Testemoni blong Profet Josef Smit
fastaem nekis

Testemoni blong Profet Josef Smit

Ol stret toktok blong Profet Josef Smit long saed blong olsem wanem nao Buk blong Momon i bin kamaot:

“Long naet blong … nambatwantewan blong manis Septemba [1823] … mi bin go prea mo askem strong long God we I Gat Olgeta Paoa. …

“Taem we mi bin stap rere blong mekem prea long God, mi luk wan laet i stap kamaot long rum blong mi, we i bin gohed blong gro kasem taem we rum blong mi i laet moa, i bitim medel dei mo wantaem nomo, wan enjel i kamaot kolosap long bed blong mi, mo hem i stanap nomo long ea, from ol leg blong hem oli no tajem graon.

“Hem i bin werem wan longfala klos we i slak long bodi blong hem mo waet kala blong hem i naes tumas. Waet kala ia i bitim evri samting we i waet long wol ia, we mi bin luk bifo; mo mi no bilivim se i gat eni samting long wol ia, oli save mekem i luk waet olsem mo i saen olsem. Ol han blong hem i neked, mo ol han blong hem tu, smol antap long joen blong han; mo semmak olsem tu, ol leg blong hem i neked smol antap long ol angkol. Hed mo nek blong hem i bin neked tu. Mi save faenemaot se hem i no bin werem eni narafala klos be longfala klos ia nomo, from i open we mi save luk jes blong hem.

“I no longfala klos blong hem nomo we i stap waet tumas, be ful bodi blong hem i saen, mi no save olsem wanem blong tokbaot samting ia, mo fes blong hem i saen olsem laetning. Rum blong mi tu, i laet olgeta, be i no saen bigwan olsem laet raonabaot long bodi blong hem. Taem we mi luk hem blong fas taem, mi bin fraet; be afta smol taem nomo, fraet blong mi i lus.

“Hem i singaotem mi long nem blong mi, mo i talem long mi se hem i wan mesenja we God i bin sendem hem i aot long fes blong hem i kam long mi, mo se nem blong hem i Moronae, se God i gat wan wok we hem i wantem mi blong mekem. Mo plante man bae oli laekem nem blong mi, mo plante bae i no laekem nem blong mi, long medel blong evri kantri, famli, mo ol lanwis, o se nem blong mi bae oli tokbaot gud o nogud long medel blong evri pipol.

“Hem i bin talem se i gat wan buk we oli bin berem, we oli raet long ol buk we oli mekem wetem gol, oli givim wan histri blong ol man bifo we oli bin stap laef long kantri ia, mo ples we oli bin kamaot long hem. Hem i talem tu se fulwan blong gospel ia we i no gat en, i stap insaed long buk ia, olsem we Sevya i bin givim long ol man we oli bin stap laef bifo;

“Mo tu, se i gat tu ston insaed long ol silva bonara—mo tufala ston ia, i joen wetem wan jesplet, i mekem wanem oli singaotem Yurim mo Tumim—oli bin berem wetem ol buk ia; mo ol man we oli holem mo yusum ol ston ia, i samting we i mekem ‘ol sia’ blong ol taem bifo o olfala taem; mo we God i bin mekem rere olgeta from stamba tingting blong transletem buk ia.

“Bakegen, hem i bin talem long mi, se taem we mi kasem ol buk ia, we hem i tokbaot—from taem we mi mas kasem olgeta i no hapen yet—mi no mas soemaot olgeta long eni man; mo tu, jesplet, wetem Yurim mo Tumim, be nomo long olgeta ia we God i givim oda blong mi soem long olgeta; sapos mi no mekem olsem bae mi kasem panis. Long taem we hem i stap toktok wetem mi long saed blong ol buk ia, visen i open long tingting blong mi we mi save luk ples ia we oli bin berem ol buk ia long hem. Mo we i klia gud mo i stret, mekem se mi save ples ia bakegen taem mi bin visitim ples ia.

“Afta we mi finis toktok wetem enjel ia, mi luk laet long rum i stat blong kam raonem man ia we i bin toktok long mi, mo i gohed blong mekem olsem kasem taem we rum i bin stap tudak bakegen be smol laet nomo i raonem hem nomo. Nao, long stret taem we samting ia i kamaot, mi luk wan bigfala hol, olsem wan bigfala paep i go stret antap long heven, mo hem i bin go antap kasem taem we hem i bin lus fulwan, mo rum i stap olsem we i bin stap bifo we laet ia blong heven i kamaot.

“Mi stap ledaon mo mi stap tingbaot spesel samting ia we i jes kamaot long mi, mo mi tingting hevi tumas long saed blong wanem we enjel ia i bin talem long mi; long semtaem long medel blong tingting hevi blong mi, mi bin faenem kwiktaem se laet ia i stap kamaot bakegen long rum blong mi, mo kwiktaem nomo, olsem we i bin stap, semfala mesenja ia blong heven i stap long saed blong bed blong mi bakegen.

“Hem i stat; mo bakegen i talemaot ol semfala samting we hem i bin mekem long fasfala taem we hem i bin kam. Evri toktok i semmak nomo, we afta hem i mekem samting ia, hem i talemaot long mi ol bigfala jajmen we bae oli kam long wol tru long bigfala hadtaem blong kasem kaekae, naef blong faet, mo sik; mo se, ol rabis jajmen ia bae oli kam long wol long jeneresen ia. Afta we hem i talemaot ol samting ia, hem i gobak antap olsem we hem i bin mekem bifo.

“Afta samting ia, ol tingting i bin go dip insaed long maen blong mi, i mekem se slip i ronwe long ae blong mi, mo mi ledaon wetem bigfala sapraes long ol samting we mi bin luk tugeta wetem ol samting we mi bin harem. Be i bin bigfala sapraes blong mi bakegen, long taem we mi luk semfala mesenja kolosap long bed blong mi, hem i bin talem o talemaot bakegen long mi ol samting olsem bifo; mo i ademap wan woning long mi, i talem long mi se Setan bae i traem blong temtem mi (from we famli blong papa blong mi i no gat plante mane), blong mi kasem ol buk ia, blong stamba tingting blong kam rij. Samting ia hem i bin blokem mi long hem, i se mi no mas gat eni narafala tingting long ae blong mi; be hemia nomo blong leftemap God, mo mi no mas folem eni narafala tingting be blong stanemap kingdom blong hem nomo; sapos no, bae mi no save kasem olgeta.

“Afta long nambatri visit ia, hem i bin gobak antap long heven olsem bifo. Mo mi bin stap bakegen blong tingting hevi long olgeta defren kaen samting we i jes kamaot long mi; kwiktaem nomo olsem stret taem afta we mesenja blong heven i bin go antap, i aot long mi blong nambatri taem, faol i bin singaot, mo mi faenem se deilaet i stap kam, i minim se ol storian blong mitufala i bin tekem kolosap ful naet ia.

“I no longtaem afta we mi bin girap aot long bed blong mi, mo gohed olsem evri taem blong mekem ol wok blong dei; be, long taem mi traem blong wok olsem ol narafala taem, mi bin faenem se bodi blong mi i slak we i mekem se mi no save mekem wok. Papa blong mi, we i bin stap wok wetem mi, i faenem se wan samting i no stret wetem mi, mo i talem mi blong go long haos. Mi bin stat wetem stamba tingting blong gobak long haos; be, long taem we mi traem blong klaem ova long fanis aot long fil we mifala i bin stap long hem, paoa blong mi i lus evriwan, mo mi foldaon long graon olsem se mi ded, mo blong wan smol taem mi no bin save eni samting.

“Fasfala samting we mi save tingbaot, i wan voes we i stap toktok long mi, i stap singaotem mi long nem blong mi. Mi bin lukluk i go antap, mo mi bin luk semfala mesenja ia, i stanap kolosap long hed blong mi, laet i raonem hem olsem bifo. Afta hem i talemaot bakegen long mi evri samting we hem i bin talemaot long mi long naet bifo, mo i givim oda long mi blong go long papa blong mi mo talem long hem long saed blong visen mo ol komanmen we mi bin kasem.

“Mi obei; mi gobak long papa blong mi long fil, mo talemaot evri samting long hem. Hem i talem se samting ia i wan samting blong God, mo i bin talem long mi blong go mo mekem ol samting we mesenja i bin talemaot long mi. Mi aot long fil mo go long ples ia we mesenja i bin talem long mi se ol buk ia oli stap long hem, mo from visen we mi bin kasem i klia gud long saed blong samting ia, mi bin save ples ia long stret taem we mi kasem ples ia.

“Kolosap long vilej blong Manjesta, Ontario kaonti, Niu Yok, i gat wan bigfala hil we i bigwan, we i moa hae long eni narafala hil long ples ia. Long Wes saed blong hil ia, i no longwe long top blong hem, andanit long wan ston we i bigwan, ol buk ia oli stap insaed long wan ston bokis. Ston ia i bigwan, mo saed antap i raon long medel, mo i smol long ol saed, mekem se medel pat blong hem, man i save luk antap long graon, be saedsaed blong hem, graon i bin kavremap.

“Afta we mi bin tekemaot ol graon, mi tekem wan wud, we mi pusum lelebet andanit long saed blong ston ia, mo wetem smol paoa mi leftemap ston ia. Mi bin lukluk i go insaed mo i tru, long ples ia mi luk ol buk ia, Yurim mo Tumim, mo jesplet, olsem we mesenja i bin talem. Bokis we oli stap slip insaed long hem, oli bin mekem wetem ol ston we oli fas tugeta long wan kaen simen. Long botom blong bokis oli putum tu ston we oli krosem bokis ia, mo long tufala ston ia oli bin putum ol buk ia, mo ol narafala samting wetem olgeta.

“Mi bin traem blong tekemaot olgeta, be mesenja i bin blokem mi, mo i talem bakegen long mi se taem ia blong tekemaot olgeta i no kam yet, mo tu, bae i no kam, kasem fo moa yia stat long taem ia, be hem i bin talem long mi se mi mas kam long ples ia stret long wan yia long taem ia, mo we bae hem i mitim mi long ples ia, mo se mi mas gohed blong mekem olsem kasem taem we bae i kam blong kasem ol buk ia.

“Folem hemia, olsem we hem i bin givim oda long mi, mi bin go long en blong evri yia, mo long evri taem, mi luk semfala mesenja long ples ia mo mi bin kasem plante tijing mo save long hem, long evri storian blong mitufala, long saed blong ol samting we Lod bae i mekem mo olsem wanem mo long wanem fasin hem i wantem olgeta blong lidim kingdom blong Hem long ol las dei.

“Ale, taem ia i bin kam blong kasem ol buk ia, Yurim mo Tumim, mo jesplet. Long nambatwantetu dei blong manis Septemba, wan taosen eit handred mo twanteseven, mi bin go olsem evri taem long en blong wan narafala yia long ples ia we oli bin putum olgeta, nao semfala mesenja blong heven i bin givim olgeta long mi wetem toktok ia: se mi mas lukaotem olgeta; se sapos mi kam slak mo mi lusum olgeta, o tru long eni mistek blong mi, bae God i mas katemaot mi; be sapos bae mi yusum evri wei blong mi blong sevem olgeta, kasem taem we hem, mesenja ia, bae i askem ol samting ia, God bae i lukaotem gud olgeta.

“I no longtaem mi bin faenemaot stamba tingting from wanem mi bin kasem strongfala toktok olsem blong holem olgeta i sef, mo from wanem hem i bin olsem we mesenja i talemaot se afta we mi mekem wanem mi mas mekem wetem han blong mi, bae hem i askem ol samting ia. From afta we olgeta i bin faenemaot se mi holem ol samting ia, oli traem strong tumas long ol wei blong stilim ol samting ia long mi. Oli yusum evri defren trik we oli save tingbaot from stamba tingting ia. Ol fasin blong givim hadtaem we oli bin mekem long mi, i kam moa konkon mo strong bitim bifo. Mo plante grup blong ol pipol i stap rere oltaem blong kasem ol samting ia long mi sapos i save hapen. Be tru long waes tingting blong God, oli bin stap sef long ol han blong mi, kasem taem we mi bin mekem tru long ol samting ia wanem we mi mas mekem. Folem wanem we mesenja i bin talemaot, taem we mesenja i bin askem ol samting ia, mi bin givimbak ol samting ia long hem; mo hem i holem ol samting ia long kontrol blong hem kasem dei ia, we i nambatu dei blong Mei, long yia wan taosen eit handred mo teti-eit.”

Blong ridim histri ia we i moa fulwan, luk long Josef Smit—Histri long Perel we I Gat Bigfala Praes.

Olfala histri ia, olsem ia nao i bin kamaot long graon olsem wan voes blong wan pipol we i stap toktok aot long das, mo mi bin transletem i kam long lanwis blong yumi tedei, tru long presen mo paoa blong God, olsem we God i talemaot. Fasfala buk we oli bin mekem i bin kamaot long wol long Inglis long yia 1830 olsem The Book of Mormon.