Momon) mi tingbaot ol samting we Amaron i givim oda long mi blong mekem.

6 Mo i bin hapen, se mi, from mi gat leven yia, papa blong mi i tekem mi i go long graon long Saot, go kasem graon blong Sarahemla.

7 Ful fes blong graon i bin gat plante haos we i kavremap, mo namba blong ol pipol i plante kolosap olsem se hem i ol sanbij blong solwota.

8 Mo i bin hapen long yia ia, i stat blong gat wan faet bitwin Ol Man blong Nifae, we i gat ol laen blong Nifae mo ol laen blong Jekob mo ol laen blong Josef mo ol laen blong Soram; mo faet ia i bitwin Ol Man blong Nifae, mo Ol Man blong Leman mo Ol Man blong Lemyul mo Ol Man blong Ismael.

9 Nao Ol Man blong Leman, mo Ol Man blong Lemyul, mo Ol Man blong Ismael, oli bin singaotem olgeta Ol Man blong Leman, mo tufala grup ia, i Ol Man blong Nifae mo Ol Man blong Leman.

10 Mo i bin hapen se faet ia i stat blong stap long medel blong olgeta long ol boda blong Sarahemla, kolosap long ol wota blong Saedon.

11 Mo i bin hapen se Ol Man blong Nifae i karem i kam tugeta, wan bigfala namba blong ol man, namba ia i bitim teti taosen. Mo i bin hapen se oli gat long semfala yia ia, wan namba blong ol faet, we long ol faet ia, Ol Man blong Nifae i bin winim Ol Man blong Leman mo oli kilimded plante long olgeta.

12 Mo i bin hapen se Ol Man blong Leman i stopem plan blong olgeta, mo i gat pis i stap long graon; mo pis i bin stap blong spes blong kolosap fo yia, mekem se i no bin gat blad i ron.

13 Be fasin nogud i bin stap win long fes blong ful graon, inaf blong mekem se Lod i tekemaot ol disaepol blong hem we ^ahem i lavem tumas, mo wok blong ol merikel mo blong mekem sikman i kam oraet i stop from rabis fasin blong ol pipol.

14 Mo i no bin gat eni ^apresen we i kam long Lod, mo ^bTabu Spirit i no bin kam long eniwan, from fasin nogud blong olgeta mo ^dfasin blong no gat bilif.

15 Mo mi, from mi bin gat fiftin yia mo from we tingting blong mi i tru, from hemia, Lod i bin visitim mi, mo mi bin testem mo mi bin save long gudfala samting we i kam long Jisas.

16 Mo mi bin traem blong prij long ol pipol ia, be maot blong mi i sat, mo Lod i no letem mi blong mi save prij long olgeta; from luk, olsem we oli minim blong ^ago agensem God blong olgeta; mo Lod i ^btekem i go ol disaepol blong hem, we hem i lavem tumas aot long graon, from rabis fasin blong olgeta.

17 Be mi bin stap long medel blong olgeta, be Lod i no letem mi blong mi prij long olgeta, from hat blong olgeta i strong tumas; mo from we hat blong olgeta i strong tumas, Lod i bin ^asakem wan strong nogud tok i go long graon from olgeta.

18 Mo ol Gadianton man blong stil, we oli stap long medel blong Ol Man blong Leman, i kam plante tumas long graon wetem ol rabis fasin blong olgeta, inaf blong mekem se ol pipol we oli stap long hem oli stat blong haedem ol ^arij samting blong olgeta long graon; mo oli stap glis, from Lod i sakem wan strong nogud tok long graon ia, blong mekem se oli no save holemtaet olgeta, o karembak olgeta bakegen.

19 Mo i bin hapen se i gat ol fasin blong mekem blak majik, mo ol fasin blong mekem nakaemas, mo ol fasin blong mekem majik; mo paoa blong nogud wan i hapen long ful fes blong graon, go kasem we evri toktok blong Abinadae i hapen, mo tu, toktok blong Samuel, Man blong Leman.