It‑Testimonjanza tal‑Profeta Joseph Smith

Il‑kliem tal‑istess Profeta Joseph Smith dwar il‑miġja tal‑Ktieb ta’ Mormon hu:

“Fil‑lejla tal‑ … wieħed u għoxrin ta’ Settembru [1823] … jien iddeċidejt li ndur lejn Alla li Jista’ Kollox fit‑talb u s‑supplika tiegħi. …

“Sewwasew hekk kif kont qed insejjaħ lil Alla, indunajt li f’kamarti beda jfeġġ dawl, li kompla jiżdied fil‑qawwa tiegħu sakemm il‑kamra ddawwlet aktar mix‑xemx ta’ nofsinhar, meta f’daqqa waħda deher personaġġ ħdejn is‑sodda tiegħi, wieqaf fl‑arja, għax riġlejh ma bdewx imissu l‑art.

“Kellu fuqu mantar wiesgħa ta’ kulur bajdani mill‑aktar skwiżit. Kien bajdani aktar minn kull ħaġa li jien qatt rajt fid‑dinja; u ma naħsibx li fid‑dinja jista’ jkun hawn xi ħaġa li tista’ tidher daqstant bajda u brillanti. Idejh kienu mikxufin, u l‑istess dirgħajh, ftit ’il fuq mill‑polz; u anke riġlejh kienu mikxufin, bħalma kienu wkoll saqajh, ftit ’il fuq mill‑għekiesi. Lanqas rasu u għonqu ma kienu mgħottijin. Stajt nara li hu ma kien liebes l‑ebda lbies ieħor ħlief għal dan il‑mantar, għax kien miftuħ, u b’hekk stajt naralu sidru.

“Mhux biss il‑mantar tiegħu kien verament abjad, iżda l‑figura kollha tiegħu kienet glorjuża aktar milli nista’ niddeskrivi, u wiċċu kien sewwasew qisu xi sajjetta. Il‑kamra kienet verament imdawwla, iżda mhux daqs kemm kienet qawwija d‑dija li kien hemm eżatt madwaru. L‑ewwel darba li ħarist lejh, bżajt; iżda l‑biża’ ma damitx ma ħallietni.

“Hu sejjaħli b’ismi, u qalli li hu kien messaġġier mibgħut għandi mill‑preżenza ta’ Alla, u li ismu kien Moroni; li Alla kellu ħidma għalija x’inwettaq; u li ismi kien se jissemma fit‑tajjeb u fil‑ħażin fost kull ġens, tribù, u lsien, jew li se jissemma kemm fit‑tajjeb kif ukoll fil‑ħażin fost in‑nies kollha.

“Hu qal li kien hemm ktieb moħbi, miktub fuq pjanċi tad‑deheb, li kien jitkellem dwar l‑abitanti tal‑qedem ta’ dan il‑kontinent, u dwar l‑oriġni tagħhom. Hu qal ukoll li l‑milja tal‑Evanġelju ta’ dejjem kienet tinsab fih, kif ingħatat mis‑Salvatur lill‑abitanti tal‑qedem;

“Qalli wkoll li kien hemm żewġ ġebliet f’arki tal‑fidda—u dawn il‑ġebliet, li kienu mwaħħlin ma’ pettoral, kienu jikkostitwixxu dawk li jissejħu l‑Urim u t‑Tummim—li kienu moħbija mal‑pjanċi; u dawk li fiż‑żminijiet tal‑qedem kienu jippossjedu u jużaw dawn il‑ġebliet kienu jissejħu ‘veġġenti’; u li Alla kien ħejjihom għat‑traduzzjoni tal‑ktieb. …

“Għal darb’oħra, hu qalli, li meta jien niġi mogħti dawk il‑pjanċi li tkellem dwarhom—għax iż‑żmien li fih setgħu jingħatawli kien għadu ma wasalx—jien ma kelli nurihom lil ħadd; lanqas il‑pettoral bl‑Urim u t‑Tummim; stajt nurihom biss lil dawk li kont se niġi mitlub nurihom; jekk jien ma nagħmilx dan nispiċċa ninqered. Waqt li kien qed jitkellem miegħi dwar il‑pjanċi, f’moħħi feġġet dehra li fiha stajt nara l‑post fejn kienu moħbijin il‑pjanċi, b’tant ċarezza u dettall, li jien wasalt biex għaraf il‑post meta jiena mort inżuru.

“Wara din il‑komunikazzjoni, jiena rajt id‑dawl fil‑kamra jibda jinġabar sewwasew madwar il‑persuna ta’ dak li beda jkellimni, u kompla jinġabar madwaru sakemm il‑kamra reġgħet spiċċat fid‑dlam, ħlief madwaru; meta, f’daqqa waħda rajt bħal passaġġ miftuħ li jibqa’ sejjer direttament fis‑smewwiet, u huwa tela’ ’l fuq sakemm għeb għal kollox, u l‑kamra reġgħet ġiet kif kienet qabel feġġ dan id‑dawl mis‑smewwiet.

“Jiena bqajt mimdud nikkontempla dwar l‑uniċità ta’ dik ix‑xena, u nistagħġeb bil‑kbir b’dak li qalli dan il‑messaġġier straordinarju; meta, f’nofs il‑meditazzjoni tiegħi, f’daqqa waħda ndunajt li l‑kamra tiegħi reġgħet bdiet timtela bid‑dawl, u f’kemm ili ngħidlek, dak l‑istess messaġġier mis‑smewwiet reġa’ kien ħdejn is‑sodda tiegħi.

“Hu reġa’ beda jkellimni, u għal darb’oħra beda jitkellem dwar l‑istess ħwejjeġ li tkellem dwarhom fl‑ewwel żjara tiegħu, mingħajr l‑iċken varjazzjoni; u wara li għamel dan, hu għarrafni dwar kastigi kbar li kienu se jolqtu lid‑dinja b’ħerba mill‑aktar kbira, permezz tal‑ġuħ, tax‑xabla, u tal‑pesta; u li dawn il‑kastigi mill‑aktar kbar se jolqtu lid‑dinja f’din il‑ġenerazzjoni. Wara li qalli dawn il‑ħwejjeġ, hu reġa’ tela’ ’l fuq kif għamel qabel.

“Issa, il‑ħsibijiet li bdew għaddejjin minn moħħi tant kienu intensi, li ma stajtx nagħlaq għajn m’għajn, u bqajt mimdud mistgħaġeb bil‑kbir b’dak li kont rajt kif ukoll smajt. Iżda kemm bqajt sorpriż meta għal darb’oħra erġajt rajt lil dak l‑istess messaġġier ħdejn is‑sodda tiegħi, u smajtu jerġa’ jgħid jew itenni għal darb’oħra l‑istess ħwejjeġ bħal qabel; kif ukoll wissieni u qalli li Satana kien se jipprova jġarrabni (b’konsegwenza taċ‑ċirkustanzi indiġenti tal‑familja ta’ missieri), biex nikseb il‑pjanċi bl‑iskop li nsir sinjur. Hu ma riedx li jien nagħmel dan, fejn qalli li m’għandu jkolli l‑ebda skop ieħor f’moħħi għalfejn nikseb il‑pjanċi ħlief biex nigglorifika lil Alla, u m’għandi niġi influwenzat bl‑ebda mottiv ieħor ħlief li nibni s‑saltna tiegħu; inkella ma setgħux jingħatawli.

“Wara din it‑tielet żjara, hu reġa’ tela’ fis‑smewwiet bħal qabel, u jien erġajt bdejt nixtarr fuq l‑istramberija ta’ dak li kont għadni kif esperjenzajt; meta kważi immedjatament wara li l‑messaġġier mis‑smewwiet telaq minn ħdejja għat‑tielet darba, is‑serduk beda jidden, u ndunajt li kien qed jisbaħ, li kien ifisser li konna għaddejna l‑lejl sħiħ nitkellmu.

“Ftit wara qomt minn soddti, u, bħas‑soltu, bdejt bil‑ħidma meħtieġa ta’ kuljum; iżda, hekk kif ippruvajt naqbad naħdem bħal kull darb’oħra, sibt li saħħti tant kienet dgħajfa li letteralment ma kontx kapaċi naħdem. Missieri, li kien qed jaħdem flimkien miegħi, induna li ma kontx qed inħossni sewwa, u qalli biex immur id‑dar. Bdejt nipprepara biex nitlaq lejn id‑dar; iżda, meta kont se nipprova naqbeż iċ‑ċint biex noħroġ ’il barra mill‑għalqa li konna fiha, saħħti ma tatnix, u jien spiċċajt mitluq mal‑art, u għal xi ħin anke ntlift minn sensija.

“L‑ewwel ħaġa li stajt niftakar kien leħen ikellimni, u jsejjaħli b’ismi. Jien ħarist ’il fuq, u rajt lill‑istess messaġġier wieqaf fuq rasi, imdawwar bid‑dawl bħal qabel. Imbagħad hu reġa’ beda jtenni dak kollu li kien qalli l‑lejl ta’ qabel, u ordnali biex immur għand missieri u ngħidlu dwar id‑dehra u dwar il‑kmandamenti li kont ingħatajt.

“Jien obdejt; erġajt lura għand missieri fl‑għalqa, u rrakkontajtlu kulma kien ġara. Hu weġibni li dak li kont għidtlu kien ġej minn Alla, u qalli biex immur u nagħmel kif ordnali l‑messaġġier. Jien tlaqt mill‑għalqa, u mort fil‑post fejn il‑messaġġier qalli li kienu moħbijin il‑pjanċi; u minħabba l‑mod daqstant ċar u dettaljat li jien kont rajt il‑post fid‑dehra li kelli, fil‑mument li wasalt hemm jien għaraft il‑post.

“Viċin tar‑raħal ta’ Manchester, fil‑kontea ta’ Ontario, fi New York, hemm għolja kbira mhux ħażin, u hi l‑ogħla waħda li hemm f’dawk l‑inħawi. Fin‑naħa tal‑punent ta’ din l‑għolja, mhux ’il bogħod wisq mill‑quċċata, taħt blata kbira mhux ħażin, kienu jinsabu l‑pjanċi, moħbijin ġo kaxxa tal‑ġebel. Il‑parti għolja ta’ nofs dil‑blata kienet wiesgħa u ttondjata, u lejn it‑truf tagħha kienet idjaq, b’tali mod li l‑parti tan‑nofs kienet viżibbli ’l fuq mill‑art, iżda t‑truf ta’ mad‑dawra kienu miksijin bil‑ħamrija.

“Hekk kif neħħejt il‑ħamrija, ġibt lieva, u daħħaltha taħt tarf il‑blata, u b’daqsxejn ta’ sforz għollejtha ’l fuq. Ħarist ġewwa, u hemm fil‑fatt jiena rajt il‑pjanċi, l‑Urim u t‑Tummim, u l‑pettoral, kif kien qalli l‑messaġġier. Il‑kaxxa li kienu fiha kienet iffurmata permezz ta’ ġebel imwaħħal flimkien b’xi tip ta’ siment. Fil‑qiegħ tal‑kaxxa kien hemm żewġ ġebliet impoġġijin b’mod perpendikulari mal‑ġnub tagħha, u fuq dawn il‑ġebliet kien hemm il‑pjanċi u l‑affarijiet l‑oħra magħhom.

“Jien ippruvajt noħroġhom, iżda ġejt imwaqqaf milli nagħmel dan mill‑messaġġier, u għal darb’oħra ġejt mgħarraf li ż‑żmien li fih stajt noħroġhom kien għadu ma wasalx, u ma kienx se jasal qabel erba’ snin minn dak inhar; iżda hu qalli li jien kelli mmur f’dak il‑post preċiżament sena minn dak inhar, u li hu kien se jiltaqa’ miegħi hemmhekk, u li jien kelli nibqa’ nagħmel dan sakemm jasal iż‑żmien li nikseb il‑pjanċi.

“Għalhekk, kif ġejt ordnat li nagħmel, jien mort fl‑aħħar ta’ kull sena, u kull darba sibt hemmhekk lill‑istess messaġġier, u f’kull waħda mit‑taħdidiet tagħna jien irċevejt mingħandu ċerta struzzjonijiet u informazzjoni, dwar dak li l‑Mulej kien se jagħmel, u kif u b’liema mod kellha titmexxa s‑saltna tiegħu fl‑aħħar żminijiet. …

“Finalment wasal iż‑żmien li fih stajt ningħata l‑pjanċi, l‑Urim u t‑Tummim, u l‑pettoral. Fit‑tnejn u għoxrin jum ta’ Settembru, elf tmien mija u sebgħa u għoxrin, hekk kif mort bħas‑soltu fl‑aħħar ta’ sena oħra fil‑post fejn kienu moħbijin, l‑istess messaġġier mis‑smewwiet għaddihom lili b’din l‑inġunzjoni: li jien kelli nkunu responsabbli minnhom; li jekk nitlaqhom minn idejja bi traskuraġni, jew b’negliġenza min‑naħa tiegħi, jiena nitqaċċat; iżda jekk nagħmel kull sforz biex nippreservahom, sakemm hu, il‑messaġġier, jerġa’ jiġi għalihom, huma jkunu protetti.

“Ma domtx ma sirt naf ir‑raġuni għalfejn kont ingħatajt struzzjonijiet daqshekk stretti biex inżommhom sikuri, u għalfejn il‑messaġġier kien qalli li meta jiena nkun lestejt dak li kien mitlub minni, hu kien se jerġa’ jiġi għalihom. Għax hekk kif sar magħruf li kienu jinsabu għandi, intużaw l‑aktar attentati qawwija biex jeħduhom mingħandi. Kull strataġemma li setgħet tiġi vvintata ġiet utilizzata għal dak il‑għan. Il‑persekuzzjoni ħraxet u saret aktar vjolenti minn qatt qabel, u l‑miġemgħa kienet kontinwament lesta li teħodhom mingħandi jekk dan ikun possibbli. Iżda grazzi għall‑għerf ta’ Alla, huma baqgħu sikuri f’idejja, sakemm permezz tagħhom jien wettaqt dak li kien mitlub minni. Meta, skont il‑ftehim, il‑messaġġier ġie lura għalihom, jien tajthomlu; u huma għadhom għandu sal‑ġurnata tal‑lum, li hu t‑tieni jum ta’ Mejju, elf tmien mija u tmienja u tletin.”

Għal rakkont aktar komplut, ara Joseph Smith—Storja fil‑Ġawhra li Tiswa Ħafna.

L‑annali antiki li b’hekk ġew maħruġin mill‑art bħala l‑leħen ta’ poplu jitkellem minn ġot‑trab, u tradotti għal lingwaġġ modern permezz tad‑don u l‑qawwa ta’ Alla kif ġie attestat permezz ta’ affermazzjoni Divina, ġew ippubblikati għall‑ewwel darba fid‑dinja bl‑Ingliż fis‑sena 1830 bħala The Book of Mormon.